D rɩk Kiristã togs-n-taar d koe-moonegã pʋgẽ
1 A Zezi kõo tõnd mak-sõng koɛɛgã mooneg pʋgẽ tɩ d segd n tũ. Naoor wʋsgo, a wilga ne manesem ka tɛk t’a nonga Wẽnnaam la nebã hal sõma. A zãmsa sik-n-mens rãmbã sɩdã, la a tʋm nonglem tʋʋm n sõng neb nins sẽn namsd la b sẽn wẽgd-b rãmbã.—Mat. 9:35.
2 A Zezi meng sẽn kõ makr ningã, ne a zãmsgã: A Zezi pa bas tɩ politik yɛl tiis-a, a leb n pa bao n maneg zãmaanã tɩ tiis a tʋʋmdã ye. A pa bas me tɩ bũmb ba a ye nebã sẽn tẽed tɩ tara yõod tiis a koe-moonegã sẽn yaa a tʋʋm kãsengã ye. (Luk 8:1) A kell n moona Wẽnnaam Rĩungã koɛɛg n wilg tɩ yaa Rĩungã n na n wa kɩt tɩ ninsaalbã zu-loees fãa sa fasɩ. A Zezi ra tara tʋʋm kãseng n na n tʋm t’a sẽka ra yaool n pa waoogẽ ye. Kapɛrnawom nebã sẽn da rat t’a pa be wã, a yeela a karen-biisã woto: “Wa-y tɩ d kẽng tẽn-kɩrems tɩ m tɩ moon koɛɛg beene me. Yaa rẽ yĩng la mam wa-yã.”—Mark 1:38.
3 A Zezi sẽn wilg a karen-biisã b sẽn segd n moon koɛɛgã to-to wã poore, a tʋm-b–lame la a sagl-b woto: “Bɩ y kẽng n moone n yeel tɩ [saasẽ] soolem kolgame.” (Mat. 10:7) A wilga a karen-biisã tɩ yaa Rĩungã la b segd n lʋɩɩs taoor b vɩɩmã pʋgẽ. (Mat. 6:33) Nand t’a Zezi rʋ saasẽ, a yaoolem goamã pʋgẽ a wilga a karen-biisã b sẽn da segd n maan bũmb ning vẽenega. A yeela woto: “Bɩ y kẽng n maan neba buud fãa tɩ b yɩ mam karen-biisi.”—Mat. 28:19.
4 Rĩungã sẽn na n wa ne nafa ninsi: Ra yaa Wẽnnaam Rĩungã yell la a Zezi ra gomd n yɩɩda, la a sagla a karen-biisã tɩ b rɩk a mak-n-taare. Baa ninsaalbã sẽn modgd to-to fãa b pa tõe n maaneg dũniyã yɛl fãa ye. (Zer. 10:23) Yaa Wẽnnaam Rĩungã bal n na n kɩt tɩ Wẽnnaam yʋʋrã paam pẽgr la a yols ãdem-biisã wakat fãa. (Mat. 6:9, 10) D sã n zãmsd “neb nins fãa sẽn wõosd n yãbd bõn-wẽns nins sẽn maandã” yĩng tɩ b bãng Rĩungã koɛɛga, na n sõng-b lame tɩ b vɩɩmã yɩ noog la b paam saagr hakɩkã beoog daar yĩngã.—Eze. 9:4.
5 A Zezi ket n kẽesda a meng Wẽnnaam Rĩungã koe-noog mooneg pʋgẽ hal wʋsgo, la a kõt-d-la bas-m-yam t’a na n sõng-d lame. (Mat. 28:20) Hal sẽn ta zĩ-bʋg la tõnd rɩkd a Zezi togs-n-taar koɛɛgã mooneg pʋgẽ? (1 Pɩɛ. 2:21) Tõnd sẽn vɩ yaoolem dayã pʋgẽ wã, bɩ d modg n maan d sẽn tõe fãa n tũ makr ning a Zezi sẽn kot-d koe-moonegã wɛɛngẽ wã!