DVD video sẽn tar koɛɛg sẽn be nafr wakat fãa

Koe-bʋg n be kasɛt video ning gom-zug sẽn yaa David—il mettait sa confiance en Dieu wã pʋgẽ? Yaa koɛɛg sẽn wilgd tɩ d segd n teega a Zeova wa a Davɩɩde. (Yɩɩl 91:2) Kambã la kãsembã sã n yã yɛl nins sẽn zĩnd a Davɩɩd vɩɩmã pʋgẽ wã, b na n dɩka yam n tũ makr ning a sẽn kõ wã. (Yɩɩl 31:15) Sẽn paase, DVD kãngã tara sogsg la Biiblã zãmsg bugs toɛy-toɛy sẽn tõe n naf-do.

Ges-y filmã t’a poor bɩ y sok y meng sogs-kãensã: 1) Bõe yĩng t’a Zeova yãk rĩm a to? (1 Sãm. 15:10, 11; 16:1) 2) Bõe yĩng t’a pa yãk a Davɩɩd kẽem dãmbã ba a ye? (1 Sãm. 16:6, 7) 3) Bõe yĩng t’a Sayull da rat t’a Davɩɩd wa wẽed kʋnd t’a kelgdẽ? (1 Sãm. 16:14-23) 4) A Goliat ra yaa ãnda? (1 Sãm. 17:4-10) 5) Bõe yĩng t’a Davɩɩd da rat n zab ne a Goliate? (1 Sãm. 17:23, 24, 36, 37) 6) A Zonatã ra yaa ãnda? (1 Sãm. 14:1) 7) Wakat bʋg la a Sayull wa n kisg a Davɩɩde? (1 Sãm. 18:25-29) 8) Bõe yĩng t’a Davɩɩd pa kʋ a Sayulli? (1 Sãm. 26:7-11) 9) Wãn-wãn la a Sayull ki-yã? (1 Sãm. 31:1-6) 10) A Davɩɩd manesem yɩɩ wãn a Zonatã kũumẽ wã? (2 Sãm. 1:11) 11) Bõe la a Zeova ra kãab a Davɩɩde? (2 Sãm. 7:12, 13, 16) 12) Beeg-bʋg sẽn yaa kãseng la a Davɩɩd beeg-yã? (2 Sãm. 11:1-5, 14-17) 13) Wãn-wãn la a Davɩɩd wilg t’a sũur sãama ne bũmb ning a sẽn maanã? (Yɩɩl 51) 14) Sagl-bʋg la a Davɩɩd kõ bi-bɩɩg a Salomo? (1 Rĩm 2:1-4; 1 Kɩb. 22:6-13; 28:9, 10) 15) Wãn-wãn la a Zezi naamã rɩɩb na n naf a Davɩɩd ne a Zonatã la yãmb me?—Ezai 11:6-9; Zã 11:25, 26.

Masã, bɩ y sok y meng woto: Wãn-wãn la mam mengã tõe n teeg Wẽnnaam wala a Davɩɩd sẽn da teeg-a to-to wã?

Roagdba, zãms-y y kambã sõma tɩ b bãng tɩ tara yõod tɩ b teeg Wẽnnaam wakat fãa wa a Davɩɩde.—Yɩɩl 56:12.