Yãmb sʋgsgã leoore

◼ Bõe yĩng tɩ d sã n kõt kaset ne lɛta bɩ d segd n maan gũusgu?

Hal sẽn kaoose, kaset kũun ne lɛta wã yɩɩ manesem sẽn wom biis koe-noogã mooneg pʋgẽ. La yɛl nins sẽn maan dũniyã pʋgẽ sẽn pa kaoosã kɩtame tɩ neba gũusd b mens ne lɛta sẽn yit neb b sẽn ka mi nengẽ pagsgo. Naoor wʋsgo neba geta lɛta b sẽn ka mi toaandã bɩ sẽn ka tar toaanda adɛrs ne yam-yoogo, sẽn yɩɩd fãa lɛtrã sã n gʋlsa ne nug bɩ a wukame. Nebã tõe n loba lɛta a woto n ka pags-b ye. Bõe la d tõe n maan n gɩdg tɩ woto ra yɩ?

Sã n tõe fãa, b segd n gʋlsa lɛtrã la ãnvelopã zug ne masĩni. Ned ning b sẽn toond lɛtrã meng yʋʋr segd n gʋlsa a zugu. Ra ning-y bal tɩ “zaka soab” ye. Sẽn paase, wakat fãa bɩ y ning y mengã adɛrse. Sã n mik tɩ ka zems tɩ y wilg y mengã adɛrse, bɩ y ning y yʋʋrã la Rĩungã Roog adɛrse. Da gʋls-y lɛtã sẽn ka wilgd sẽn ya a soab n tool-b ye. Ra saag-y abada n tũnug ne Lagem taabã Tʋʋmd will adɛrs ye.—Ges-y yʋʋmd 1996 sɩpaolg kiuugã Rĩungã Tʋʋmd (ne farende) Yãmb Sʋgsg Leoore.

Y tõe n paama sagls n paase, la lɛtr modɛll Tirez profit de l’École du ministère théocratique sebrã, seb-neng 71-3 pʋgẽ. No-kãensã na n sõnga tõnd tɩ d tũnug ne lɛta wã sõma n taas nebã koe-noogã.