Y tõe n sõngame bɩ?

¹ Wakat fãa a Zeova baooda soay n na n sõng a sõgen dãmbã sẽn yaa sakdbã. (2 Kɩb. 16:9; Ezai 41:10, 13) A Ezai maka a Zeova ne pe-kɩɩm sõngo, n gʋls woto: “Bãmb dɩlgda b neba wa rũm-kɩɩm sẽn wãbend a rũmsi. Yẽ zãada a pe-bi wã ne a nusi n mobg bãmb a yãoogẽ, la a tɛt b ma rãmbã.” (Ezai 40:11) Ges-y manesem kẽer d sẽn tõe n tall n dɩk a Zeova sẽn get tõnd yell ne nonglmã togs-n-taare.

² Sõng-y nin-paalsã: D tõe n sõnga nin-paalsã, d sã n bool-b tɩ b wa maan lagem-n-taar ne-do, tɩ keng b tẽebã. (Yel. 13:20) Saam-biig a ye tẽega neb a taabã sẽn sõng-a to-to, a sẽn da wa n sɩng lagem-n-taar maaneg ne tigingã nebã, n yeele: “Naoor wʋsgo, zak neb n mi n bool-m tɩ m wa lagem ne-b b zak pʋgẽ zãmsgã wakate. M sẽn da bɩt tẽebã pʋgẽ wã sasa, wakat fãa saam-biig ne a pag sẽn yaa so-pakdb n da nong n kot maam tɩ m wa naag-b koe-moonegã pʋgẽ daarã tõre. Wakat fãa tõnd sõsda tẽeb sõss sẽn yaa sõma wʋsg zutu.” A paasa woto: “M sẽn da wa n nan pa kiris-nedã, m da minim n yita wɩkɛn arzũm la sibr yʋngo. La masã m sẽn dɩkd sẽk n be ne saam-biisã m paamda tũud-n-taar ning m sẽn tʋllã.” Tigingã neb sẽn tall nonglem ne saam-bi-kãngã wã, kɩtame t’a kɩ yẽg tẽebã pʋgẽ, la masã a yaa Betɛllã zak neda.—Kol. 2:6, 7.

³ Keng-y taab tẽebo: D saam-biisã sã n wa maood ne yɛl sẽn pa nana, rẽ tõe n kɩtame tɩ d yã d sẽn tõe n sõng-b zĩig ninga. Rẽ yĩnga y tõeeme n tɩ lagem ne koe-moond sẽn yaa koams n kõ kasetã ne telefõnne, bɩ n kos-a t’a wa yãag-y y Biibl zãmsgẽ, n tall Biibl zãmsdã n wa ne koamsã yir meng tɩ sã n tõe bɩ? Tõeeme tɩ roagd sẽn tar kom-bõoneg sũur na n yɩɩ noogo, d sã n sõng-a ne a kambã koe-moonegã wakat bɩ? Koe-moondb n be n zoet nebã n dat sõngr lebg-n-tɩ-ges rãmbã wakat bɩ koe-moonegã neng a to pʋgẽ bɩ? D saam-biisã yell sã n pak-do, d sẽn nong-bã yĩngã na n kɩtame tɩ d bao soay n keng b tẽebã.—Rom 14:19.

⁴ D sã n dɩk togs-n-taar ne a Zeova sẽn get a sõgen dãmbã yell ne nonglmã, d kengda taab raoodo, n sõngdẽ tɩ tigingã neb pẽnegd taab n paasd nonglem pʋgẽ, la d waoogd d saasẽ Ba wã.—Ef. 4:16.