Koe-moonegã yaa tõnd kiris-nebã tʋʋmd ning sẽn tar yõod n yɩɩdã
1 Tõnd fãa tara tʋʋm toɛy-toɛy n segd n maane. Wẽnnaam baoodame tɩ zak soab ges a zak neb yelle. (1 Tɩm. 5:8) La tʋʋm nins d sẽn segd n maan n tũ Wẽnnaam no-kãngã wã yõod ka segd n yɩɩg Rĩungã mooneg la karen-biisã maaneg tʋʋmd ye.—Mat. 24:14; 28:19, 20.
2 A Zezi kõo tõnd makr tɩ d tũ, ‘deng n bao Wẽnnaam Rĩungã’ wɛɛngẽ. (Mat. 6:33; 1 Pɩɛ. 2:21) Ba a sẽn da ka tar laog wʋsgã, a ra kẽesa a meng zãng-zãng a Ba wã raab maaneg pʋgẽ. (Luk 4:43; 9:58; Zã 4:34) A modgame n kõ kasetã wakat ning fãa a sẽn da tõe n maan dẽ. (Luk 23:43; 1 Tɩm. 6:13) A sagla a karen-biisã tɩ bãmb me tʋlg sõma n maan tigisgã tʋʋmde.—Mat. 9:37, 38.
3 D rɩk togs-n-taar ne a Zezi tõnd wakatã: D tõe n dɩka togs-n-taar ne a Zezi n tik d vɩɩmã kiris-neb tʋʋmdã zugu, n da gĩd-a ne yɛl wʋsg ye. D sã n paamdẽ tɩ sekd d noorã rɩɩbo, bɩ d kelg Biiblã saglg n da wa ket n tar dũniyã arzɛgs baoob n ka satẽ ye. (Mat. 6:19, 20; 1 Tɩm. 6:8) Sẽn são n yɩɩd yaa d sẽn na n bao n moon koe-noogã n paase. D sã n wa maood ne zu-loeese, bɩ d modg n maan wa a Zezi, n da bas tɩ vɩɩmã zu-loees wa tall pãng n yɩɩd Rĩungã koe-noog mooneg sẽn yaa tõnd tʋʋmd ning sẽn ya-a kãseng n yɩɩdã ye.—Luk 8:14; 9:59-62.
4 Baa sẽn tar-b tʋʋm wʋsgã meng getame tɩ moonegã tʋʋmd n tar yõod n yɩɩda. Saam-biig sẽn tar zag-kʋʋngo, taoor-sobend a tʋʋmdã zĩigẽ, la a yaa kiris-neb tigingã kãsem soab yetame: “Mam geta koe-moonegã wa mam tʋʋmd ning sẽn tar-a yõod n yɩɩdã.” Saam-bi-poak a yembr sẽn yaa so-pakd yeelame: “So-pakrã tʋʋmd yõod yɩɩda nug-tʋʋmd sẽn yaa sõma zĩig sẽn zãre.”
5 Baa d yɛlã sẽn yaa to-to fãa, bɩ d tũ a Zezi makrã. Wãn-wãn to? Ne d sẽn na n kɩtdẽ tɩ koe-moonegã tʋʋmd yaa tʋʋmd ning sẽn tar-a yõod n yɩɩdã.