Wakat fãa tʋʋmdã sũ-noogo
1 Y sẽn yaa bi-bɩɩgã sik kae tɩ y zoe n tagsa y beoog-daarã yell ye. Yelbũna 21:5 (Sebr Sõngo) yeta tõnd tɩ ‘sẽn nong-a tʋʋmd zĩndedame n tagse, la rẽ yaa yõod a yĩnga.’ Talldẽ-la yõod ne-y tɩ y zĩnd n tags yãmb bõn-datɩ sẽn yaa b rãmb y vɩɩmã pʋgẽ wã zugu. Y sã n wa magd y sẽn na n maan bũmb ning beoog-daar pʋgẽ wã, bɩ y tags wakat fãa tʋʋmdã pʋgẽ kõom yelle. Bõe yĩnga?
2 Sʋk-y kãsemb kẽer sẽn da yɩ so-pakdb b bi-bɩɩlem wakat b tagsg tʋʋmdã zug tɩ b fãa na yeel-y tɩ: “Yʋʋm kãens yɩɩ mam vɩɩmã yʋʋm nins sẽn tall-b yõod n yɩɩdã!” Saam-biig sẽn bãng wakat fãa tʋʋmdã sũ-noog a bi-bɩɩlem wakat tɛk yeela woto kaoosg zugẽ: “M paamda sũ-noog wʋsg m sã n lebg n tags m bi-bɩɩlmã wakat sẽn yɩ to-to wã, n tõe n yeel tɩ m kelga sagl-kãngã sẽn be yamã: ‘Tẽeg f naanda yell f bi-bɩɩlem wakate.’ ” (Koɛ. 12:1) Rɩlla yãmb ne y roagdbã maan segls neere, n bao sor n kõ-y tɩ y me paam sũ-noog a woto buud y bi-bɩɩlem wakate.
3 Roagdba, segl-y y kambã tɩ b kẽ wakat fãa tʋʋmdã pʋgẽ: A Zeova sẽn yaa Ba sẽn tar nonglmã wilgda na-kẽndr ning y sẽn segd n dɩk takɩ. (Ezai 30:21) Sor-wilgr a woto a Zeova sẽn kõt ne nonglmã yaa mak-sõng n kõ yãmb sẽn yaa roagdb sẽn yaa kiris-nebã. Y ka segd n bas tɩ y kambã yãk sor ning bãmb mens sẽn tagsd tɩ yaa sõma wã ye. Ne yam, bɩ y zãms-b sor ning b sẽn segd n tũ wã, tɩ b wa paam a Zeova barka. Dẽ b sã n wa bɩ, yãmb zãmsgã na n sõng-b lame tɩ b ‘bãng sõma ne wẽng n bake.’ (Heb. 5:14) Kãsembã sẽn vɩɩmd n yã yɛl wʋsgã, b miimi tɩ b ka segd n teeg b meng tagsg ye, rɩlla b teeg a Zeova t’a rems b sore. (Yel. 3:5, 6) Woto yaa tɩlae n yɩɩd ne kom-bɩɩsã menga, bãmb minim vɩɩmã pʋgẽ sẽn ka ta kãsembã yĩnga.
4 Roagdba, yãmb biigã sã n wa kolgd a bi-bɩɩlmã wakat bɩ sẽn deng sasa kãng menga, bɩ y sõs ne-a bũmb nins a sẽn dat n maan a vɩɩmã pʋgẽ wã zugu. Lekoll kamb sagendba, karen-saam dãmba la karen-bi-taas na n makame n tus-b tɩ b pʋg dũniyã bõn-datɩ sẽn wilgd laog-nonglmã. Sõng-y y kambã tɩ b yãk kareng ning sẽn na n kɩt tɩ b bãng nug-tʋʋmde, tɩ rẽ na n segl-b lame tɩ b wa tõog n ges b mens yell n da lebs Rĩungã yɛl poorẽ ye. (1 Tɩm. 6:6-11) Naoor wʋsgo ned sã n karem kolɛɛs n sa la a zãms nug-tʋʋmd n paase, seka a na tõog n paam a noor dɩɩb la a kẽ wakat fãa so-pakrã tʋʋmd pʋgẽ.
5 Sagl-y kom-bɩɩsã tɩ b bao n dɩ b rakõtã nafa. B sã n wa yãk yam n na n kẽ kãadem kaoosg zugẽ me, rẽ b na n tõogame n tʋk kãadmã zɩɩb sẽn yaa kãsems n yɩɩdã sõma. Gom-y so-pakrã tʋʋmde, kẽng n tɩ sõng raab sẽn yaẽ kãseng n yɩɩdã, Betɛllã tʋʋmde, la zall so-pakrã tʋʋmd yell ne yam-sõngo. Woto, pĩnd-pĩnda, y kɩtdame tɩ kom-bɩɩsã tʋll n dɩk b vɩɩmã n tʋm ne manesem sẽn tat a Zeova yam, sẽn nafd neb a taabã, la sẽn kõt bãmb mensã sũ-noogo.
6 Kom-bɩɩse, lʋɩɩs-y wakat fãa tʋʋmdã taoore: Kom-bɩɩse, ka tɩlae tɩ y maand sãmbs ne so-pakrã tʋʋmd sẽn wõnd bũmb ning ye. Y tõe n mak-a-la bilf n gese, n dɩk sõngr so-pakrã karengã wakat y sẽn tõe sasa ninga, la vakãas rãmbã sasa. Rẽ la y na n bãng so-pakrã tʋʋmd sẽn sɩd kõt sũ-noog ninga! Rẽ yĩnga yãmb nee wakat ning y sẽn tõe n mak n yɩ sõngr so-pakd masã ne vakãas rãmb nins sẽn watã saab sʋk bɩ?
7 Yãmb sã n yaa bi-bɩɩg Wẽnnaam siglgã pʋgẽ, leb-y n tags y sẽn segd n maan bũmb nins n tall zʋg-sõma nins sẽn segdã n yɩ kãsemb sõngdã yell neere. (1 Tɩm. 3:8-10, 12) Sẽn paase, yãk-y yam n bãng y sã n datame n kos n kẽ Betɛllã tʋʋmd pʋgẽ bɩ y na n tɩ maana Wẽnnaam tʋʋmdã pʋgẽ formasõ lekolle, y yʋʋma sã n wa ta rẽ yĩnga. Yãmb sẽn vɩɩmd n yã yɛl nins so-pakrã tʋʋmd pʋgẽ wã na n kõo yãmb zãmsg sẽn tar yõod wʋsgo. Zãms-kãens kẽer yaa tõog n tũ tʋʋmd na-kẽndrã, bãng n sigl y mengã yɛl sõma n paasã, bãng n zĩnd bɩ n tʋm ne neb a taabã, la tõog n tall taoor sobendã. Rẽ fãa na n segla yãmb tɩ y wa tõog n paam zu-nood tʋʋm sẽn yaa kãsems n yɩɩd kaoosg zugẽ.
8 Bõn-kãseng a yembr sẽn kɩtd tɩ ned tõog n kẽng taoor wakat fãa tʋʋmdã pʋgẽ yaa yẽesem Wẽnnaam tʋʋmdã pʋgẽ. Tʋm-tʋmd a Poll sagla tõnd tɩ d yɩ neb sẽn tar yẽesem, la a wilg bark nins rẽ sẽn tõe n wa ne wã: “Yãmb sẽn maand bũmb ninga fãa, bɩ y maan ne y sũyã fãa Zusoaba yĩnga, . . . tɩ yãmb miimi tɩ yãmb na n deega pʋɩɩr Zusoaba nengẽ tɩ yɩ yãmb keoore.” (Kol. 3:23, 24) Bɩ a Zeova ning-y barka, n kõ-y sũ-noog wʋsg wakat fãa tʋʋmdã pʋgẽ!