Sak-y pe-kɩɩmb nins a Zeova sẽn yãkã

1, 2. Bõe yĩng t’a Zeova yeel tɩ yẽ yaa wa pe-kɩɩma?

A ZEOVA yeelame tɩ yẽ yaa wa pe-kɩɩma. (Eze. 34:11-14) Rẽ sõngda tõnd tɩ d bãng a sẽn yaa Wẽnnaam ning buudã. Pe-kɩɩm sẽn nong a piis kogend-b lame, la a get b yelle. A talld-b lame n kẽnd yamd la koom sẽn beẽ. (Yɩɩl 23:1, 2) A geta b yell wĩntoog la yʋngo. (Luk 2:8) A kogend-b-la ne we-rũmsã. (1 Sãm. 17:34, 35) A zãada pe-bi nins sẽn nan dogã. (Ezai 40:11) Pesg sã n meneme a gẽesd-a lame, la a tɩpd sẽn pogl-bã.—Eze. 34:16.

² Pĩnd wẽndẽ wã, Israyɛll nebã fãa la bal ra yaa pe-kɩɩmb la koaadba. Rẽnd a Zeova sẽn yeel tɩ yẽ yaa wa pe-kɩɩmã, b wʋma a võor nana-nana. B ra miime tɩ sẽn na yɩl tɩ piis tall laafɩ, yaa tɩlae tɩ b paam tɩ ned ges b yell la a kogl-ba. Wẽnnaamã tũub wɛɛngẽ me, yaa woto ne ninsaalbã. (Mark 6:34) A Zeova sã n pa get ninsaalbã yell la a wilgd-b sore, b vɩɩmã pa tõe n yɩ noog ye. B pa tõe n bãng sõma ne wẽng n bak ye. Sẽn paase, b pa paamd koglg ye. B na n yɩɩ wa “piis sẽn ka tar kɩɩma.” (1 Rĩm 22:17) La a Zeova sẽn nong a nin-buiidã, a geta b yelle.

3. Bõe yell la d na n gom sõs-kãngã pʋgẽ?

³ Tõnd me wʋmda a Zeova sẽn yeel tɩ yẽ yaa wa pe-kɩɩmã võore. D ne a sẽn get a nin-buiidã yell sõma to-to wã. Sõs-kãngã pʋgẽ, d na n goma a sẽn wilgd-d sor to-to wã yelle, la a sẽn get d yell to-to wã me. D na n yãa tõnd me sẽn segd n maanega.

PE-KƖƖM-SÕNGÃ YÃKA NEB TƖ B SÕNGD-A

4. Wãn to la a Zezi wilg t’a Zeova piisã yell pak-a lame?

⁴ A Zeova yãka a Zezi t’a yaa tigingã Zu-soaba. (Ef. 1:22, 23) A Zezi sẽn yaa pe-kɩɩm-sõngã, a rɩkda a Ba wã togs-n-taare. A nonga tõnd la a get d yelle. A kõ a ‘vɩɩmã a piisã yĩng’ menga. (Zã 10:11, 15) A sẽn kõ a vɩɩmã pa kũun sẽn sɩd nafd ãdem-biisã fãa sɩda? (Mat. 20:28) Sɩd me, a Zeova ratame tɩ “ned ning fãa sẽn tẽed [a Zezi] kõn sãam ye, la a na paam vɩɩm sẽn ka sɛta.”—Zã 3:16.

5, 6. a) Ãnd dãmb la a Zezi yãk tɩ b get d yelle, la sẽn na yɩl n tõog n dɩ rẽ yõodo, bõe la d segd n maane? b) Bõe yĩng tɩ d sakd kãsem-dãmbã ne yamleoogo?

⁵ Wãn to la d wilgd tɩ d sakda a Zezi Kirist sẽn yaa pe-kɩɩm-sõngã? A meng yeelame: “Mam piisã wʋmda mam koɛɛga. Mam mii bãmba, la bãmb tũuda maam.” (Zã 10:27) Yaa d sẽn na n tũud Pe-kɩɩm-sõngã sor-wilgrã bũmb fãa pʋgẽ la d wilgd tɩ d wʋmda a koɛɛgã. Rẽ baoodame me tɩ d sak neb nins a sẽn yãk tɩ b sõngd-a n get a piisã yellã. A Zezi wilgame t’a tʋm-tʋmdbã ne a karen-biisã na n kell n tʋma tʋʋmd ning yẽ sẽn sɩngã. A yeel-b lame tɩ b ‘gʋʋl a pe-bi wã,’ la b zãms-ba. (Mat. 28:20; karm-y Zã 21:15-17.) Koɛɛgã mooneg sẽn wa n paam pãng tɩ neb wʋsg lebg kiris-nebã, a Zezi yãka neb tẽeb sẽn bɩ tɩ b get tigimsã yelle.—Ef. 4:11, 12.

⁶ Kaoosg zugẽ, tʋm-tʋmd a Poll sõsa ne Efɛɛz kiris-nebã kãsem-dãmbã, n yeel-b tɩ yaa vʋʋsem sõngã n yãk-b tɩ b “rɩlg Zu-soabã tẽedbã.” (Tʋʋ. 20:28) Rũndã-rũndã me, yaa vʋʋsem sõngã n yãkd kãsem-dãmbã. Bõe yĩng tɩ d yet woto? Bala, b tikda Wẽnnaam Gomdã sẽn yet bũmb ningã zug n yãkd-ba, tɩ yaool n yaa vʋʋsem sõngã n vẽneg neb tɩ b gʋls gom-kãense. Rẽnd d sã n sakd kãsem-dãmbã, d wilgdame tɩ d waoogda a Zeova ne a Zezi sẽn yaa Pe-kɩɩm-kãsemsã. (Luk 10:16) Yaa rẽ n kɩt tɩ tõnd sakd kãsem-dãmbã ne yamleoogã. La bʋʋm a taab me n kɩt tɩ d segd n sak b sor-wilgrã.

7. Wãn to la kãsem-dãmbã sõngd yãmb sẽn na yɩl tɩ y ned kam fãa kell n yɩ a Zeova zoa?

⁷ Kãsem-dãmbã sã n na n keng b tẽed-n-taasã raood wall b wilg-b sore, b tikda Biiblã sẽn yet bũmb ningã zugu. Saglsã b sẽn kõtã pa sẽn na yɩl n weoog b tẽed-n-taasã tɩ b tũ bãmb raab ye. (2 Kor. 1:24) Kãsem-dãmbã sẽn dat yaa sõng b tẽed-n-taasã tɩ b sã n wa na n yãk yam n maan bũmb bɩ b tik Biiblã sagls zugu. B ratame me tɩ zems-n-taar la bãan zĩnd tigingã pʋgẽ. (1 Kor. 14:33, 40) Biiblã yeelame tɩ kãsem-dãmbã ‘gũuda tõnd sɩɩse,’ rat n yeel tɩ b rat n sõnga tigingã ned kam fãa t’a kell n yɩ a Zeova zoa. Rẽ n so tɩ saam-biig wall saam-bi-poak sã n beege, wall a maanda bũmb sẽn tõe n wa kɩt t’a beeg Wẽnnaam, b yɩta tao-tao n sõng-a. (Gal. 6:1, 2; Ziid 22) Woto fãa pa bʋʋm sẽn segd n kɩt tɩ d ‘sak tõnd taoor dãmbã’ sɩda?—Karm-y Hebre dãmb 13:17.

8. Wãn to la kãsem-dãmbã kogend tigingã nebã?

⁸ Tʋm-tʋmd a Poll sẽn da yaa kãsem-soab sẽn tʋmd a tʋʋmd sõma wã gʋlsa Kolos kiris-nebã, n yeel-b woto: “Bɩ y gũus neer tɩ ned da sãam yãmb ne ninsaalb bãngr la b belgr sẽn ka yõodo, sẽn yaa ninsaalbã minund sẽn yaa dũniyã rẽnda la ka Kirist rẽndã ye.” (Kol. 2:8) Gom-kãensã wilgda bʋʋm a to sẽn kɩt tɩ d segd n sak kãsem-dãmbã saglsã. B kogenda b tẽed-n-taasã ne neb nins sẽn dat n belg-b tɩ b zãag b mens ne a Zeova wã. Tʋm-tʋmd a Pɩɛɛr ra yeela a tẽed-n-taasã tɩ “zãmb bãngdb” la “zãmb karen-saam-dãmb” n da na n bao n belg kiris-neb nins yam sẽn yuusdã, tɩ b kɩɩs a Zeova. (2 Pɩɛ. 2:1, 14) Rũndã-rũndã me, mi n yaa tɩlae tɩ kãsem-dãmbã keoog b tẽed-n-taasã wa a Pɩɛɛr sẽn maanã. Kãsem-dãmbã yaa kiris-neb tẽeb sẽn bɩ la sẽn tar minim. Nand tɩ b yãk-b tɩ b lebg kãsem-dãmba, b ned kam fãa wilgame t’a wʋmda Biiblã goam võor sõma, la t’a tõe n zãmsa nebã sɩdã sẽn be Biiblã pʋgẽ wã. (1 Tɩm. 3:2; Tɩt 1:9) B tẽebã sẽn tar pãngã, n paas b sẽn mi Biiblã sõma wã kɩtame tɩ b tõe n wilg b tẽed-n-taasã sor sõma.

PE-KƖƖM-SÕNGÃ RƖLGDA A PIISÃ LA A KOGEND-BA

9. Wãn to la kiris-nebã paamd sor-wilgr rũndã-rũndã?

⁹ A Zeova tũnugda ne a siglgã n zãmsd kiris-nebã dũniyã gill zugu, la a wilgd-b sore. Naoor wʋsgo, a maanda rẽ ne d sɛbã maasem. La wakat ninga, siglgã kõta kãsem-dãmbã bal saglse. Tõe n yɩɩ lɛta b sẽn gʋls n tool-ba, wall tigims sul yel-gɛtbã la distrik yel-gɛtbã maasem. Woto, kiris-nebã paamda sor-wilgri.

10. D tẽed-n-taag sã n lak n bas tigingã, bõe la kãsem-dãmbã segd n maane?

¹⁰ Kãsem-dãmbã segd n kogla tigingã nebã la b ges b yelle. Sẽn yɩɩd fãa, tigingã ned tẽeb sã n komse, pa rẽ bɩ a maana yel-wẽn-kãsenga, kãsem-dãmbã na n yɩɩ tao-tao n sõng-a. (Karm-y Zak 5:14, 15.) Neb kẽer mi n tolg n lakame n bas tigingã, n bas a Zeova tũubu. Sã n wa yaa woto, bõe la kãsem-soab sẽn tʋmd a tʋʋmd sõma na n maane? A na n maana a sẽn tõe fãa n bao ned a woto zĩiga, n sagl-a t’a lebg n wa. A Zezi yeela woto: “Yãmb Ba sẽn be arzãnã ka rat tɩ kom-bõon-kãens ned a yembr sãam ye.”—Mat. 18:12-14.

KÃSEM-DÃMBÃ ME PA ZEMS ZÃNG YE

11. Bõe n tõe n kɩt tɩ yɩ toog ne kẽer tɩ b sak kãsem-dãmbã?

¹¹ A Zeova ne a Zezi zemsa zãnga, la pa woto ne kãsem-dãmbã b sẽn yãk tɩ b lʋɩt tigingã taoorã ye. Woto tõe n kɩtame tɩ yɩ toog ne kẽer tɩ b sak kãsem-dãmbã. Nin-kãensã tõe n tagsda woto: ‘B yaa neb sẽn kongd wa tõndo. Bõe yĩng tɩ d na n tũ b saglsã?’ Yaa sɩd tɩ kãsem-dãmbã pa zems zãng ye. La d pa segd n get b kong-bõonesã la b pãn-komsmã bal ye.

12, 13. a) Yel-wẽn-bʋs la neb sẽn da lʋɩt a Zeova nin-buiidã taoor maan-yã? b) Bõe yĩng t’a Zeova kɩt tɩ b gʋls rẽ Biiblã pʋgẽ?

¹² Biiblã goma neb a Zeova sẽn da yãk tɩ b lʋɩt a nin-buiidã taoor sẽn maan yel-wẽn yelle, n pa solg ye. Wala makre, a Zeova ra yãka a Davɩɩd t’a yaa Israyɛll rĩma. La a wa n yoo ne pag sẽn kẽ kãadem, la a maan sɩlem tɩ b kʋ a sɩdã. (2 Sãm. 12:7-9) Makr a to yaa tʋm-tʋmd a Pɩɛɛre. Baa a sẽn da tar tʋʋm-kãsems pipi kiris-nebã sʋkã, a maana yel-wẽna. (Mat. 16:18, 19; Zã 13:38; 18:27; Gal. 2:11-14) A Ãdem ne a Hawa wakatã tɛk n tãag rũndã, a Zezi a ye bal n yɩ ned sẽn zems zãnga.

¹³ Bõe yĩng t’a Zeova kɩt tɩ b gʋls neb kẽer a sẽn da yãk kongr Biiblã pʋgẽ? Bʋʋm a ye yaa t’a ratame tɩ d bãng tɩ yẽ tõe n tũnuga ne neb sẽn pa zems zãnga, n wilg a nin-buiidã sore. A pʋd n maanda woto wakat fãa. Rẽnd d pa segd n tik kãsem-dãmbã pãn-komsmã zug n yẽgemdẽ, wall n pa kelgd b saglsã ye. A Zeova ratame tɩ d sak nin-kãensã la d waoog-ba.—Karm-y Yikr 16:2, 8.

14, 15. A Zeova sẽn da kõt a nin-buiidã noy to-to pĩnd wẽndẽ wã wilgda tõnd bõe?

¹⁴ Tara yõod wʋsg tɩ d sak kãsem-dãmbã. Bõe yĩnga? Tẽeg-y-yã a Zeova sẽn da maan to-to n taasd a nin-buiidã noy toog wakat sẽn na yɩl tɩ b põsã. Wala makre, a sẽn wa n na n yiis Israyɛll nebã Eziptã, a tũnuga ne a Moiiz la a Aarõ n taas-b noyã. Sẽn na yɩl tɩ Israyɛll nebã põs toog piig soabã, b ra segd n tũu noy sẽn yaa takɩ. B ra segd n kooda pe-bi, n kok b zɩɩmã n mes b rotã lug a yiibã zut la b rig-noyã zutu. Rẽ poore, b segd n wãba b nemdã fãa. Rẽ yĩnga Wẽnnaam zĩnda saasẽ n gom ne Israyɛll nebã bɩ? Ayo. Yaa a Moiiz n taas kãsem-dãmbã noyã, tɩ kãsem-dãmbã taas Israyɛll nebã. (Yik. 12:1-7, 21-23, 29) Rẽnd a Zeova tũnuga ne a Moiiz la kãsem-dãmbã n wilg a nin-buiidã sore. Rũndã-rũndã, a tũnugda ne tigingã kãsem-dãmbã woto.

¹⁵ Sãmbg kae tɩ y tẽra Biiblã kibay a taab sẽn wilgd a Zeova sẽn tũnug ne neb wall malɛgs n kõ wẽn-sakdbã noy. Naoor wʋsgo, nin-kãens sẽn tũ noyã yĩng kɩtame tɩ b põse. Yel-kãens fãa pʋsẽ, Wẽnnaam yãka yam n kõ neb wall malɛgs noor tɩ b gom yẽ yʋʋr yĩnga, n togs wẽn-sakdbã b sẽn tog n maanega. A Zeova sã n maan woto sẽn na yɩl n fãag a nin-buiidã Armagedõ, pa na n ling-d ye. La kãsem-dãmb nins sẽn paam n gomd a Zeova wall a siglgã yʋʋr yĩngã me segd n gũusame, n da tũnug ne zu-sobend ning b sẽn kõ-bã n maan tɩ loog nug ye.

“YÃGR A YEMBR LA PE-KƖƖM A YEMBRE”

16. “Gomd” ning sẽn gomd tõnd poorẽ wã yaa bõe?

¹⁶ Rũndã-rũndã, a Zeova nin-buiidã yaa ‘yãgr a yembre,’ n tar ‘pe-kɩɩm a yembr’ sẽn yaa a Zezi Kirist. (Zã 10:16) A Zezi yeelame t’a na n zĩnda ne a karen-biisã “wakat fãa hal tɩ ta wakat sɛɛbo.” (Mat. 28:20) A sẽn yaa rĩm n be saasẽ masã wã, a tara tõog n na n maan bũmb nins fãa sẽn na n wa ne a Sʋɩtãan dũniyã sãoongã. Sẽn na yɩl n kell n pa Wẽnnaam nin-buiidã sʋk n paam koglgo, bõe la d segd n maane? Biiblã yeelame: “Yãmb tʋbã na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’” “Gomd” ning sẽn gomd tõnd poorẽ wã yaa bõe? Yaa bũmb nins a Zeova sẽn wilgd tõnd Biiblã pʋgẽ wã, n paas bũmb nins yẽ ne a Zezi sẽn tũnugd ne kãsem-dãmbã b sẽn yãkã n taasd tõndã.—Karm-y Ezai 30:21; Wilgr 3:22.

17, 18. a) Yel-bʋg n yɛgd tõndo, la d tõe n kɩsa sɩd ne bõe? b) Bõe yell la sõsg ning sẽn pʋgdã na n gome?

¹⁷ Biiblã yeelame t’a Sʋɩtãan gõoda “wa gɩgemd sẽn kelemda, n baood a sẽn tõe n paam a soab n sãame.” (1 Pɩɛ. 5:8) Wa we-rũng kom sẽn tare, a pʋgda tõndo, n baood n na n paam ned ning sẽn pa gũusd wall sẽn lak n bas tigingã. Woto yĩnga d segd n kell n paa tigingã pʋgẽ, n tall zood sõma ne a Zeova sẽn yaa d ‘sɩɩs Pe-kɩɩmã la d sɩɩs Gũudã.’ (1 Pɩɛ. 2:25) Wilgr 7:17 goma sẽn na n põs-b to-kãsengã sasa wã yelle, n yeel woto: “Pe-bilã [a Zezi] . . . na n talla bãmb n ta vɩɩm ko-bunds zĩisẽ. La Wẽnnaam na n yẽesa bãmb nintãmã fãa.” Ad sɩd yaa goam sẽn kengd raoodo!

¹⁸ Sõs-kãngã tẽeg-d lame tɩ tʋʋmd ning kãsem-dãmbã sẽn tʋmd tigingã pʋgẽ wã tara yõod wʋsgo. Woto wã, wãn to la nin-kãensã tõe n ges a Zezi piisã yell sõma? Sõsg ning sẽn pʋgdã na n goma rẽ yelle.