D nang pãng n moon koɛɛgã!
1. Sagl-bʋg la a Poll kõ tõndo?
1 A Poll yeela woto: “Bɩ f moon Wẽnnaam koɛɛgã, la f nang pãng wakat fãa.” (2 Tɩm. 4:2) Bõe yĩng t’a saglgã tar yõod ne tõnd rũndã-rũndã? Wãn to la a saglgã tõe n sõng tõnd la neb a taabã?
2. Bõe yĩng tɩ d segd n modg n moon neb nins sẽn nan pa wʋm koe-noogã?
2 Yaa yõor yelle: Dũniyã gill zugu, neb milyõ rãmb n ket n nan pa wʋm koe-noogã sẽn tõe n kɩt tɩ b paam fãagrã ye. (Rom 10:13-15; 1 Tɩm. 4:16) Zĩis nins d sẽn wae n moondẽ wã, d yãta sũ-tɩrs rãmb sẽn nan pa wʋm koɛɛgã. D sã n toeemd rayã bɩ wakat nins d sẽn moondã, d tõe n paama neb a taab n moone. D sã n maand woto, na n kɩtame tɩ d sũur-kasetã ra ning-d taale, la tɩ d ra paam zɩɩm samd ye.—Tʋʋ. 20:26.
3. Wãn to la d tõe n tʋm ne d sẽkã sõma koɛɛgã mooneg sasa?
3 Baa ne b sẽn nams pipi kiris-nebã, ‘b pida Zerizalɛm ne b zãmsgã.’ (Tʋʋ. 5:28) Tõnd me yãka yam n na n moon koe-noogã neer bɩ? (Tʋʋ. 10:42) Koe-moonegã sasa, d tʋmda ne d sẽkã sõma bɩ? D sã n naag taab n kẽng zĩig n tɩ moone, tɩ kẽer kẽng n na n tɩ ges neb tɩ d yas n gũud-ba, rẽ yĩnga d moonda so-loogdbã bɩ?
4. D sã n nangd pãng ne koɛɛgã moonego, wãn to la rẽ sõngd tõndo?
4 Koe-moonegã sõngda tõnd tɩ d ket n gũudẽ: Dũni kãngã saab sẽn ta n sa wã, d segd n ket n gũudame. (1 Tes. 5:1-6) Tõnd sã n sõsd ne nebã n wilgd-b bũmb nins Wẽnnaam Rĩungã sẽn na n wa maan ka la bilfã, d pa na n maan yɩɩr wʋsg ne zu-loeesã ye. (Luk 21:34-36) A Zeova raarã sã n be d yamẽ wakat fãa, kɩtdame tɩ d nangd pãng n moond koe-noogã sẽn fãagd yõyã.—2 Pɩɛ. 3:11, 12.
5. D sẽn get nebã vɩɩm wa a Zeova sẽn get-a to-to wã kɩtame tɩ d maand bõe?
5 D sã n nangd pãng ne koɛɛgã moonego, wilgdame tɩ d geta nebã vɩɩm wa a Zeova sẽn get-a to-to wã. A Zeova ‘sẽn ka rat tɩ ned ba a ye sãama yĩnga, a maanda sũ-mar ne-b n dat tɩ b fãa yam tek tɩ b kos sugri.’ (2 Pɩɛ. 3:9; Eze. 33:11) Bɩ d maan d sẽn tõe fãa n moon neb nins sẽn be d moonegã zĩigẽ wã, t’a Zeova yʋʋrã paam pẽgre.—Yɩɩl 109:30.