Kɩt-y tɩ neba bãng Wẽnnaam yʋʋrã
1. Wẽnnaam yʋ-peellã bãngr tara pãn-tusdg bʋg neba zutu?
1 Yãmb sẽn wʋm Wẽnnaam yʋʋrã pipi wã yãmb manesem yɩɩ wãn-wãna? Neb wʋsg maana wa pag a yembr sẽn yeel woto wã: “Mam sẽn yã Wẽnnaam yʋʋrã pipi Biiblã pʋgẽ wã m daaga nintãm. Mam sẽn da mi tɩ m tõe n bãngame la m pʋd Wẽnnaam yʋ-peellã meng nooga m sũur wʋsgo.” Pʋg-kãngã yãame tɩ Wẽnnaam yʋʋrã bãngr yɩɩ bõn-kãseng sẽn sõng-a t’a bãng a Zeova mengã sẽn ya a soaba, la a tall zems-n-taar ne-a.
2. Bõe yĩng tɩ yaa yãgb yell ne tõnd tɩ d zãms neb a taabã tɩ b bãng a Zeova?
2 Bõe yĩng tɩ d segd n kɩt tɩ neba bãng-a? Bãng Wẽnnaam yʋʋrã yaa bãng a zʋg-sõma wã, a raabã, la a tʋʋmã. D leb n segd n bãnga Wẽnnaam yʋʋrã sẽn na yɩl n paam fãagre. Tʋm-tʋmd a Poll gʋlsa woto: “Ned ninga fãa sẽn kot ne [a Zeova] yʋʋre, a na n paama fãagre.” La a paasame tɩ neba ‘na n yɩɩ wãn n pʋʋs ne a yʋʋr’ tɩ b ka reng n zãms n bãng a Zeova la b tẽ-a? Woto yĩnga, yaa yãgb yell tɩ kiris-nebã kɩt tɩ neb a taabã bãng Wẽnnaam yʋʋrã la a sẽn tɩ loe ne bũmb ningã. (Rom 10:13, 14) La bũmb a to sẽn tar yõod n yɩɩd meng n kɩt tɩ yaa tɩlae tɩ nebã bãng Wẽnnaam yʋʋrã.
3. Bũmb ning sẽn tar yõod n yɩɩd sẽn kɩt tɩ d moondẽ wã yaa bõe?
3 Yɩɩ yʋʋmd 1920 la yʋʋmd 1930 wã sʋka, la Wẽnnaam nin-buiidã tik Gʋlsg Sõamyã zug n bãng gomd ning sẽn pak ãndũniyã fãa wã, sẽn tɩ loe ne Wẽnnaam naam sẽn-ka-to wã zemsg la a yʋʋrã pekrã. Nanand t’a Zeova sãam nin-wẽnsã la a yiis taal ning b sẽn wa ne a yʋʋrã zugã, rẽndame “tɩ dũniyã fãa bãng” sɩdã Wẽnnaam zugu. (Ezai 12:4, 5; Eze. 38:23) Rẽ n so tɩ bũmb ning sẽn tar yõod n yɩɩd sẽn kɩt tɩ d moondẽ wã yaa sẽn na yɩl n pẽg a Zeova la d pek a yʋʋrã ãdem-biisã fãa taoore. (Heb. 13:15) Tõnd sẽn nong Wẽnnaam la d taabã yĩng na n kɩtame tɩ d kẽes d mens zãng-zãng tʋʋm-kãng Wẽnnaam sẽn kõ sor tɩ d maanã pʋgẽ.
4. Wãn-wãn la neba wa n tõog n bãngd a Zeova Kaset rãmbã ne Wẽnnaam yʋʋrã maasem?
4 ‘Wẽnnaam tũusa neb a yʋʋra yĩnga’: Yʋʋmd 1931, tõnd saka yʋʋr ning sẽn ya a Zeova Kaset rãmbã. (Ezai 43:10, NW ) Sẽn sɩng wakat kãng tɛka, Wẽnnaam nin-buiidã kɩtame tɩ nebã bãng Wẽnnaam yʋʋrã wʋsg hal tɩ Prédicateurs sebrã yeel woto, a seb-neng 124 pʋgẽ: “Dũniyã gill zugu, ned ning fãa sẽn pʋt a Zeova yʋʋrã wʋsgo, tao-tao bala neba miimi t’a ya a Zeova Kaset soaba.” Yaa woto la b bãngd tɩ yãmb me ya a Zeova Kaset soab bɩ? D sẽn tar mi-beoog ne a Zeova a sõmblmã yĩngã segd n kɩtame tɩ d ‘waoog a yʋʋrã,’ n gomd a yell wakat sẽn zems fãa sasa.—Yɩɩl 20:8; 145:1, 2, 7.
5. D sẽn zãad Wẽnnaam yʋʋrã, tõnd manesmã segd n yɩɩ wãn-wãna?
5 Tõnd sẽn yaa ‘neb a yʋʋrã yĩngã,’ d tog n saka a noyã. (Tʋʋ. 15:14; 2 Tɩm. 2:19) Naoor wʋsgo, bũmb ning neba sẽn dengd n yã n bãng a Zeova Kaset rãmbã n bakã yaa b manesem sõma wã. (1 Pɩɛ. 2:12) D ka na n tʋlg abada n sãam a Zeova yʋʋrã, ne d sẽn na n kɩɩsd a noyã bɩ n lebsd a balengã poorẽ d vɩɩmã pʋgẽ ye. (Maan. 22:31, 32; Mal. 1:6-8, 12-14) Sẽn yaa lebend ne rẽ, bɩ tõnd vɩɩmã wilg tɩ d nanda zu-noog ning d sẽn tar n zãad Wẽnnaam yʋʋrã.
6. Zu-no-bʋg la d tõe n paam masã la wakat sẽn ka sɛt yĩnga?
6 Rũndã-rũndã d neeme t’a Zeova sẽn yeel tɩ sẽn sɩng ne wĩndg pukr n tɩ ta a lʋɩɩsã ‘yẽ yʋʋrã yaa kãseng buud a taabã sʋkã’ paamda pidsgu. (Mal. 1:11) Bɩ d ket n kɩtdẽ tɩ nebã bãngd sɩdã a Zeova wɛɛngẽ, la d ‘kõt a yʋ-sõnga waoogr wakat sẽn ka sɛt abada.’—Yɩɩl 145:21.