Sõngr d sẽn tõe n paam nana-nana
1. Wãn to la ned tẽeb tõe n booge?
1 Saam-bi-poak a ye yʋʋr sẽn boond t’a Ana n tar sɩd sẽn pa Kaset soaba, n leb n tar tʋʋmd sẽn dɩkd a sẽkã wʋsgo. Rẽ kɩtame t’a pa tõe n kẽng tigissã wakat fãa, a pa tõe n yi koe-moonegã la a zãms Wẽnnaam Gomdã ye. Baa ne a sẽn ket n nong a Zeova wã, a ye pa moond koe-noogã ye. Zu-noogo, a paama tigingã kãsem dãmbã sõngre.
2. Wãn-wãn la kiris-nebã fãa tõe n sõng b taabã?
2 D sã n sak sõngr ning tigingã neb sẽn kõt-d tẽebã wɛɛngẽ wã, wilgdame tɩ d teega a Zeova. Tigingã pʋgẽ, kãsem dãmb sẽn dɩkd a Zezi Kirist togs-n-taar n get nebã yell ne nonglmã baoodame n na n sõng neb nins sẽn tar zu-loees tẽebã wɛɛngẽ wã la b keng b raoodo. (1 Tes. 5:14) Naoor wʋsgo, bũmb ning b sẽn datã yaa goam sẽn kengd raood sẽn tik Biiblã zug bala. Yãk yam n sõng neb nins tẽeb sẽn boog wakat bilf pʋgẽ wã, yaa kiris-nebã fãa n segd n maand rẽ, pa kãsem dãmba bal ye. Sãmbg sẽn ka be, d fãa miime tɩ b sã n togs gomd t’a zemse a tara nafa wʋsgo, “a yaa sõma wa sãnem tʋblondo.”—Yel. 25:11; Ezai 35:3, 4.
3, 4. D sã n dat n sõng d taabã, bõe la d segd n maane, la wãn to la d tõe n sõng-ba?
3 Yãk-y yam n tɩ sõng neb a taabã: Sẽn na yɩl n wilg neb nins sẽn dat sõngrã tɩ d nong-b lame, d segd n kʋma b nimbãanega, la d yãk yam n tɩ sõng-b ne d sũur fãa. A Zonatã sẽn wa n bãng n t’a Davɩɩd bee zu-loees pʋgẽ wã a “kẽnga be [Horsa] n tɩ ges a Davɩɩd n keng a sũuri.” (1 Sãm. 23:15, 16) D sõng-b ne bʋgsem. Gom-biis sẽn wilgd tɩ d sɩd maanda yɩɩr ne d saam-biisã tara nafa n yɩɩda. A Zezi wilga vẽeneg tɩ sẽn na yɩl n sõng saam-biig bɩ saam-bi-poak t’a lebg n yẽeg tẽebã wɛɛngẽ, d segd n maana modgr wʋsgo. (Luk 15:4) D sẽn dat ne d sũur fãa n sõng neb a taabã, rẽ kɩtame tɩ d modgd n paasdẽ, baa tɩ b tẽebã bɩʋʋng sã n pa tao-tao.
4 D sã n bool d sebra zãmsg sullẽ saam-biisã tɩ b wa yãag-d koe-moonegã, sɩd kõt-d-la sũ-noogo. D sã n sõngd d saam-biisã koe-moonegã pʋgẽ d kengd-b lame tɩ b nadgd pãng wʋsg Wẽnnaam tʋʋmdã pʋgẽ n paasdẽ. D sẽn wat n naag taab ne sũ-noog n tʋmd a Zeova tʋʋmdã, yaa sasa sẽn daoond neb nins sẽn lebg n yẽeg tẽebã wɛɛngẽ wã.
5. Wakat ninga, wãn-wãn la kãsem dãmbã tõe n sõng saam-biiga?
5 Seglg b sẽn dɩk ne nonglem: D segd n sõnga neb nins sẽn bas koɛɛgã mooneg la tigissã waoongã me n paas tɩ b tẽebã pãng paase. Tõe tɩ Biibl zãmsg ne Balm-y sɩd Wẽnnaam yɛngã, ne Approchez-vous de Jéhovah sebrã, bɩ ne Biiblã sɩd yetame tɩ bõe sebrã zemsa ne b raabã takɩ. Naoor wʋsgo, zãmsga pa segd n kaoos yɛs ye, bala b rãmbã zoe n deega lisgu. Tiginga tʋʋmd yel-gɛtb sullã segd n gesame n bãng ãnda n dat sõng-kãnga.—Ges-y yʋʋmd 1998 sɩpaolg kiuug la yʋʋmd 2000 sɩpaolg kiuugã Rĩungã Tʋʋmd Yãmb sogsgã leoore.
6. Wãn to la saam-bi-poak a ye lebg n paam pãng tẽebã pʋgẽ?
6 A Ana yell d sẽn da gom sɩngrẽ wã saka kãsem dãmba sõngr ne mi-beoogo, la a paamame tɩ saam-bi-poak sẽn bɩ tẽebã pʋgẽ wa zãms Biiblã ne-a. Naoor a naas la a zãms Biiblã ne-a, la rẽ bal kɩtame t’a lebg n pẽneg a Zeova yɛsa. A lebs n sɩnga tigissã kẽnde, tɩ koe-moonegã yamleoog ye kẽ-a n paase. Saam-bi-poaka le sõng-a-la koe-moonegẽ wã, n talld-a tɩ b kẽngd Biibl zãms rãmb taab nengẽ hal t’a wa paam raoolg wʋsgo tɩ sek a na moon koe-noogã zak-zaka. A sẽn da rat fãa yaa sõngr sẽn na yɩl n lebs n sɩng tẽebã tʋʋma.
7. Neb a taabã tẽeb kengr nafa yaa bõe?
7 D sã n kengd neb nins sẽn dat sõngrã raoodo, nafda d fãa. Ned ning sẽn paam sõngra sũur yaa noog ne a sẽn ye pẽneg a Zeova wã, la a ye kẽes a meng a siglgã tʋʋm pʋgẽ wã. Kãsem dãmba me sũur yaa noog b sẽn ne saam-biisã tẽeb sẽn bɩtã. (Luk 15:5, 6) Tigingã neb fãa sã n baood taab neere, paasda d lagem-n-taarã pãnga. (Kol. 3: 12-14) D sɩd tara bʋʋm wʋsgo, d sẽn dɩkd a Zeova mak-n-taarã, bala a sɩd yaa sõngr d sẽn tõe n paame!—Ef. 5:1.