Ket-y n kengd-y taab tẽebo
1 Tʋm-tʋmd a Poll maana a sẽn tõe tɛk n keng a tẽed-n-taasã tẽebo. (Tʋʋ. 14:19-22) Tõnd me saam-biisã sã n wa tar zu-loeese pak-d lame, la d ratame n sõng-ba. Biiblã wilgdame tɩ yaa d fãa n segd n sõng d taabã, lakae pa kãsem dãmba bal ye. (Rom 15:1, 2) Bɩ d ges yɛl a yiib d sẽn tõe n maan n tũ saglg ning b sẽn kõ-d ne nonglem tɩ d ket n ‘belsd taab la d kengd taab’ tẽebã. (1 Tes. 5:11, NW)
2 Bãng-y neb a taabã bõn-datem: Wẽnnaam Gomdã wilgame t’a Dorkas “maana tʋʋm sõma wʋsg n sõng naong rãmba.” (Tʋʋ. 9:36, 39) A bãnga neb nins sẽn da rat sõngrã n maan a sẽn tõe tɛk n sõng-ba. Ad a sɩd kõ-d-la mak-sõngo! Y tõe n wa bãngame tɩ saam-biig sẽn kʋʋl n dat sõngr sẽn na yɩl n wat tigissã, wall tõe tɩ y mii so-pakd sẽn pa tar ned sẽn yãagd-a koe-moonegã ra-zaan-daar zaabr ye. Y sã n wa bãng tɩ ned n dat sõngr woto buud tɩ y sɩd tõog n sõng-a, na n kenga a soabã raood wʋsgo.
3 Tẽebã yɛl zut sõsga: D leb n tõe n kenga d taabã tẽeb ne d no-goama. (Ef. 4:29) Kãsem soab sẽn tar minim yeela woto: “Y sã n dat n keng y taabã tẽeb bɩ y sõsd ne-b tẽebã yɛl zutu. Sẽn na yɩl n sɩng sõsg sẽn kengd tẽeb ne neda, y tõe n sɩnga ne sokr bala. Wala makre y tõe n sok-a-la woto: ‘Wãn-wãn la fo bãng sɩdã?’” Wilg-y tɩ tigingã pʋgẽ kom-bɩɩsã yell sɩd pak-y lame. Bao-y n sõs-y ne neb nins raood sẽn komsã la b rãmb nins sẽn zoet neb pẽnegrã. (Yel. 12:25) Ra bas-y tɩ y sõssã fãa tik dũniyã reem zut tɩ y wa pa yã sẽk n sõs tẽebã yɛl zut ne y tẽed-n-taasã ye.—Rom 1:11, 12.
4 La bõe la y tõe n yeel n keng y taabã tẽebo? Y sẽn karemd Biiblã la y zãmsd-a wã, rẽ yĩnga, sẽn nan pa kaoose, y yãa sor-wilgr sẽn kɩt tɩ nonglem ning y sẽn tar ne a Zeova wã paas bɩ? Y wʋma bũmb zãma sõsg pʋgẽ bɩ Gũusg Gasgã zãmsgẽ tɩ keng y raood bɩ? Bɩ bũmb ned sẽn vɩɩmd tɩ kengd tẽeb la y wʋmẽ tɩ yɩ-y noog wʋsgo? Y sã n sɩd nanda tẽeb bõn-sõma kãensã, wakat fãa, y na n tara bũmb y sẽn na n yeel y taabã tɩ keng b tẽebo.—Yel. 2:1; Luk 6:45.
5 Sẽn na yɩl n ket n kengd taab tẽebo, bɩ d sõngd taaba, la d tʋmd ne d zɩlemdã ne yam.—Yel. 12:18.