Wãn-wãn la d tõe n kõ d sõngre?

¹ A Zeova Kaset rãmbã sã n wa wʋm tɩ yel-beed n paam neb zĩig ninga, b rat n bãnga b sẽn tõe n sõng to-to. Wa Tʋʋm 11:27-30 sẽn wilgdã, kom sẽn da wa n kẽ Zide soolmẽ wã, pipi kiris-nebã toola b saam-biisã sẽn da be be wã sõngre.

² Rũndã-rũndã, tõnd siglgã tara sor n tõe n yiis ligd n tɩ sõng neb yel-beed sẽn paame, bɩ neb a taab sẽn dat sõngre. Naoor wʋsg yaa wala sebdo, sa-bɛd wall yel-beed a taab sẽn tũ ne ãdem-biis nu.

³ Wala makre, rɩẽ, sebg b sẽn boond tɩ sunami sẽn yɩ sabab tɩ yel-beed paam neb Aazi soolmã nug goabgã, saam-biis wʋsg kõo ligd tɩ b tɩ sõng-ba. B pẽga kũunã saam-bi-kãensã sẽn kõ wã n wilg ne b sũur fãa tɩ b kʋmda toogã sẽn paam-b rãmbã. La tẽns kẽer pʋsẽ, b sã n tool ligd tɩ b sõng neb yel-beed sẽn paame, baa ligdã sã n na n seka yellã manegr n kelle, yaa tɩlae tɩ b rɩk a fãa n sõng nin-buiidã tɩ zems ne kõtã sẽn wilgã, la wakat takɩ laloa wã sẽn yãk pʋgẽ.

⁴ Yaa rẽ yĩng la b sẽn sagend tõnd tɩ d ning d ligdã d sẽn dat n kõ tɩ b sõng nebã koe-moonegã ligd koglg pʋgẽ wã. B rɩkda ligd kãng n sõngd neb nins yel-beed sẽn paamã, la b teend tẽebã tʋʋm a taaba. La ned sã n yak yam t’a pa na n ning ligd ning a sẽn dat tɩ b rɩk n sõng nebã koe-moonegã ligd koglgẽ, d na n kell n deega a kũunã n tɩ sõng zĩig ning fãa b sẽn dat sõngre. Baasg zãnga, yɩta sõma t’a soab ra wilg a sẽn dat tɩ d rɩk ligd kãng n tʋm to-to ye.

⁵ D sã n ningd ligda fãa koe-moonegã koglgã pʋgẽ, kɩtdame tɩ d tõe n yã ligd tɩ sek n tʋm tʋʋm nins sẽn tar loees ne koe-moonegã, la d ra rɩk fãa n bĩng n gũud yel-beed sẽn na n wa yĩng ye. Rẽ zemsa ne tagsg ning sẽn be Efɛɛz rãmb 4:16 pʋgẽ wã. Be b yeelame tɩ tõnd sẽn naagd taab n tʋmdẽ wã “sõngda yĩnga fãa tɩ bɩ, la a sõngda a meng ne nonglem.”