Yɩ-y neb sẽn mi beoogo

¹ Baa ne tõnd sẽn vɩ ‘tood wakatã,’ yɛl wʋsg n kɩt tɩ d segd n tall mi-beoog ne a Zeova. (2 Tɩm. 3:1) Pipi, ya a sẽn kõ a biriblã tõnd yĩngã. (Zã 3:16) Sẽn paase, tõnd tara tẽeb rɩɩb wʋsgo, la sẽn be-b ziri tũudmã pʋgẽ wã kiida kom tẽebã wɛɛngẽ. (Ezai 65:13) Tõnd bee dũni gill saam-biis sʋka, n tar zu-noog n na n naag n sõng tɩ baleng hakɩkã kẽng taoore. (Ezai 2:3, 4; 60:4-10, 22) Wãn to la d tõe n tall mi-beoog ne a Zeova, a sẽn ning-d bark wʋsgã yĩnga?—Kol. 3:15, 17.

² D tʋm Wẽnnaam tʋʋmã ne d sũur fãa la ne sũ-noogo: Tʋm-tʋmd a Poll sẽn da wa n gomd kũunã yellã, a gʋlsa woto: “Wẽnnaam nonga ned ninga sẽn kõt ne sũ-noogo.” (2 Kor. 9:7) Sagl-kãngã tara yõod Wẽnnaam tʋʋma pʋgẽ me. D wilgdame tɩ d yaa neb sẽn mi beoogo, d sã n tar yẽesem sɩdã pʋgẽ, sũ-noog d tigissã wakate, yẽesem koe-moonegã pʋgẽ, la sũ-noog Wẽnnaam daabã maaneg pʋgẽ.—Yɩɩl 107:21, 22; 119:14; 122:1; Rom 12:8, 11.

³ Tẽn-kʋdem wẽndẽ Israɛllã pʋgẽ, Tõogã ra ka yãk kũunã waooglem sẽn segd n yɩ to-to takɩ maand kẽer wɛɛngẽ ye. Wẽnnaam balemd fãa ra tõe n wilga a mi-beoogo, n wa ne kũun “sẽn zems bark ninga Zusoab a Wẽnnaam” sẽn kõ yẽnda wã. (Tõo. 16:16, 17) Rũndã-rũndã me, tõnd sũurã sã n pida ne mi-beoogo, rẽ na n kɩtame tɩ d tʋll n maan wa d sẽn tõe tɛk n moon Rĩungã la d maan karen-biisi. Vakãas rãmbã wakate, d tõe n paama segb n paas n wilg d mi-beoogo. Koe-moondb kẽer tũnugda ne rẽ n dɩkd sẽk n paasd koe-moonegã pʋgẽ, n dɩkd sõngr so-pakrã menga. Rẽ yĩngã y tõe n moona koe-noogã n paas y vakãas rãmbã wakat bɩ?

⁴ D pʋʋs bark wʋsgo: Bõn-kãseng d sẽn tõe n maan n wilg a Zeova d mi-beoog yaa d sẽn na n pʋʋs-a bark d pʋʋsgã pʋgẽ. (1 Tes. 5:17, 18) Wẽnnaam Gomdã sagenda tõnd tɩ d “pʋʋs bark wʋsgo.” (Kol. 2:7) Baa d sã n tar tʋʋm wʋsg bɩ d sã n bee yɩɩr pʋgẽ, daar fãa d segd n pʋʋsa a Zeova bark d pʋʋsgã pʋgẽ. (Fil. 4:6) Sɩda, ne koe-moonegã la pʋʋsgã maasem, d tõe n kɩtame tɩ “Wẽnnaam bark pʋʋsg lebg wʋsgo.”—2 Kor. 9:12.