Yãmb kambã tõe n dɩka sard sẽn wilgd tɩ b yamã wekame bɩ?
1. Sard bʋg la kom-bɩɩs sẽn yaa a Zeova Kaset rãmb rɩk zɩɩmã wɛɛngẽ? Kõ-y makre?
1 Sard sẽn wilgd tɩ yamã weka bõe wɛɛngẽ? Zɩɩmã reegr wɛɛngẽ. Wa sõsg ning sẽn be yʋʋmd 1991 sigr kiuug rasem 15 Gũusg Gasgã pʋgẽ gom-zug sẽn yet tɩ “D kẽn wala sẽn zems a Zeova noyã” sẽn wilgã, a Zeova Kaset rãmb kamb n dɩk sard b toor n wilg tɩ b tʋll n saka noor ning Wẽnnaam sẽn kõ zɩɩmã wɛɛngẽ wã ne b sũy fãa wala b roagdbã. Rẽ yĩnga yãmb kamb nins sẽn nan pa sek b mens laloa wã nifẽ wã me tõe n wa segd n maana boto bɩ?
2. No-bʋg la bʋʋd-roog a ye tik n kao biig sẽn tõdg t’a kõn deeg zɩɩm bʋʋdo, la rẽ zãmsda roagdb nins sẽn yaa kiris-nebã ne b kambã bõe?
2 Laloa wã yetame tɩ bõe? Etazĩni, yaa Ilinoa soolmã pʋgẽ bʋ-kaoodb sul-kãsengã n zoe n bʋ kamb sẽn nan pa sek b mens laloa wã nifẽ sẽn tõdg tɩ b kõn deeg zɩɩmã bʋʋdo. Bʋ-kaoodb sul-kãng sẽn wa n lebg n dɩk yʋʋm 17 bipugl sẽn yaa a Zeova Kaset soab bʋʋdo, b yeela woto: “Kaset sã n be n wilgdẽ tɩ biigã bɩʋʋng seka a tõe n bãnga a tʋʋmã sẽn tõe n wa ne biis ninsi, la a sã n tõe n tagsa wa kãsmã, rẽnd a tẽebã kõt-a-la sor wa sẽn zems ne laloa wã t’a sak wall a tõdg tɩbsgo.” Dẽnd sẽn na yɩl n bãng biig sã n bɩɩme n tõe n dɩk sard a toor bɩ a pa tõe, logtoɛɛmb bɩ neb b sẽn kõ sor tõe n soka bãadã t’a wilg bũmb ning sẽn kɩt t’a tõdg t’a kõn deeg zɩɩmã. Biigã meng segd n sɩd bãnga a bãagã keelem sẽn ta zĩig ninga, sard ning a sẽn na n dɩkã sẽn tõe n wa ne biis ninsã, la a wilg bũmb ning a sẽn tẽed noor ning Wẽnnaam sẽn kõ zɩɩmã wɛɛngẽ wã vẽenega.
3. Sogs-bʋs zut la roagdbã segd n tags neere, la bõe yĩnga?
3 Yãmb biigã na n yeelame tɩ bõe? Yãmb kambã tõe n wilga bũmb ning sẽn kɩt tɩ d pa reegd zɩɩmã bɩ? B saka ne b sũy fãa tɩ Wẽnnaam sɩd yeelame tɩ b lak b mens ne zɩɩmã bɩ? (Tʋʋ. 15:29; 21:25) B tõe n tika Biiblã n wilg rẽ bɩ? Logtoɛɛmbã sã n yeel-b tɩ b vɩɩmã bee yell pʋgẽ, b na n tõoga ne raood n tõdg zɩɩmã baa b roagdbã sã n pa be be bɩ? Sẽn mik tɩ yel-lingdem paamda d fãa wã, wãn-wãn la y tõe n segl y kambã tɩ makr a woto buud taoor bɩ b tõog n kell n tall b kɩs-sɩdã Wẽnnaam taoore?—Koɛ. 9:11; Ef. 6:4.
4, 5. a) Zɩɩb bʋg la roagdbã tara, la wãn to la b tõe n tʋk zɩɩb-kãnga? b) Bõe la b maan n na n sõng roagdbã?
4 Roagdba, bõe la yãmb tõe n maane? Y segdame n zãms y kambã tɩ b bãng Wẽnnaam sẽn yet bũmb ning zɩɩmã zugã. (2 Tɩm. 3:14, 15) Bilgr sẽn yaa fasɩ bee Comment raisonner wã seb-neng 359-62 wã pʋgẽ. Zãms-y-yã-a neer ne y zakã rãmba. Tik-y seb-neng 362-4 gom-zu-bilã sẽn yaa: “Ned sã n yeel-yã,” n zãms y kambã b sẽn tõe n wilg bũmb ning b sẽn tẽedã la a võor to-to. (1 Pɩɛ. 3:15) Sɛb a taab me sẽn tõe n kõ-d kibay takɩ zɩɩmã yell wɛɛngẽ yaa Comment le sang peut-il vous sauver la vie ? seb-bilã la yʋʋmd 2004 sigr kiuug rasem 15 Gũusg Gasgã, a seb-neng 14-24. Sẽn paase, DVD (Des alternatives à la transfusion—Documentaires) ning pʋgẽ Soigner sans transfuser: besoins et droits du patient la Pas de sang : la médecine relève le défi wã filim dãmb sẽn be wã kõt-d-la kibay sẽn kɩtd tɩ d tõe n kɩs sɩd tɩ yaa yam bũmb tɩ d ra tɩp d meng ne zɩɩm wall d reeg zɩɩm woperasõ sasa ye. Yãmb zakã rãmb gesa filim kãensã sẽn nan pa kaoos la b sõs b zut bɩ?
5 Sõng-y y kambã tɩ b bãng bũmb ning sẽn yaa sõma, la sẽn tat Wẽnnaam yam, la sẽn zems zãng zɩɩmã wɛɛngẽ wã b toore. Woto, b na n tõog n dɩka sard sẽn na n kɩt tɩ b paam a Zeova barka.—Rom 12:2.