D keng taab raood koɛɛgã mooneg sasa
1 D sã n paam tɩ ned togs-d goam sẽn kengd raoodo, d sũy yaa noogo. (Yel. 25:11) D sã n wa moond koɛɛgã ne neb a taabã, wãn to la d tõe n gom n keng b raoodo?
2 Goam sẽn kengd raoodo: D sã n wa moond ne d saam-biisã, d segd n gomda ne-b goam sẽn tõe n kɩt tɩ d zoodã ne a Zeova paase. Bala woto kengda raood wʋsgo. (Yɩɩl 37:30) D tõe n goma d sẽn na n kãab nebã sɛbã to-to yelle, wall d gom kiba-nood d sẽn paam koɛɛgã mooneg sasa sẽn nan pa kaoos yelle. (Tʋʋ. 15:3) Rẽ yĩnga d yãa bũmb sẽn kengd raood d Biiblã kareng sasa, bɩ zʋrno paalã kareng sasa, wall tigissã sasa bɩ? D tõe n tika zãmã sõsg d sẽn kelg Rĩungã roogẽ tɩ nan pa kaoos zug n sõs ne saam-biig ning sẽn moond ne tõndã.
3 Ned sã n yeel tõnd bũmb koe-moonegã sasa tɩ d pa tõog n leok a soabã sõma, tõe n komsa d raoodo. D sã n wa yi zakẽ wã, yɩta sõma tɩ d rɩk sẽk bilf ne d tũud-n-taagã n ges d sẽn na n maan to-to, d sã n wa seg yel-kãng buud nindaare. D tõe n gesa Comment raisonner sebrã pʋgẽ. Tõnd tũud-n-taagã sã n kãab ned sebr sõma, d segd n pẽg-a lame tɩ keng a raoodo.
4 Bao-y n moon ne neb a taabã: Neb n be d sebrã zãmsg sullẽ tɩ d sẽn moon ne-b kaoosame bɩ? D sã n bool ned t’a wa yãag-d koɛɛgã mooneg sasa, tõe n kɩtame tɩ d paam n keng taab raoodo. (Rom 1:12) Sõngr so-pakdbã ne wakat fãa so-pakdbã sũy yaa noogo, b sã n paam tɩ neb a taabã moond ne-ba, sẽn yɩɩd fãa yibeoog pĩnd bɩ zaabre, bala saam-biis wʋsg pa nong n moond wakat kãensã ye. Sẽn na yɩl n sõng so-pakdbã, d tõe n yãagd-b-la koe-moonegã sasa. Rẽ yĩnga koe-moond n be yãmb tigingã pʋgẽ t’a laafɩ wã pa waoog tɩ kɩt t’a pa tõe n moon wʋsg bɩ? D sã n kɩt tɩ nin-kãng yãag-d moonegã sasa, wala makre d sã n na n tɩ zãms ned Biiblã sasa, na n nafa d yiibã fãa.—Yel. 27:17.
5 Baa yel-bõones pʋsẽ, d sã n pẽgd neb nins sẽn moond ne tõndã la d wilgdẽ tɩ d nand-b lame, kengda b raood wakat fãa. D sã n wa moond koɛɛgã bɩ d modg n da yĩm dẽ, bala d rat n ket n kengda taab raoodo.—1 Tes. 5:11.