Sog-y taab sõma
1 Rẽ yĩnga yãmb sẽn mi n ges tɩ b naana ninsaal yĩngã ne bãngr wʋsg to-to wã ka yɛɛsd yãmb sɩda? (Yɩɩl 139:14) Ninsaal yĩngã wil tʋmda ne taab zemsg pʋgẽ. Wẽnnaam Gomdã maka kiris-neb tigingã ne yĩng wil sẽn tʋmd ne taab zemsg pʋgẽ. Kiristã sor-wilgr pʋgẽ, tigingã neb fãa ‘soga taab sõma, sũgdsã sẽn zãad taab sõma wã yĩnga.’ (Ef. 4:16a, Kãab-paalgã Koe-noogo) Woto, a Zeova tõe n tũnuga ne a nin-buiidã sẽn be lagem-n-taar pʋgẽ wã n maan bõn-kãsemse.
2 Pipi kiris-neb tigingã neb naaga “taab” n ges taab yelle, tẽebã la yĩngã wɛɛngẽ. (Tʋʋ. 2:44-47) A Zeova sõng-b lame tɩ b lagem taab n mao ne kɩɩs-toaag n tõoge. (Tʋʋ. 4:24-31) B moona koe-noogã b sẽn da kẽngẽ fãa, n moon-a tẽngã zĩis nins b sẽn da mi wakat kãngã gilli. (Kol. 1:23) Tõnd wakatã me, kiris-neb tigingã neb lagma taab n maan bõn-kãens me ne manesem sẽn yaa kãseng n yɩɩd menga. La yaa bõe ne bõe n sõng n wa ne lagem-n-taar kãngã?
3 Wẽnnaam zãmsgã lagem-d-la taaba: Tõnd balengã lagma tõnd taab dũniyã gill zugu. Wãn-wãn la woto tõog n yɩ? D sak n deegame t’a Zeova tũnugda ne neb n kõt tẽeb “rɩɩb wakat fãa sẽn segde.” (Mat. 24:45, Kãab-paalgã Koe-noogo) D leb n nanda a sẽn ‘kõ neb’ tɩ b yaa karen-saam dãmb tigingã pʋgẽ wã. Tõnd sẽn sakd segls nins a Zeova sẽn maan n dɩlgd tõnd tẽebã wɛɛngẽ wã, d wʋmda Wẽnnaam Gomdã võor n paasdẽ, tɩ rẽ tusd tõnd sẽn ya a Zezi karen-biisã tɩ d fãa tʋll n dɩk a togs-n-taare. D tog n ket n zãmsda Wẽnnaam Gomdã, n modgd ne d sũur fãa sẽn na yɩl n “paam tẽeb a yembre.” (Ef. 4:8, 11-13) Rẽ yĩnga yãmb karemda Biiblã daar fãa sẽn na yɩl n sõng n paas tẽeb lagem-n-taarã pãng bɩ?
4 Tigissã lagem-d-la taaba: Nonglmã lagemda tõnd taab sõma kiris-neb tigissẽ wã. Tigis-kãens wakate, tõnd ‘tẽegda taab yelle.’ (Heb. 10:24, 25) Rẽ baoodame tɩ d ra ges tõnd nin sẽn ne bal ye, la d segd n sɩd bao n bãnga d saam-biisã, n ges tɩ b tara yõod wʋsgo, wa a Zeova sẽn get-b to-to wã. (Azze 2:7) Tõnd sã n kelg b goamã sẽn wilgd b tẽebã, d nonglmã ne-b na n paasame, tɩ d lagem-n-taarã pãng paase. Rẽ yĩnga neba mii yãmb wa ned sẽn nong n debd tigingã tigissẽ bɩ?
5 D yaa tʋmd-n-taas koe-moonegã wakate: D sã n moond koe-noogã ne d tẽed-n-taasã, rẽ lagemda tõnd taab Wẽnnaam daabã maaneg pʋgẽ. Tʋm-tʋmd a Poll ra nanda ‘sẽn lagemd-b yẽ n tʋmd Wẽnnaam soolem yĩngã.’ (Kol. 4:11) D sã n togsd taab yɛl d sẽn vɩɩmd la d sõngd taab koe-moonegã wakate, sõngda tõnd tɩ d pids d kiris-neb tʋʋmdã la paasd tõnd lagem-n-taarã pãnga.—Kol. 3:14.
6 Vʋʋsem sõngã lagemda tõnd ne taaba: D sã n modg sõma a Zeova raabã maaneg pʋgẽ, a na n kõ-d-la a vʋʋsem sõngã. Rẽ sõngda tõnd tɩ d welg mo-yõs la d zĩnd ne taab lagem-n-taar pʋgẽ. (Yɩɩl 133:1) Rẽ tusda tõnd tɩ d “sak Sɩɩg Sõng ratem tɩ laafɩ zĩndi.” (Ef. 4:3) Tõnd fãa tõe n sõngame n kɩt tɩ zems-n-taar zĩnd Wẽnnaam nin-buiidã sʋka, d sã n puk vʋʋsem sõngã biis d manesmã ne taab pʋgẽ.—Gal. 5:22, 23.
7 D sã n lagem taab n tʋmd Kiristã sor-wilgr pʋgẽ, “sõngda yĩnga fãa tɩ bɩ, la [yĩngã] sõngda a meng ne nonglem.” (Ef. 4:16b) Sẽn paase, rẽ waoogda a Zeova, sẽn yaa “Wẽnnaam sẽn so laafɩ” wã.—Rom 16:20.