D tara neb a taabã samde
1 Tʋm-tʋmd a Poll ra getame tɩ yaa tɩlae ne-a t’a moon nebã. A ra miime t’a Zeova kɩtame tɩ neb buud fãa tõe n paam fãagr ne a Biriblã zɩɩm sẽn tar yõod wʋsgã maasem. (1 Tɩm. 2:3-6) Rẽ n so t’a Poll yeel woto: “Mam tara Gɛrk rãmba ne weoog neb samde, yam dãmba la sẽn ka yam dãmb samde.” A tʋma ne a sũur fãa n pa zoe yaamse, n moon-b koe-noogã n dok samd ning sẽn da be a zugã.—Rom 1:14, 15.
2 Wala a Polle, rũndã-rũndã, kiris-nebã baood n tũnuga ne segb b sẽn paam fãa n na n moon koe-noogã neb a taaba. “To-kãsengã” waoong sẽn kolgd tʋʋll-tʋʋllã yĩnga, d baooda pʋ-peelem dãmbã ne yãgbo. Bɩ d sẽn nong nebã ne nonglem hakɩkã kɩt tɩ d tʋm tʋʋm kãngã sẽn fãagd yõyã sõma.—Mat. 24:21; Eze. 33:8.
3 D samdã rokre: Yaa ne zak-zak moonegã maasem la d taasd nebã koɛɛgã n yɩɩda. Mooneg zĩis ninsẽ, d sã n wa pa mikd neb wʋsg b yiyã, d sã n gʋlsd rẽ neer la d lebgd n kẽngd wakat a taaba, na n kɩtame tɩ d paam n sõs ne neb wʋsgo. (1 Kor. 10:33) D leb n tõe n paama nebã n taas-b koɛɛgã, d sã n moond koosmã zĩisẽ, soayã zutu, pemsem kokr zĩisẽ, parkĩng rãmbẽ wã la ne telefõnnã. D tõe n soka d meng woto: ‘Rẽ yĩnga mam maanda m sẽn tõe fãa n tũnugd ne soay buud fãa n moond vɩɩm koɛɛgã bɩ?’—Mat. 10:11.
4 Saam-bi-poak a yembr sẽn yaa so-pakd gesame tɩ yaa tɩlae ne-a t’a moon neba fãa koɛɛgã a moonegã zĩigẽ. Zak a yembrẽ, a ra mikdame tɩ kʋlemsã paga wakat fãa tɩ ned ka yir ye. La raar a yembr a sẽn wa n pa yi koe-moonego, a yãa mobill sẽn yas zak ning a sẽn zɩ n yãẽ nedã noore. A sẽn pa rat tɩ zag-kãngã nebã pa n pa wʋm koɛɛgã, a tɩ rĩi zakã soneri. Rao n yi tɩ saam-bi-poakã sõs ne-a, la yẽ ne a sɩdã lebg n tɩ kaag–a-la naoor wʋsgo. Rao wã wa n sakame n zãms Biiblã, la masã a yaa saam-biig sẽn deeg lisgu. A tara mi-beoog wʋsg ne saam-bi-poak kãngã sẽn ges tɩ yaa tɩlae ne-a t’a taas nebã koɛɛgã.
5 Saabã sẽn kolgd tʋʋl-tʋʋllã, yaa masã la d segd n moon koɛɛgã ne d pãng tɛk n dok neb a taabã samd d sẽn tarã.—2 Kor. 6:1, 2.