Tõnd koe-moonegã sẽn pidsd bũmb ninsi
1. Wãn to la a Zeova get tõnd koe-moonegã, la ninsaalbã manesem yaa wãn-wãn ne-a?
1 Wẽnnaam Gomdã bilgda kiris-nebã wala neb sẽn tõogd a Zeova tʋʋmdã pʋgẽ. (2 Kor. 2:14-16) Tõnd sẽn kɩtd tɩ neba bãngd Wẽnnaamã, d goamã yaa wa wusd yũug sẽn noom a Zeova. Koe-noogã nooma neb kẽere, la a pa noom sãnda ye. La neb kẽer sẽn pa rat n kelgã pa rat n yeel tɩ tõnd tʋʋmdã pa tar yõod ye. Bɩ d ges tõnd koe-moonegã sẽn pidsd bũmb ninsã.
2. Koe-moonegã kɩtame tɩ tõnd tõe n wilg bõe?
2 Koe-moonegã pẽgda a Zeova: A Sʋɩtãan yeelame tɩ ninsaalbã balemda a Zeova b sẽn dat bũmb yĩng bala. (Zoob 1:9-11) Woto yĩnga, koe-moonegã kõta tõnd sor tɩ d wilg tɩ d nonga Wẽnnaam ne nonglem hakɩka. Koe-moondb wʋsg ket n moonda koɛɛgã la b maand karen-biisi, baa ne b zu-loeesã bɩ nebã sẽn maand yam-kaalgã. B sẽn maand woto toog pʋgẽ wã nooma a Zeova!—Yel. 27:11.
3. Bõe yĩng tɩ tar yõod wʋsg tɩ d kell n moon Wẽnnaam yʋʋrã la a raabã?
3 Tõnd koe-moonegã leb n tara tʋʋmd Wẽnnaam daabã pidsg pʋgẽ. A Sʋɩtãan dũniyã sãoong sẽn watã wɛɛngẽ, a Zeova yeelame: “Buud a taaba na n bãngame tɩ m yaa [a Zeova].” (Eze. 39:7) Sẽn na yɩl tɩ tẽnsã neb bãng woto, rɩllame tɩ Wẽnnaam sõgen dãmbã kell n moon a yʋʋrã la a raabã tɩ ta “dũniyã soolem fãa la buud fãa la goam toɛy-toɛya fãa la neba fãa.”—Wil. 14:6, 7.
4. Wãn to la b na n tik koe-moonegã n kao bʋʋdo?
4 B na n tika rẽ zug n kao bʋʋdã: Koe-noogã mooneg leb n yaa bũmb b sẽn na n tik n kao nebã bʋʋdo. Tʋm-tʋmd a Poll yeelame t’a Zezi Kirist na n sɩbga “neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.” (2 Tes. 1:8, 9) B na n tika neba sẽn tar manesem ning ne koe-noogã n kao b bʋʋdo. Ad yaa zɩɩb meng-meng la sẽn zao Wẽnnaam sõgen dãmbã zutã! Sẽn na yɩl n da tall zɩɩm samde, d segd n ket n moonda Rĩungã koɛɛg sẽn fãagd yõyã.—Tʋʋ. 20:26, 27.
5. Wãn to la Wẽnnaam nimbãan-zoeerã pukd tõnd koe-moonegã pʋgẽ?
5 Tõnd sẽn ket n modgd n na n sõng nebã tɩ b paam Wẽnnaam lohormã wilgdame t’a Zeova zoeta b nimbãanega. (1 Tɩm. 2:3, 4) Tõnd sẽn mi tɩ nebã yɛl toeemdame wã, kɩtame tɩ d kẽngd b nengẽ n yɩlemdẽ, sẽn na yɩl n sõng-b tɩ b bao a Zeova tɩ b nan ket n tõe n yã-a. D sẽn maand woto wã, d wilgdame tɩ d zoeta nebã nimbãaneg wala tõnd Wẽnnaamã sẽn zoet b nimbãanegã. A pa rat tɩ ned ba a ye sãam ye, a ratame tɩ b fãa yam tek tɩ b kos sugri.—Luk 1:78; 2 Pɩɛ. 3:9.
6. Wãn to la d sẽn tʋmd a Zeova tʋʋmdã wʋsgã nafd tõndo?
6 Koe-moonegã nafda tõnd mengã: D sẽn tʋmd wʋsg a Zeova tʋʋmdã pʋgẽ wakat fãa wã, kogenda tõndo. Rẽ sõngd-d lame tɩ d ningd a Zeova daarã d yamẽ wakat fãa, n pa basdẽ tɩ dũni wẽng kãnga rẽgem-d ye. (2 Pɩɛ. 3:11-14; Tɩt 2:11, 12) Woto yĩnga, bɩ d ‘tall tẽeb kãn-kãe n da vigs ye, la wakat fãa bɩ d maan Zusoaba tʋʋmd wʋsgo.’—1 Kor. 15:58.