Bõe la yãmb ningd pipi zĩigẽ?
1 Tũudum sigls wʋsg sẽn nong bũmb ning n tɩ yɩɩd yaa nin-buiidã sõngr tʋʋma, wala lekoll karen-dot la logtor yiy meebo. Ba a Zeova Kaset rãmbã sẽn ka ‘yĩmd neer maaneg la neb sõngrã,’ bũmb ning b sẽn ningd pipi zĩigẽ yaa neba sõngr tẽebã wɛɛngẽ.—Heb. 13:16.
2 Pipi yʋʋm kob-gĩndẽ makrã: A Zezi sẽn da be tẽng zugã wakate, a maana tʋʋm sõma wʋsgo, la tʋʋmd ning a sẽn maan n tɩ yɩɩdã ya a sẽn kɩs sɩdã kasetã. (Luk 4:43; Zã 18:37; Tʋʋ. 10:38) A kõo a karen-biisã noor tɩ b “kẽng n maan neba buud fãa tɩ b yɩ [yẽ] karen-biisi n . . . zãms bãmb[a].” (Mat. 28:19, 20) Sẽn paase, a wilgame tɩ neb nins sẽn tẽed yẽ wã na n wa maana tʋʋmd ning yẽ sẽn sɩngã ne manesem sẽn yaa kãseng n yɩɩdã. (Zã 14:12) A Zezi ninga moonegã tʋʋmd pipi zĩigẽ, bala tʋʋmd kãng sõngda nebã tɩ b bãng fãagrã sore.—Zã 17:3.
3 Tʋm-tʋmd a Poll gesame tɩ moonegã yaa “tʋʋm pakre,” bũmb a sẽn da segd n maan tɩlae. (1 Kor. 9:16, 17, Sebr Sõngo) Sã n yaa tɩlae, a ra sakame n na n maan modgr buud fãa, n na n tall sũ-mar makr buud fãa taoore, bɩ n sak toog buud fãa sẽn na yɩl n pids a tʋʋmdã. (Tʋʋ. 20:22-24) Tʋm-tʋmd a Pɩɛɛr ne a tũud-n-taasã me talla yam kãng buudu. Ne b sẽn kẽes b bãens roogẽ la b pãb-bã, “bãmb zãmsa neba la b moon a Zezi Kirist koe-noogã n ka bas ye.”—Tʋʋ. 5:40-42.
4 Yaa wãn to yẽ ne tõndo? Tõnd me ningda Rĩungã koe-noog mooneg la karen-biisã maaneg tʋʋmd pipi zĩigẽ bɩ? Wala a Zezi, neb nins sẽn yaa wa ‘piis sẽn ka tar kɩɩmã’ yell sɩd pak-d lame bɩ? (Mat. 9:36) Yɛl nins sẽn maand dũniyã pʋgẽ masã wã la Biiblã bãngr-goam wilgda vẽeneg tɩ zãmaan wẽng kãngã na n saa ka la bilfu! Tõnd sã n ning d yamẽ vẽeneg tɩ moonegã tʋʋmd tara yõodo, rẽ kɩtdame tɩ d ket n moond ne yẽesem.
5 Mag-y yãmb yɛlã sẽn yaa to-to wã n gese: Sẽn mik tɩ d meng yɛlã sẽn yaa to-to wã mii n wa toeemame wã, yɩtẽ-la sõma tɩ wakat-wakat bɩ d ges d sã n tõe n maana remsgo, n tõog n moon koe-noogã sõma n paase. Saam-bi-poak n yɩ wakat fãa so-pakd yʋʋmd 1950 wã ne yʋʋmd 1980 wã sʋka, la a laafɩ sẽn da ka leb n waoogã yĩngã, yɩɩ tɩlae t’a bas so-pakrã tʋʋmde. La a laafɩ wã wa n paasame. Sẽn pa kaoos pʋgẽ, a leb n maga a mengã yɛl n gese, n mik t’a tõe n leb n yɩɩ so-pakd yɛsa. Ad yɩɩ sũ-noog meng n kõ-a, a sẽn tõog n kẽng So-pakrã tʋʋmd lekoll a yʋʋm 90 zugã! Yaa wãn to ne yãmba? Yãmb kolga retrɛt bɩ, bɩ y kareng saab kolgame? Yãmb yɛlã sẽn toeema tõe n kõ-y-la sor tɩ y yɩ so-pakd bɩ?
6 A Zezi sẽn yã t’a Mart ‘ra maanda yɩɩr ne rɩɩb seglg la tʋʋm a taab maanegã,’ a sagl-a-la ne bʋgsem t’a sã n da maan bũmb a wãn bala, a ra paamdẽ-la bark sẽn yaa kãsems n yɩɩda. (Luk 10:40-42) Yãmb me tõe n maaname tɩ y vɩɩmã ra gĩd ne yɛl wʋsg bɩ? Rẽ yĩnga yaa tɩlae ne pagã ne a sɩdã fãa tɩ b tʋm bɩ? B sã n maan demsgo, zakã neb tõe n vɩɩmda ne yaood a ye bal bɩ? Neb wʋsg maana remsg woto sẽn na yɩl n tõog n yã sẽk n moon koe-noogã n paase, tɩ naf-b tẽebã wɛɛngẽ.
7 Bɩ tõnd fãa tũ makr ning a Zezi ne a tʋm-tʋmdbã sẽn basã! D tõe n kɩsa sɩd t’a Zeova na n barka modgr ning d sẽn maand ne d sũur fãa n kẽesd d mens Rĩungã koe-noog mooneg tʋʋmd pʋgẽ zãng wa d sẽn tõe tɛkã!—Luk 9:57-62.