Tall-y yãgb yam
1 A Zezi ra miime tɩ wakat ning a sẽn da tar n na n maan a Ba wã tʋʋmdã yaa koɛɛga. (Zã 9:4) Rẽ n so t’a pids a tʋʋmdã ne yãgbo, la a zãms a karen-biisã tɩ b maan woto me. (Luk 4:42-44; 8:1; 10:2-4) Bũmb ning sẽn da pak-a n yɩɩdã ka naar vɩɩm ye. (Mat. 8:20) Dẽ, a tõog n baasa tʋʋmd ning a Zeova sẽn da kõ-a t’a maanã.—Zã 17:4.
2 Wakatã yaa koɛɛga: Wakat ning tõnd me sẽn tar n na n moon koe-noogã “dũniyã tɛk fãa” wã yaa koɛɛga. (Mat. 24:14) Biiblã bãngr-goam wilgda vẽeneg tɩ sɛɛbã wakat kolga hal wʋsgo. Ka la bilfu, b na n “sɩbga neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã. Bãmb sɩbgra na n yɩɩ sãoong sẽn ka sɛta.” (2 Tes. 1:6-9) Sɩbg-kãng na n waa ne lingr zĩig pʋgẽ. (Luk 21:34, 35; 1 Tes. 5:2, 3) Nebã segd n bãngame tɩ b vɩɩmã bee yell pʋgẽ. Yaa tõnd n segd n sõng-b tɩ b bao a Zeova lohorem tɩ nan ket n tõeyã.—Sof. 2:2, 3.
3 D maan d sẽn tõe fãa: Wẽnnaam sõgen dãmbã sẽn mi tɩ ‘wakatã lebga bilfã’ yĩngã, b ningda moonegã tʋʋmd pipi zĩigẽ b vɩɩmã pʋgẽ. (1 Kor. 7:29-31; Mat. 6:33) Neb kẽer basa afɛɛr dãmb kẽere, bɩ yɛl a taab pʋgb sẽn na yɩl n kẽes b mens moonegã tʋʋmd pʋgẽ n paase. (Mark 10:29, 30) Neb a taab ket n maanda ‘Zusoaba tʋʋmd wʋsgo,’ baa b sẽn paamd makr wakat fãa wã. (1 Kor. 15:58) Neb wʋsg sɩng n moonda koe-noogã sẽn na maan yʋʋm pi-gĩna. (Heb. 10:23) A Zeova nanda modg-kãsems a woto fãa b sẽn maand n teend Rĩungã yɛla hal wʋsgo.—Heb. 6:10.
4 D sẽn tikd d vɩɩmã a Zeova balengã zug tɩ rẽ baoodẽ me tɩ d moon koɛɛgã, sõngd-d lame tɩ d ning a Zeova daarã d yamẽ sõmã. Rẽ sõngd-d lame tɩ d ka basd t’a Sʋɩtãan dũniyã tiis-d ye, la a kɩtdẽ tɩ d tʋll n tall yel-manesem sẽn yaa sõama n paase. (2 Pɩɛ. 3:11-14) N-ye, d sã n moond koɛɛgã ne yãgb yam, rẽ tõe n fãaga tõnd la neb nins sẽn kelgd tõndã.—1 Tɩm. 4:16.