D moon a Zeova ziirã
1 Yɩɩl gʋlsdã yeela woto: “Dũniyã neba fãa, bɩ y yɩɩl Zusoaba yĩnga. . . . Bɩ y togs bãmb ziir bu-zẽmsã sʋka la y togs bãmb bõn-bãnã neb buud fãa sʋka.” D sã n tagsd a Zeova sẽn zoe n maanã, a sẽn maandã la a sẽn na n wa maan bũmb nins n kõ tõndã yelle, kɩtdame tɩ d moon a ziirã ne d sũur fãa.—Yɩɩl 96:1, 3.
2 D koe-moonegã pʋgẽ: A Zeova Kaset rãmbã paama zu-no-kãseng b sẽn zãad Wẽnnaam yʋʋrã la b pẽgd yʋ-kãng dũniyã gill zugã. (Mal. 1:11) Ad woto yaa toor fasɩ ne kiris-neb ne yʋʋrã taoor dãmb sẽn yaa wuk-m-mens rãmb n yãk Wẽnnaam yʋʋrã b Biibl dãmbã pʋsẽ wã. Sẽn na yɩl n põs to-kãsengã sẽn watã sasa, nebã segd n pʋʋsa ne a Zeova yʋʋrã ne tẽebo. Rẽ kɩtame tɩ d segd n sõng-b ne yãgb tɩ b bãng Wẽnnaam yʋʋrã. (Rom 10:13-15) Sẽn paase, sẽn na yɩl tɩ laafɩ zĩnd saasẽ la dũniyã gill zugu, rẽndame tɩ Wẽnnaam deng n kɩt t’a yʋʋr paam waoogre. Sɩd-sɩda, bũmb nins fãa Wẽnnaam sẽn maandã tara loees ne a yʋʋrã.
3 A Zeova “yaa kãsenga la bãmb toga pẽgr wʋsgo.” La sẽn na yɩl tɩ nebã pẽg a Zeova tɩ zems ne a yʋʋrã ziiri, b segd n bãnga sɩdã a zugu. (Yɩɩl 96:4, 8) La neb n be n kɩɩsdẽ tɩ Wẽnnaam kae ye. (Yɩɩl 14:1) Kẽer me paoogda Wẽnnaam t’a ka pãnga, pa rẽ bɩ b yetẽ t’a toor kae ne ninsaalbã ye. D sã n sõngd pʋ-peelem dãmbã tɩ b bãngd d Naandã, a raabã la a sõmblmã, d pẽgda a Zeova.
4 Ne d manesmã: D sã n tũud a Zeova noyã sẽn yaa tɩrsã, pẽgd-a lame. Nebã nee tõnd yel-manesmã sẽn yaa sõma wã. (1 Pɩɛ. 2:12) Wala makre, d sẽn manegd d mens neerã tõe n kɩtame tɩ nebã pẽg-do, tɩ rẽ tõe n kõ-d sor tɩ d gom ne-b Wẽnnaam Gomdã noy tũub nafa yelle. (1 Tɩm. 2:9, 10) Nebã sã n ne d tʋʋm sõma wã tɩ kɩtdẽ tɩ b waoogd d saasẽ Ba wã, noom-d lame.—Mat. 5:16.
5 Bɩ d pẽgd tõnd Wẽnnaam sẽn ka to wã ne d goamã la d tʋʋmã daar fãa, n wilg tɩ d tũuda yɩɩl-gʋlsdã goamã. A yeelame: ‘Yɩɩl-y a Zeova yĩng n waoog bãmb yʋʋre. Bɩ y moon bãmb fãagr koɛɛga daar fãa.’—Yɩɩl 96:2.