D tog n saka a Zeova zu-sobendã

Yãmb sã n wʋm pĩnd neb yʋya, wala a Koore, a Datã la a Abiram, yaa bõe yell la y tagsda? Yaa kɩɩsg yelle. Yɩɩ bõe la b kɩɩs-yã? Yɩɩ Wẽnnaam zu-sobendã. B togsa yɛl nins fãa sẽn tɩ loe ne b manesem wẽngã Sõdb sebrã sak 16 pʋgẽ. Sẽn paase b kʋmsa yellã fãa sõasg ning gom-zug sẽn yaa “Sak-Y Wẽnnaam Zu-sobendã Wakat Fãa” wã sẽn be yʋʋmd 2002, sa-sik kiuug pipi daar Gũusg Gasgã pʋgẽ wã. Y na n yãame tɩ tara yõod wʋsg tɩ y karem sõs-kãensã, tɩ rẽ poor bɩ y ges Respectons l’autorité de Jéhovah video wã n bãng b sẽn bilg kɩɩs-kãngã ne manesem sẽn kɩtd tɩ ned tags to-to. Y na n yãa mo-yõsr ning sẽn zĩnd a Koore komdibli nins sẽn yɩ wẽn-sakdbã ne b ba-tõatã sẽn kɩɩs ãndũniyã Naab sẽn ka to wã sʋkã. (Sõd. 26:9-11) Darm kãngã sẽn wilgd yɛl sẽn sɩd zĩndã segd n kɩtame tɩ d fãa tʋlg n sak a Zeova wakat fãa n paase.

Y sã n wa get video wã bɩ y bao n bãng kaset sẽn wilgd t’a Koore ne tõatb a taabã ka tall kɩs-sɩd ne a Zeova zĩ-kãsems a yoob pʋsẽ ye: 1) Wãn to la b kɩɩs Wẽnnaam zu-sobendã? 2) Wãn-wãn la b bas tɩ wuk-m-menga, mag-bɛda, la sũ-kiir tõog-ba? 3) Wãn to la b tik b yamã neb nins a Zeova sẽn yãkã pãn-komsem zugu? 4) Yẽgeng manesem bʋg la b tall-yã? 5) Bõe yĩng tɩ zu-nood tʋʋm nins b sẽn da tarã ra wa ka leb n tat b yam? 6) Wãn-wãn la b bas tɩ roagdb la zo-rãmb sakr deeg Wẽnnaam sakrã zĩiga?

D ges bũmb nins darm kãngã sẽn tik Biiblã zugã sẽn zãmsd tõndã sẽn tõe n sõng-d to-to tɩ d tall tagsg sẽn zems Wẽnnaam zu-sobendã zug rũndã-rũndã: 1) Tõnd manesem yaa wãn-wãn ne sard nins kãsem dãmbã sẽn dɩkd tigingã pʋgẽ wã, la bõe yĩnga? 2) D na n maana wãn n tõog tõnd mensã tʋls-wẽnse? 3) Tõnd segd n talla manesem bʋg ne neb nins b sẽn yãk tɩ b lʋɩ taoorã pãn-komsem? 4) Bõe la d segd n maane, yẽgeng yam sã n sɩng bulb tõnd sũurẽ wã? 5) Tõnd tagsg segd n yɩɩ bõe ne zu-noog buud fãa b sẽn kõ-d tigingã pʋgẽ? 6) Ãnda rãmb sakr n ka segd abada n deeg Wẽnnaam sakrã zĩiga, la wakat bʋg la rẽ tõe n sɩd yɩ mak-kãseng n kõ-do?

Yãmb sã n sõs sogs-kãensã zug tigingã pʋgẽ n sa, bõe yĩng tɩ y pa na n leb n ges video wã yɛsa? Modg-y n tall-y bũmb nins sẽn kɩt tɩ d tog n sak a Zeova zu-sobendã wakat fãa wã y pʋtẽerẽ sõma n paase.—Yɩɩl 18:26; 37:28.