Tẽeb rɩɩbo, wakat sẽn zemse
1. Wãn to la Ezekɩɛll 36:29 paamd pidsd tõnd wakatã?
1 Soaal sẽn ka to a Zeova yeelame: “M na n kɩtame tɩ y ki yɩ wʋsg tɩ kom da le zĩnd y tẽnga pʋgẽ ye.” (Eze. 36:29) Bãngr-gom-kãensã paamda pidsg Wẽnnaam nin-buiidã zug rũndã-rũndã. Makr wɛɛngẽ, a Zeova kɩtame tɩ kood sẽn dɩlgd ned sõma yi wʋsg a nin-buiidã yĩnga. Tẽeb rɩɩb sẽn zems a wakatã b sẽn na n kõ-d tigims gĩn sul tigis-kãsemsẽ wã na n wilga rẽ vẽenega.
2. Wãn-wãn la a Zeova tũnug ne tigims gĩn sul tigis-kãsemsã n kõ tẽeb rɩɩb wakat sẽn zemse?
2 Tigis-kãseng ning b sẽn maan Kolõmbus, sẽn be Ohio Etazĩni pʋgẽ wã yʋʋmd 1931 wã sasa, a Zeova wilga a balemdbã sor tɩ b sak yʋʋr ning sẽn ya a Zeova Kaset rãmbã. (Ezai 43:10-12, NW ) Yʋʋmd 1935 wã, b wilga kʋʋn-kãseng ning yell b sẽn gomd Wilgri 7:9-17 pʋgẽ wã võor neere. Yʋʋmd 1942 wã, saam-biig a Knorr kõo diskuur gom-zug sẽn yɩ: “Laafɩ wã tõe n kaoosame bɩ?” Sõs-kãngã kɩtame tɩ b wɩng ne moonegã tʋʋmd zĩig fãa, la rẽ me n wa n kɩt tɩ b lugl Gileaad lekollã. Baa tigis-kãens kẽer sẽn yɩ tigis-kãsems sẽn pa neb wʋsg pʋtẽerẽ wã, tigis-kãsemsã fãa sasa, b kõo tẽeb rɩɩb sẽn dɩlgd ned sõma tẽebã wɛɛngẽ wakat sẽn zemse.—Yɩɩl 23:5; Mat. 24:45.
3. Bõe la d tog n maan n dɩ tẽeb kibsã tõnd tigims gĩn sull tigis-kãsemsẽ wã nafa?
3 Yãmb rɩlgda y meng sõma bɩ? Ned tõe n tara rɩɩb wʋsg n yaool n pa rɩlgd a meng sõma, a sã n ka maand modgr n dɩtẽ ye. (Yel. 26:15, Sebr Sõngo) Tẽebã wɛɛngẽ me yaa woto. B yãa tigis-kãsems kẽer sasa tɩ kɛlgdb wʋsg kẽnd n yuusd yaar woto bala, bɩ b sõsd ne neb a taab sõssã wɛgsg wakate. Yaa sɩd tɩ tũud-n-taar sẽn kengd tẽeb yaa tigis-kãsengã bõn-kãseng a yembre, la wakat ning b sẽn segd maan dẽ wã yaa sẽn deng tigim-taab fãa sɩngr la a poore. (Koɛ. 3:1, 7) Tõnd sã n pa be d zĩigẽ n kelgd neere, wakat ninga zãmsg sẽn tar yõod wʋsg la d ka na n wʋme. Wakat-wakate, tigis-kãsengã tʋʋmd sul taoor dãmb la neb a taab b sẽn kõ tʋʋm tõeeme n mik tɩ yaa tɩlae tɩ b gom ne taab n welg yɛl kẽer sõssã wakate. Sã n pa rẽ, nin-kãens me segd n kõo mak-sõng n be b zĩisẽ n kelgd sõssã neere. Tõnd ned ba a yembr ka segd n kong tẽebã rɩɩb b sẽn kõtã ye.—1 Kor. 10:12; Fil. 2:12.
4. Wãn-wãn la d tõe n wilg tɩ d tara mi-beoogo, tẽebã rɩɩb a Zeova sẽn kõt wʋsgã yĩnga?
4 Ad d sɩd maanda sũ-noog ne tẽebã rɩɩb a Zeova sẽn kõt wʋsgã, sẽn yaa toor ne kiris-neb ne yʋʋr siglsã ziri zãmsgã sẽn pa rɩlgd neb sõma wã! (Ezai 65:13, 14) Bũmb a yembr d sẽn tõe n maan n wilg tɩ d yaa ‘neb sẽn mi beoog’ yaa d sẽn na n get tigis-kãsemsã wa bũmb a Zeova sẽn tũnugd ne n zãmsd tõndo. (Kol. 3:15) Ra tik-y y yamã sõasdã zug ye, kelgd-y a sẽn yet bũmb ningã, n get-a wala koɛɛg sẽn yit tõnd ‘Karensaam Kãsengã’ nengẽ. (Ezai 30:20, 21; 54:13) Kelg-y neere. Gʋlsd-y tagsa wã koɛɛg-koɛɛga. Zaabr fãa bɩ y lebg n ges tigis-kãsengã sõss tags-kãsemse. Tũ-y y sẽn zãms bũmb ningã.
5. Bõe la d paamd tigims gĩn sul tigis-kãsemsẽ wã tɩ kɩt tɩ d tõe n maan sũ-noogo?
5 Nand tɩ Armagedõ wa, tigis-kãseng fãa d sẽn tõog n maane, yaa refizie rãmb sik zĩigẽ, tẽng zabr sẽn beẽ tɩ yaa zĩig bãan sẽn beẽ me, yaa tõogr a Sʋɩtãan zugu. D sẽn yaa saam-biis sẽn be lagem-n-taar pʋgẽ wã yĩngã, d sũyã nooma d sẽn tõe n naag taab n kẽng tigims gĩn sul tigis-kãsemsẽ wã. (Eze. 36:38) D tara bas-yard tɩ ne nonglem, a Zeova na n leb n kõ-d-la “rɩɩb wakat fãa sẽn zemse.”—Luk 12:42, Kãab-paalgã Koe-noogo.
[Zĩ-gũbri, seb-neng a 6]
Tall-y mi-beoogo, rɩɩb ning a Zeova sẽn kõtã yĩnga
◼ Kelg-y neere
◼ Gʋlsd-y tags-kãsemsã
◼ Lebg-y n ges sõssã tags-kãsems zaabr fãa
◼ Tũ-y y sẽn zãms bũmb ningã