D sõng taab koe-moonegã sasa
1. D sã n moond koɛɛgã ne d tũud-n-taaga, wãn to la rẽ nafd-do?
1 Daar a yembre, a Zezi tʋma a karen-biis 70 wã tɩ b tɩ moon koɛɛgã, la yẽ ‘tʋm-b-la yiib-yiibu.’ (Luk 10:1) Sãmbg sẽn ka be, woto kɩtame t’a karen-biisã sõng taab la b keng taab raoodo. D sã n wa moond koɛɛgã ne d tũud-n-taaga, wãn to la d tõe n sõng taaba?
2. D tũud-n-taagã sã n wa sõsd ne neda, wãn to la d segd n kelge, la bõe yĩnga?
2 D kelgd sõma: D tũud-n-taagã sã n wa sõsd ne neda, d segd n maaga d yĩng n kelg sõma. (Zak 1:19) A sã n wa karemd vɛrse, bɩ d tũ karengã d Biiblã pʋgẽ. D tũud-n-taagã bɩ a kɛlgdã sã n wa gomd bɩ d kelg-a neere. D sã n kelgd sõsgã neere, tõe n kɩtame tɩ ned ning a sẽn gomd ne wã me kelg neere.
3. Wakat bʋg la d tũud-n-taagã tõe n dat d sõngre?
3 Wakat ning d sẽn tõe n gome: D tũud-n-taag sã n na n sɩng sõsg ne neda, d sã n bas-a t’a lʋɩ taoor n gome, wilgdame tɩ d waoogd-a lame. (Rom 12:10) D segd n gũusame n da wa kʋʋg a goamã ye. Sã n mik tɩ d tũud-n-taagã yĩma bũmb ning a sẽn dat n yeelã, bɩ yaa kɛlgdã n tar kɩɩsg goam pa rẽ bɩ sokr tɩ kɩt t’a kot sõngre, bɩ d modg n sõng-a la d ra bao n na n sɩng sõsg a to ye. (Yel. 16:23; Koɛ. 3:1, 7) D sã n na n kẽes d toog sõsgã pʋgẽ, bɩ d sõng d tũud-n-taagã t’a wɛgs a sõsgã sõma.—1 Kor. 14:8.
4. Bõe n na n sõng tõnd tɩ d tõog n moon koɛɛgã sõma n paam sũ-noogo?
4 Karen-biis 70 wã sẽn tɩ moon koɛɛgã poore, b lebg n kẽnga a Zezi nengẽ ne sũ-noogo. (Luk 10:17) Tõnd me sã n kelgd d tũud-n-taagã neere, la d baood n bãngd wakat ning d sẽn tõe n kẽes d toog sõsgã pʋgẽ n sõng-a, na n kɩtame tɩ d tõog n moond koɛɛgã sõma n paam sũ-noogo.