Bõe n tõe n sõng tõnd tɩ d yals kãn-kãe tẽeba pʋgẽ?
1 Tõnd sẽn sɩng n lagemd ne a Zeova siglgã tɛka, d tẽebã bɩʋʋng yɩɩ sũ-noog yẽgr n kõ-do! Baasg zãnga, yaa tɩlae tɩ d ket n bɩt tẽebã wɛɛngẽ, sẽn na yɩl n ket n ‘kɩɩd yẽga, n paamd kengre, la d paamd viglg kãn-kãe tẽeb pʋgẽ.’ (Kol. 2:6, 7, NW ) Baa neb wʋsg sẽn bɩ tẽebã wɛɛngẽ wã, kẽer n zãag n menem, b sẽn ka “yals kãn-kãe tẽeb pʋgẽ” wã yĩnga. (1 Kor. 16:13) D tõeeme n gũus tɩ woto ra wa paam-d ye. Wãn-wãn to?
2 Tẽeb tʋʋm maaneg wakat fãa: Lugl-y tẽeb tʋʋm geelg-n-tʋm sẽn yaa sõma ne a Zeova siglgã. Yaa be la b pidsd tõnd tẽebã ratem sõma-sõma. Tigingã tigiss la tigis-kãsemsã tusda tõnd tɩ d bɩtẽ la d kɩɩd yẽg tẽebã wɛɛngẽ wʋsg n paasdẽ, sã n mikame tɩ d kẽnd-b lame n ka vaandẽ sẽn na n yɩl n dɩ-b nafa. (Heb. 10:24, 25) D sã n karemd Biiblã, Gũusg Gasgã la Réveillez-vous! wã la sɛb nins sẽn wɛgsd Wẽnnaam Gomdã rɩɩb sẽn yaa taokã n ka vaandẽ, rẽ na n kɩtame tɩ tõnd tẽeb yẽgã kɩ sõma la b paam pãng n paase. (Heb. 5:14) D sã n yãkd bõn-datɩ d mens yĩng la d tʋmd sõmb-sõmb sẽn na yɩl n pids-ba, d paamda nafa sẽn kaoosde.—Fil. 3:16, NW.
3 Sõngr paoong sẽn bɩ-b tẽebã wɛɛngẽ wã nengẽ: Bao-y n paas y zo-rãmbã sõore, n maan tũud-n-taar ne neb nins sẽn bɩ tẽebã wɛɛngẽ tigingã pʋgẽ. Bao-y n bãng kẽem dãmbã, bala yaa bãmb la pipi sẽn tõe n keng yãmb tẽebã. (1 Tes. 2:11, 12) Sak-y saglg fãa b sẽn kõt-y ne yamleoogo. (Ef. 4:11-16) Ministɛɛr sõgen dãmbã me tʋllame n sõng b taabã tɩ b yals kãn-kãe tẽeb pʋgẽ, dẽ, bɩ y bao saam-bi-kãensã zĩig n paam daoolgo.
4 Yãmb data sõngr ministɛɛrã pʋgẽ bɩ? Gom-y ne kẽem dãmbã rẽ yelle, la y kos sõngre. Tõe tɩ b na n ning-y-la So-pakdbã sõngda neb a taabã geelg-n-tʋm pʋgẽ. Yãmb nan deega lisg paalem bɩ? Yãmb sã n karem Notre Ministère sebrã la y tũ bũmb ning sẽn be a pʋgẽ wã, rẽ na n sõnga yãmb tɩ y kẽng taoor n bɩ tẽebã wɛɛngẽ. Yãmb yaa roagd bɩ? Bɩ y ket n paasd y kambã tẽeb pãnga.—Ef. 6:4.
5 D sã n kɩ yẽg la d vigl kãn-kãe tẽebã pʋgẽ, d paamda zems-n-taar sõma ne Zeova la lagem-n-taar sẽn be yamleoog ne d saam-biisã. Rẽ kɩtdame tɩ d tõe n yals kãn-kãe a Sʋɩtãan makrã taoore, la paasd saagr ning d sẽn tar ne vɩɩm sẽn-kõn-sa beoog-daar pʋgẽ wã pãnga.—1 Pɩɛ. 5:9, 10.