D bao n yɩ a Zeova zo-nongre
1. Bõe la saam-bi-poak a ye wa n baas n mik a tẽebã raasenkam yɛla wɛɛngẽ?
1 Kiris-nin-poak a yembr yeelame: “Mam sẽn be sɩdã pʋgẽ sẽn na maan yʋʋm pisi wã, m da kẽnda tigissã la m moond koe-noogã bala.” La a paasame: “Mam wa n baas n mikame tɩ baa bõn-kãensã maaneg sẽn tar yõodã, yɛlã sã n wa sɩng kengre, rẽ ka sek sẽn na yɩl n sõng-m tɩ m ket n kẽngd taoor ye. . . . Mam yãame masã tɩ m segd n demsa m tagsgã la m sɩng zãmsg sõmã-sõma sẽn na yɩl n wa tõog n sɩd bãng a Zeova, n nong-a la m tall mi-beoog ne-a bũmb ning a Biriblã sẽn kõ-dã yĩnga.”
2. Bõe yĩng tɩ tar yõod tɩ d bao n yɩ a Zeova zo-nongre?
2 Tall zems-n-taar sẽn tar pãng ne a Zeova wã baooda modgre. Kiris-neb tʋʋm na-kẽndr tũub bal ka sek ye. Tõnd sã n ka pʋʋsd a Zeova wakat fãa, a wat n baas n lebga wala d zo-nongr d sẽn da tar pĩnda, tɩ masã bɩ d ka leb n tar taab kɩbay ye. (Wil. 2:4) Bɩ d ges meng Biibl zãmsgã la pʋʋsgã sẽn tõe n sõng tõnd tɩ d yɩ a Zeova zo-nongr to-to.—Yɩɩl 25:14.
3. Yaa d sẽn na n maand meng zãmsgã wãn-wãn to la rẽ tõe n sõng-d tɩ d pẽneg Wẽnnaam n paase?
3 Pʋʋsgã la bʋgsgã tara yõod wʋsgo: Meng zãmsg sẽn kẽed sũur pa d sẽn na n dẽesd tags-yẽgã zãmsgã pʋgẽ la d gẽesd verse rãmbã b sẽn ning be wã bal ye. A baoodame tɩ d bʋgs zãmsgã sẽn vẽnegd bũmb ning a Zeova soayã, a noyã, la a zʋg-sõma wã zutu. (Yik. 33:13) D sã n wʋm tẽebã yɛl võore, rẽ kẽeda tõnd sũurã n kɩtdẽ tɩ d tagsd tõnd mengã vɩɩm sẽn yaa to-to wã zugu. (Yɩɩl 119:35, 111) D segd n maanda d meng zãmsgã sẽn na yɩl n pẽneg a Zeova n paase. (Zak 4:8) D sã n dat n zãms neere, rẽnda d bao sẽk la zĩig sẽn zems rẽ yĩnga, sẽn paase, zãmsgã maaneg wakat fãa wã baoodame tɩ d kibl d mense. (Dan. 6:11) Baa yãmb vɩɩmã sã n pida ne tʋʋma, rẽ yĩnga yãmb yãkda sẽk daar fãa n bʋgsd a Zeova zʋg-sõma wã sẽn yaa kãsemsã zut bɩ?—Yɩɩl 119:147, 148; 143:5.
4. Wãn to la pʋʋs n yaool n sɩng meng zãmsgã sõngd tõnd tɩ d paas d zoodã ne a Zeova?
4 Pʋʋsg sẽn maan ne pʋ-peelem sõngda tõnd sõma tɩ d maan meng zãmsg sẽn tar yõodo. Rẽnda d paam Wẽnnaam vʋʋsem sõngã sõngre, sẽn na yɩl tɩ Biiblã zãmsg kẽ tõnd sũyã n kɩt tɩ d “sak Wẽnnaam n ta [a] yam ne waoogre la gũus-m-menga.” (Heb. 12:28) Rẽ n so tɩ d sã n na n sɩng zãmsg fãa bɩ d segd n pʋʋs n kos a Zeova vʋʋsem sõngã. (Mat. 5:3) Tõnd sã n bʋgsd Gʋlsg Sõamyã zug la d tʋmd ne zãmsg sɛb nins a Zeova siglgã sẽn kõ-dã, d pakda d sũurã a Zeovataoore. (Yɩɩl 62:8) D sã n maand zãmsgã woto, d balemda a Zeova, tɩ ne baleng-kãng maasem bɩ d wilgd d wẽn-zoeere. Sẽn paase, rẽ leb n kengda tõnd zems-n-taarã ne a Zeova wã pãnga.—Ziid 20, 21.
5. Bõe yĩng tɩ tar yõod wʋsg ne-d tɩ d bʋgs Wẽnnaam Gomdã zug daar fãa?
5 Wala sẽn yaa to-to ne zood buud fãa wã, d segd n ket n bɩɩsda d zoodã ne a Zeova sẽn na yɩl t’a pãngã ket n paasd tõnd vɩɩmã fãa pʋgẽ. Woto yĩnga, bɩ d bao sẽk daar fãa n pẽneg Wẽnnaam, n miẽ tɩ yẽ me na n pẽnega tõndo.—Yɩɩl 1:2, 3; Ef. 5:15, 16.