Kɩbar sẽn na n sõng nebã

Kiris-neb hakɩkã taasda neba koe-noogã. (Fil. 2:17) Sẽn na yɩl n tõog n maan dẽ, b ninga sɛb sẽn tar zãms-yẽg Ẽntɛrnetã pʋgẽ, wala seb-bi, seb-vãado la sɛb sẽn tar zãmsg toɛy-toɛy buud-goam 20 pʋsẽ. Ẽntɛrnetã adɛrs ning zĩigẽ b sẽn tõe yã rẽ wã la woto: www.watchtower.org. B ka maan Ẽntɛrnet adɛrs kãngã sẽn na yɩl n taas tõnd yaoolem sɛbã a Zeova Kaset rãmbã ye. A bõn-datlã yaa tõog n kõ nebã kɩbay sẽn yaa takɩ Biiblã zãmsg ning a Zeova Kaset rãmbã sẽn taasd nebã zugu.

Sẽn pa kaoos pʋgẽ, d paasa sebr sẽn tar yõod wʋsg tõnd Ẽntɛrnetã adɛrs pʋgẽ. Yaa seb-bil ning gom-zug sẽn yaa: Bõe la Wẽnnaam baood tɩ tõnd maane? B yiis-a-la buud-goam 220 pʋsẽ. Sẽn paase, sẽn sɩng ne yʋʋmd 2004, yʋʋm-vẽkr kiuug 1 daar Gũusg Gasgã la yʋʋm-vẽkr kiuug rasem a 8 Réveillez-vous ! wã, buud-goama fãa pʋgẽ b ningda Sosiete wã Ẽntɛrnet adɛrs zʋrno kãens poɛya.

Wãn to la y tõe n tall adɛrs kãngã n tʋme? Be neere, y tõeeme n seg ned sẽn wõnd a rat n bãnga koɛɛgã n paase, n yaool n gomd buud-gom-zẽng bala. Sã n mik t’a soabã tõe n paka Ẽntɛrnetã, y tõe n wilg-a-la Ẽntɛrnetã adɛrs sẽn be Gũusgã Gasgã bɩ Réveillez-vous ! wã poorã. A sã n ges Ẽntɛrnetã pʋgẽ, a na n tõog n karma Baood seb-bilã a buudã gomd pʋgẽ, hal tɩ y wa lebg n kẽng a nengẽ ne sɛb a mengã buud gomdã pʋgẽ. Y leb n tõeeme me n kɩs nedã yʋʋr la a adɛrs tiging bɩ sull a to sẽn get buud-gom-kãng yelle.