“Maan-y weer dẽ yĩnga”
1 Vugri, a Zezi ra gomda ne a karen-biisã kãadem yell n yeel tɩ rakõt yaa ‘kũuni,’ la a paas tɩ “ned ning sẽn tõe n maan weer dẽ yĩng bɩ a maan weer dẽ yĩnga.” (Mat. 19:10-12, NW ) Yʋʋm a wãn loogr poore, tʋm-tʋmd a Poll gʋlsame n wilg tɩ rakõt bee nafa, la a sagl neb a taab tɩ b tũ yẽ makrã n da kẽ kãadem ye. (1 Kor. 7:7, 38, Sebr Sõngo) Rũndã-rũnda, neb wʋsg “maana weer” rakõt yĩng n dɩt a nafa. Nafa kãens kẽer la bʋse?
2 Wẽnnaam tʋʋmdã maaneg tɩ ‘gɩdgr kaẽ ye’: A Poll bãngame t’a rakõtã ra sõngd-a lame t’a tõe n maan a Zeova tʋʋmdã tɩ ‘gɩdgr kaẽ ye.’ Woto, rũndã-rũndã me saam-biig sẽn yaa rakõor tõe n baoome n kẽng Wẽnnaam tʋʋmdã zãmsg lekolle, sẽn paase, yaa nana n yɩɩd ne ned sẽn pa kẽ kãadem t’a yɩ so-pakda, t’a zãms buud-gomd a to, t’a yik n kẽng zĩig ning raab sẽn yaẽ kãseng n yɩɩdã, t’a tʋm Betɛllẽ, bɩ t’a sak n maan zu-noog tʋʋm a taaba. A tõeeme n paam sẽk la soay n yɩɩd sẽn na yɩl n maan a meng zãmsg la bʋgsg sõmã, la a pʋʋs a Zeova ne a sũur fãa. Naoor wʋsgo, ned sẽn pa kẽ kãadem tara sẽk n yɩɩd n tõe n sõng neb a taaba. Tʋʋm kãensã fãa yaa ra-kõorã “sõngr yĩnga.”—1 Kor. 7:32-35; Tʋʋ. 20:35.
3 Wẽnnaam tʋʋmdã maaneg woto tɩ gɩdgr kaẽ wã wata ne nafa wʋsgo. Saam-bi-poak sẽn pa kẽ kãadem sẽn maan yʋʋm 27 Kenya yeela woto: “Mam talla zo-rãmb wʋsgo, la tʋʋm wʋsg me! Tõnd naaga taab n maand yɛl wʋsg la d ra tʋgd n kaagd taab me. . . . M sẽn pa kẽ kãadmã kɩtame tɩ m da tar sẽk n yɩɩd n tõe n kẽng m sẽn datẽ, n tʋm wʋsg koe-moonegã pʋgẽ, la rẽ kõo maam sũ-no-kãsenga.” A paasame: “Yʋʋmã sẽn tall loogrã pʋgẽ, mam zems-n-taarã ne a Zeova wã pãng paasame.”
4 Maan-y weer dẽ yĩnga: A Zezi yeelame tɩ bũmb ning sẽn na n kɩt tɩ ned ra tʋlg n kẽ kãadem yaa ‘saasẽ Rĩungã yĩnga.’ (Mat. 19:12) Wala sẽn yaa to-to ne kũun buud fãa wã, b segd n tũnuga ne rakõtã sõma t’a tõog n wa ne sũ-noog la nafa. Neb wʋsg sẽn pa kẽ kãadem sẽn bao n dɩ b rakõtã nafa wã, la b teeg a Zeova n paam yam la pãngã, b wa n bãngame tɩ tara yõod tɩ b maan weer rakõtã yĩnga.