D sẽn na n sõng nebã to-to tɩ b wʋm koɛɛgã võore
1. Biiblã kiba-bʋg la d na n vaeese, la bõe yĩnga?
1 Tʋm-tʋmd a Poll ra sõsa karen-doog pʋgẽ Pisidi soolmẽ Ãntiosã pʋgẽ. Kiba-kãng sẽn be Tʋʋma 13:16-41 wã yaa mak-sõng sẽn wilgd d sẽn tõe n sõs ne nebã to-to n kɩt tɩ b tags la b wʋm koɛɛgã võore. A Poll tika yɛl a kɛlgdbã sẽn mi la b sẽn tagsd to-to wã zug n taas-b koɛɛgã. D sã n wa vaeesd sõs-kãngã bɩ d ges tõnd me sẽn tõe n dɩk a togs-n-taar to-to d koe-moonegã pʋgẽ.
2. Bõe la a Poll sẽn sɩng a sõsgã to-to wã zãmsd tõndo?
2 D tik bũmb tõnd ne d kɛlgdbã sẽn mi: Baa ne a Poll koɛɛgã sẽn tik tʋʋmd ning a Zezi sẽn tar Wẽnnaam daabã pidsg pʋgẽ wã, a Poll pa gom dẽ yell a sõsgã sɩngrẽ ye. A goma Zʋɩf rãmbã buud sɩngr sẽn yɩ to-to wã yelle, bala yẽ ne a kɛlgdbã wʋsg sẽn da yaa Zʋɩf rãmbã ra mii kiba-kãnga. (Tʋʋ. 13:16-22) Wala woto, tõnd me sã n tik bũmb tõnd ne d kɛlgdbã sẽn mi zug n sõse, d na n tõogame tɩ nebã kelg-d la b reeg koɛɛgã. Rẽ tõe n baoodame tɩ d sok-b sogsg ne yam la d kelg-b neer sẽn na yɩl n bãng bũmb ning sẽn tar yõod ne-bã.
3. Bõe n kɩt tɩ yɩ toog ne a Poll kɛlgdbã tɩ b sak n deeg t’a Zezi n da yaa Mesi ning b sẽn kãabã?
3 A Poll sẽn sõs Zʋɩf rãmbã buud kibar zug ne a kɛlgdbã, a tẽeg-b lame tɩ Wẽnnaam da kãabame t’a na n zẽka fãagd a Davɩɩd yagensã sʋka. La Zʋɩf rãmb wʋsg sɩd ra gũuda gãndaoog sẽn da na n wa fãag-b Rom pãn-soaadbã nugẽ, la a zẽk b soolmã t’a yɩɩg buud a taabã soolem. B ra mii vẽeneg me tɩ Zʋɩf rãmbã tũudum nanambs tõdga a Zezi Zerizalɛm, n yõk-a n kõ Rom soolmã zu-soben dãmb tɩ b kʋ-a. Wãn-wãn la a Poll da na n wilg-b masã tɩ yaa nin-kãng soabã la Mesi wã tɩ b sak n deege?
4. Wãn-wãn la a Poll kɩtẽ t’a kɛlgdbã sẽn da yaa Zʋɩf rãmbã tags sõma n sak n deeg koɛɛgã?
4 Kɩt-y tɩ y sõsgã zems ne yɛlã: A Poll sẽn da mi a kɛlgdbã sẽn tagsd to-to wã, a tika Gʋlsg Sõamyã n kɩt tɩ b tags bũmb nins b sẽn da zoe n deeg tɩ yaa sɩdã zugu. Wala makre, a wilgame t’a Zezi la a Davɩɩd yagengã, la ned ning lisd a Zã neb wʋsg sẽn da get wa Wẽnnaam no-rɛɛsã sẽn wilg tɩ yaa fãagdã. (Tʋʋ. 13:23-25) A Poll wilgame tɩ b sẽn tõdg a Zezi la b kao a bʋʋd n kʋ-a wã, b “pidsa Wẽnnaam no-rɛɛsdbã koeese.” (Tʋʋ. 13:26-28) Sẽn paase, a wilgame t’a Zezi vʋʋgame tɩ neb yã-a n maan kaseto, la a tik Gʋlsg Sõamyã zĩis a kɛlgdbã sẽn mi sõma n wilg t’a Zezi vʋʋgrã pidsa gom-kãense.—Tʋʋ. 13:29-37.
5. a) Wãn-wãn la a Poll maneg a sõsgã tɩ zems ne yɛl a kɛlgdbã sẽn da yaa Gɛrk rãmbã sẽn mi? b) Wãn-wãn la d tõe n dɩk a Poll togs-n-taar d moonegã pʋgẽ?
5 La Atɛn Areopaazẽ wã, a Poll sẽn da wa n na n sõs ne Gɛrk rãmbã, a goma bũmb a to yelle. (Tʋʋ. 17:22-31) Baasg zãnga, be me yaa koe-yendã la a sẽn taas-bã, la zĩis a yiibã fãa, nebã sak n deega koɛɛgã. (Tʋʋ. 13:42, 43; 17:34) Wala woto, rũndã-rũndã me d sã n tikd yɛl tõnd ne d kɛlgdbã sẽn sak n deeg zug n sõsd ne-b la d manegd d sõssã tɩ zemsd ne yɛl b sẽn mi la zemsd ne b sẽn tagsd to-to wã, neba na n sak n deega koɛɛgã.