D paas d koe-moonegã minim: D kengd taab raood koe-moonegã sasa

Tũud-n-taarã yõodo: A Zezi ra miime tɩ koe-moonegã sasa, d sã n tar tũud-n-taaga, yaa sõma wʋsgo. Rẽ n so t’a sẽn wa n na n tʋm a karen-biis 70 tɩ b reng taoor n tɩ moon koɛɛgã, a tʋm-b yiib-yiibu. (Luk 10:1) Koe-moonegã sasa, d sã n wa seg zu-loɛɛga, wall d wa pa mi d sẽn tog n leok ned to-to, d tũud-n-taagã tõe n sõng-d lame. (Koɛ. 4:9, 10) Koe-moond tõe n togsa a tũud-n-taag bũmb kẽer yẽ sẽn mi, wall a kõ-a saglg tɩ paas a koɛɛgã mooneg minim. (Yel. 27:17) Y sã n yi zak n digd zak a to, y n tõe n kengda taab raoodo.—Fil. 4:8.

Ad y sẽn tõe n maan dẽ to-to:

• Y tũud-n-taagã sã n wa sõsd ne ned bɩ y kelgdẽ. (Zak 1:19) A sã n wa karemd vɛrse, bɩ y tũ karengã y Biiblã pʋgẽ. Rẽ, a sã n wa rat sõngre, y tõogd n sõng-a-la nana-nana.

• Tall-y yam n bãng y tũud-n-taagã sã n data sõngre, la wakat ning y sẽn tog n sõng-a. (Yel. 25:11) Y sã n yãag koe-moond t’a na n tɩ zãms ned Biiblã, zãmsgã sasa y sã n mi n leoke, na n yɩ-a-la noogo. La zak-zak koe-moonegã sasa, yɩta sõma tɩ sã n wa yaa y to wã n tog n gome, bɩ y bas t’a gome. Vẽenega, y tũud-n-taagã sã n nan sɩnga koɛɛgã mooneg paalem, wall a pa mi a sẽn na n leok ned to-to, y tõe n sõng-a lame. La koe-moond sã n moond zak-zak ne a to, wall a yãag-a lame tɩ b na n tɩ kaag ned bɩ n zãms ned Biiblã, a to wã sã n wa gomd bɩ a ra kʋʋg-a, wall a reeg sõsgã n yãmbe, pa rẽ bɩ a toeem-a ye.

• Sõng-y y tũud-n-taagã t’a rɩ y minimã yõodo. Y sã n wa neẽ tɩ y tõe n sõnga y to wã tɩ paas a koɛɛgã mooneg minim, bɩ y sõng-a. (Yel. 3:27) Sẽn na yɩl n maan dẽ, y tõe n sok-a-la woto: “Fo tagsg yaa wãn ne fo sẽn yeel bũmb ningã?” “M tõe n wilg-f-la bũmb bɩ?” Wall y yeel-a: “Sã n da yaa maam, m da na n maana woto wall woto.” La tẽeg-y tɩ baa ned sũur sẽn tõe n yɩ noog b sã n sagend-a wakat-wakatã, y sã n maand rẽ a kongr fãa poore, tõe n komsa a raoodo.

Mak-y woto ki-kãngã:

• Y sã n wa moon koɛɛgã n sa, bɩ y togs y tũud-n-taagã bũmb a sẽn maan wall a sẽn yeel tɩ keng y raoodo.