Keng-y y tũud-n-taagã raoodo

1. Y sã n wa moond koɛɛgã ne y to, wãn-wãn la y tõe n dɩk a Poll togs-n-taare?

¹ Tʋm-tʋmd a Poll sã n da wa paam n be ne a tẽed-n-taasã, a baoodame tɩ b keng taab raoodo. (Rom 1:12) Yãmb sã n moond koɛɛgã ne y tẽed-n-taaga, y kengda a raood la y sõngd-a bɩ? Wall tɩ y moondẽ balã, y tõe n mi n sõsda ne y tũud-n-taagã n wilgd-a bũmb ning sẽn sõng yãmb tɩ y tõe n moon koɛɛgã sõma wã.

2. Koe-moonegã sasa, wãn to la d tõe n keng d tũud-n-taag raoodo, la bõe yĩng tɩ rẽ tar yõodo?

² Sõng-y y to wã t’a tall raoodo: Koe-moonegã sasa, koe-moondb kẽer neng wall b koɛɛg sẽn yaa to-to wã mi n wilgdame tɩ b zoeta rabeem. La d sã n pelgd d pʋg n pẽgd-ba, tõe n kenga b raoodo. Bõe me la d tõe n maan n keng d to raoodo? Tigims sull yel-gɛt a yembr yeelame tɩ yẽ wilgda a tũud-n-taagã bũmb kẽer sẽn da kẽesd yẽ rabeem, la pʋʋsgã sẽn sõngd-a to-to t’a tõogd a rabeemã. Saam-biig a to me wilga bũmb ning sẽn sõng-a t’a pa le zoet rabeem koe-moonegã sasa wã, n yeel woto: “Mam sɩngda ne laado. La wakat ninga, rẽnda m pʋʋs a Zeova t’a sõng-m tɩ m da gãnem m nengã ye.” Y sã n mii bũmb sẽn sõng yãmb tɩ y tall raood koe-moonegã sasa, bɩ y togs y tũud-n-taagã.

3. Bõe la y tõe n togs y tũud-n-taagã n paas a koe-moonegã minim?

³ Kõt-y taab yam: Yãmb zoe n tũnuga ne sokr n tɩʋʋs sõsg wall y tika yell sẽn maan tɩ moonegã zĩig neb tar n gomda, n sõs ne ned t’a kelg neer bɩ? Y zoe n tika saglg b sẽn kõ d sɛbã pʋsẽ n toeem-a bilf n sɩng sõsg tɩ yɩ sõma bɩ? Togs-y y tũud-n-taagã rẽ. (Yel. 27:17) Y sã n wa rabd n na n tɩ kaag ned sẽn dat n wʋm koɛɛgã n paase, y tõe n togsa y tũud-n-taagã y sẽn na n tɩ gom bũmb ning yellã, la y sẽn magd n na n tɩʋʋs sõsgã to-to. Y sã n wa zãms ned Biiblã n sa, y tõe n wilga y tũud-n-taagã bũmb ning sẽn kɩt tɩ y yãk vɛrse takɩ n karme, wall bũmb yell y sẽn gom võore.

4. Bõe yĩng tɩ zems tɩ d sõng koe-moondb a taabã?

⁴ Pipi kiris-nebã ra sõngda neb nins sẽn pa b tẽed-n-taasã, la pa bãmb bal ye. B ra miime me tɩ tara yõod tɩ b keng b tẽed-n-taasã raoodo. (Tʋʋ. 11:23; 15:32) Makre, tʋm-tʋmd a Poll wilga bɩ-biig a Tɩmote bũmb wʋsgo, la a sagl-a tɩ yẽ me sõng a taabã tɩ b bãng bõn-kãense. (2 Tɩm. 2:2) Koe-moonegã sasa, d sã n maand d tẽed-n-taasã neere, d paasda b sũ-noogã la b minimã. La pa rẽ bal ye. D noogda d saasẽ Ba wã sũur me.—Heb. 13:15, 16.