Bũmb ning tõnd sẽn segd n lʋɩɩs taoorã
1. Wãn to la a Zezi wilg tɩ koɛɛgã mooneg tara yõod wʋsg ne-a?
1 Yaa koɛɛgã mooneg la a Zezi lʋɩɩs taoore. A kẽna nao kɩlometr kobse, n saag Palɛstin gill n moon neb wʋsg koe-noogã. Sẽn na yɩl n paam sẽk wʋsg n moon koɛɛgã, a pa bao bũmb wʋsg a vɩɩmã pʋgẽ ye. (Mat. 8:20) Neb kʋʋng sẽn wa n dat t’a kell n pa b nengẽ n maag bãad dãmbã, a yeel-b lame tɩ “yaa tɩlae tɩ mam moon Wẽnnaam soolem koe-noog tẽns a taab me; tɩ bõe, b tʋma maam bõn-kãng yĩnga.”—Luk 4:43.
2. Bõe yĩng tɩ koɛɛgã mooneg ra tar yõod wʋsg ne a Zezi?
2 Bõe yĩng tɩ koɛɛgã mooneg ra tar yõod wʋsg woto ne a Zezi? Bũmb ning sẽn da pak-a n yɩɩd yaa a Zeova yʋʋrã na paam waoogre. (Mat. 6:9) A sẽn da nong a saasẽ Ba wã yĩng kɩtame t’a ra rat n maan a raabã la a sak a noyã fãa. (Zã 14:31) Sẽn paase, nebã nimbãaneg sẽn da tar-a wã kɩtame t’a ra rat n sõng-ba.—Mat. 9:36, 37.
3. Wãn to la d tõe n wilg tɩ koɛɛgã mooneg n pak tõnd n yɩɩda?
3 D rɩk a Zezi togs-n-taare: A Zezi togs-n-taar rɩkr koɛɛgã mooneg wɛɛngẽ tõe n yɩɩ toogo, bala dũni kãngã yɛlã ne a yõ-noogrã rɩkda tõnd sẽkã wʋsgo. (Mat. 24:37-39; Luk 21:34) Woto yĩnga, d segd n bao n bãnga bũmb nins sẽn tar yõod n yɩɩdã, la d yãk wakat takɩ d sẽn na n segend koɛɛgã moonego, la wakat d sẽn na n yit n moondẽ. (Fil. 1:10) D modg n da bao bũmb wʋsg d vɩɩmã pʋgẽ, la d ra bao n na n dɩ dũniyã wʋsg ye.—1 Kor. 7:31.
4. Bõe yĩng tɩ yaa tɩlae tɩ d kell n lʋɩɩs koɛɛgã mooneg taoor masã?
4 Ned sã n tar yɛl wʋsg n segd n maane, a sã n tar yam a lʋɩɩsda sẽn tar yõod n yɩɩdã taoore. Wala makre, a sã n wʋm tɩ seb-kãseng n wate, a na n dɩka a sẽkã ne a pãngã n maan a sẽn na maaneg n kogl a zakã rãmba, la a keoog a yagsã. A na n basa tʋʋm nins sẽn pa tɩlae wã nanda. Wakat ning sẽn ket tɩ Armagedõ me ta wã lebga bilfu. (Sof. 1:14-16; 1 Kor. 7:29) Sẽn na yɩl n fãag d mens la neb nins sẽn kelgd tõndã, d segd n gũusa d mense, la d gũus ne koɛɛg ning d sẽn zãmsd nebã, yaa tigingã pʋgẽ tɩ pa tigingã pʋgẽ me. (1 Tɩm. 4:16) Vẽenega, tõnd sã n dat n põse, d segd n lʋɩɩsa koɛɛgã mooneg taoore.