Tall-y so-pakrã yam
1. Tall so-pakrã yam rat n yeelame tɩ bõe?
1 B tõe n yɩɩ so-pakdb tɩ b ka tõe n yɩ-a masã me, Rĩungã koe-moondb fãa tõe n talla so-pakrã yam. B fãa sɩd ratame n sak noor ning sẽn yet tɩ b moon la b maan karen-biisã. (Mat. 28:19, 20; Tʋʋ. 18:5) B tagsda neba yell n modgdẽ sẽn na yɩl n maan b tʋʋmdã. (Mat. 9:36; Tʋʋ. 20:24) A Zeova sõgen dãmbã sakame n na n maan bũmb ning fãa b sẽn segd n maanã, n sõng neb a taabã tɩ b bãng sɩdã. (1 Kor. 9:19-23) D rɩk makr ne koe-moond a Filip sẽn yɩ ned sẽn tall yam a woto buudã.
2. Wãn to la kãsem dãmbã la kãsemb sõngdbã tõe n togs a Filip n tall yẽesem koe-moonegã pʋgẽ?
2 Moonegã la nebã zãmsgo: A Filip paama zɩɩb kãsems pipi kiris-neb tigingã pʋgẽ. (Tʋʋ. 6:1-6) La a sẽn da maand bũmb ning n yɩɩd yaa koe-noogã moonego. (Tʋʋ. 8:40) Dẽnd rũndã-rũndã, baa kãsem dãmbã ne kãsemb sõngdbã sẽn get zɩɩb nins b sẽn tarã yellã, b tõe n talla so-pakrã yam n lʋɩt taoor koe-moonegã pʋgẽ ne yẽesem. Ad woto sɩd kengda tigingã neb raood wʋsgo!—Rom 12:11.
3. D sã n wa segd makre, wãn-wãn la d tõe n tall so-pakrã yam?
3 A Etɩɛn kũumã poore, kiris-nebã paama namsg wʋsg zĩig pʋgẽ b tẽebã yĩnga, tɩ rẽ wa ne tiisg wʋsg karen-biisã vɩɩm pʋgẽ. La a Filip ra ket n moondame, la yaa yẽ maasem yĩng la koɛɛgã sɩng mooneg Samari nebã sʋka. (Tʋʋ. 8:1, 4-6, 12, 14-17) Tõnd me tõe n dɩka togs-n-taar ne yẽ n ket n moond koe-noogã baa d segd makre, la d moond neb nins fãa d sẽn yãtã n ka bakdẽ ye.—Zã 4:9.
4. Nebã zãmsg wɛɛngẽ, mak-bʋg la a Filip kõ-yã?
4 Etiopi balem naabã tuubg kɩbarã wilgdame t’a Filip yaa ned sẽn mi Wẽnnaam Gomdã rɩk n zãms neda. (Tʋʋ. 8:26-38) Bũmb d sẽn leb n tõe n maan n tall so-pakrã yam yaa d sẽn na n bao n bãng Biiblã tall-n-tʋm la d bãng n ‘sõs ne nebã Gʋlsg Sõamyã koɛɛg’ zug sõma. (Tʋʋ. 17:2, 3) Wala a Filipi, d baoodame n na n moon koe-noogã zĩig ning fãa d sẽn tõe n yã neba, la segb sẽn zems fãa sasa.
5. Bõe n tõe n sõng roagdb sẽn yaa kiris-neb tɩ b kɩt tɩ b kambã tall so-pakrã yam?
5 Zakã la tigingã pʋgẽ: Sãmbg sẽn ka be, yaa yam ning a Filip sẽn tallã la a mak-sõngã n kɩt t’a kompugli wã tall yẽesem koe-moonegã pʋgẽ. (Tʋʋ. 21:9) Woto, roagdb nins sẽn yaa kiris-nebã me sã n tikd b vɩɩmã Rĩungã yɛl zutu, sõngda b kambã me tɩ b maan woto. Baa roagd sẽn mi n tʋm n yɛ semenã pʋgẽ wã, a sã n ket n moond neb a taabã ne yẽesem, rẽ tõe n talla pãn-tusdg sẽn kaoosd biig zugu.—Yel. 22:6.
6. Wãn to la d tõe n wilg tɩ d nanda so-pakdbã sẽn be tõnd tigingã pʋgẽ wã?
6 A Filip reega a Poll ne a Luk sẽn da yaa kiris-neb sẽn tar yẽesem n modgd wʋsg a Zeova tʋʋmdã pʋgẽ wã sãando. (Tʋʋ. 21:8, 10) Wãn-wãn la d tõe n wilg tɩ d nandame la d teend koe-moondb nins sẽn tar yẽesmã rũndã-rũndã? D tõeeme n kos n moon ne so-pakdbã yibeoog bɩ wĩnd-kaoore, daar ninga neb wʋsg sẽn pa yit moonegã. (Fil. 2:4) D leb n tõe n bool-b-la d yir n sõs ne-b sõasg sẽn kengd tẽebo. Baa tõnd yɛlã sẽn yaa to-to fãa, bɩ d modg n tall so-pakrã yam.