Wãn-wãn la y na n kõ y roagdbã kasetã?

1. Bõe yĩng tɩ d segd n tags tɩ bɩ, d sã n wa kõt d roagdbã kasetã?

¹ Ad bũmb kae n kõt sũ-noog n yɩɩd d sẽn na n kẽ dũni paalgã pʋgẽ ne d roagdbã, n lagem ne-b n balemd a Zeova ye! Yaa tõnd sẽn na n kõt d roagdbã kasetã la d tõe n saag tɩ wa yɩ woto. La sẽn na yɩl n tõog n maan dẽ ne manesem sẽn be yamleoogo, rẽnda d tags tɩ bɩ sõma. Tigims gĩnd yel-gɛt yeelame: “B rãmb nins sẽn tõogd n wom biis sõma n yɩɩdã yaa Kaset rãmb nins sẽn kɩtd tɩ b roagdbã tʋlg n bãng sɩdã, b sẽn kõt-b kasetã bilf-bilf n paasdẽ wã yĩnga.” Wãn to la d tõe n maan dẽ?

2. Wãn to la tõnd sẽn na n wilg ne pʋ-peelem tɩ d roagdbã yell pak-d lame na n sõng-d tɩ d kɩt tɩ b tʋlg n bãng sɩdã?

² Kɩt-y tɩ b tʋlg n bãnge: Maag-y y yĩng n deng n tags y sẽn tõe n maan to-to n kɩt tɩ y roagdbã tʋlg n bãng sɩdã. (Yel. 15:28) Yaa bõe yell n pak-ba? B tara zu-loe-bʋse? Y tõeeme n wilg zʋrnall sõasg tagsa bɩ verse sẽn be yamleoog sẽn tɩ loe ne yell sẽn pak-b n yɩɩda. Y roagdbã sẽn beẽ wã sã n zãra ne yãmba, y tõe n gʋlsa lɛtr bɩ y telefõn n maan dẽ. Ra tar-y-b mooneg bal n ka satẽ ye, bʋd-y sɩdã bõn-buud la y teeg a Zeova t’a kɩt tɩ bõn-buud kãens bɩ.—1 Kor. 3:6.

3. Wãn-wãn la tõnd nebã sẽn dat n bãng tõnd sẽn maandã kõt-d sor tɩ d tõe n kõ-b kasetã?

³ A Zezi kõo rao a sẽn da rig zĩn dãmb wʋsg a nengẽ noor woto: “Kuili f meng nebẽ n togs bãmb bũmb ninga fãa Zusoaba sẽn maan foomã, la bãmb sẽn yɩ wãn n zoe fo nimbãanegã.” (Mark 5:19) Mams-y n ges rẽ sẽn kɩt tɩ rao wã roagdb tall sũ-noog ningã! Baa yãmb sẽn pa vɩɩmd bõn-kãseng a woto buudã, tõeeme tɩ yãmb nebã baood n na n bãnga yãmb bɩ y kambã sẽn maand bũmb ningã. Y sã n gom ne-b sõasg y sẽn maan Wẽnnaam tʋʋmdã lekollẽ, tigis-kãseng y sẽn kẽnge, Betɛllã zak y sẽn tɩ gese, bɩ yel-pa-yĩmdg sẽn maan y vɩɩmã pʋgẽ yelle, tõe n paka sor n kõ-y tɩ y togs-b bũmb n paas a Zeova la a siglgã wɛɛngẽ.

4. Y sã n wa kõt y roagdbã kasetã, y segd n gũusame n da lʋɩ bẽd-bʋs pʋsẽ?

⁴ Yɩ-y tags-tɩ-bɩ soaba: Y sã n wa kõt y roagdbã kasetã, ra bao-y n na n togs-b bũmba fãa vugr ye. Saam-biig a ye tẽega woto a sẽn da wa n sɩng Biiblã zãmsg wakatã wɛɛngẽ: “Mam dɩka lɛɛr dãmb n togs m ma bũmb ning fãa mam sẽn zãms Biiblã pʋgẽ wã la bala, la naoor wʋsgo rẽ baasa ne no-koeemde, sẽn yɩɩd fãa ne m baaba.” Baa d roagd sã n wilg t’a rat n bãnga Biiblã koɛɛga, bɩ y leok ne manesem sẽn na n kɩt t’a tʋlg n bãng n paase. (Yel. 25:7) Wakat fãa bɩ y tall waoogre, sõmblem, la sũ-mare, wala y sẽn da na n maan to-to ne neb y sẽn ka mi, y sã n moond koe-noogã.—Kol. 4:6.

5. Tõnd sã n kõ d roagdbã kaset tɩ b pa reege, bõe la d segd n maane?

⁵ Wakat n zĩnd meng t’a Zezi roagdbã tags t’a zugã lebgame. (Mark 3:21) La kaoosg zugẽ, bãmb kẽer lebga tẽedba. (Tʋʋ. 1:14) Baa sɩngrẽ wã, b sã n ka sak n na n deeg yãmb sẽn yetã, bɩ y ra koms raood n bas ye. Y nebã yɛl bɩ b tagsg tõe n toeemame. Ket-y n baood-y sor a to sẽn na yɩl n togs bũmb sẽn na n kɩt tɩ b tʋlg n bãng n paase. Y tõe n paama sũ-noog ning sẽn yaa sõng-b tɩ b sɩng vɩɩm sẽn ka sɛtã sor zug kẽndã.—Mat. 7:13, 14.