D wilg tɩ nebã yell pak-d lame, n sokd-b sogsg la d kelgd-ba
1 Neb wʋsg nong n sakd n togsda b tagsg b sã n sok-b bũmbu, la b yaool n pa rat tɩ b zãms-b wall b sogs-b sogs-tood ye. Tõnd sẽn yaa koe-moondbã yĩnga, d segd n bãnga d sẽn na n tũnug ne sogsg to-to n tõog n bãng nebã tagsgo.—Yel. 20:5.
2 Tõnd sogsgã segdame n kɩtdẽ tɩ nebã tagsdẽ, la b pa segd n ningd-b yãnd ye. Koe-moonegã zak-zakã sasa, saam-biig a ye nong n sokda neba woto: “Yãmb tagsdame tɩ wakat n na n wa zĩnd tɩ nebã fãa waoogd taab bɩ?” A tikda a kɛlgdã sẽn leok to-to wã zug n sok-a woto n paase: “La yãmb tagsdame tɩ sẽn na yɩl tɩ rẽ tõog n yɩ, bõe la b segd n maane?” Bɩ: “Bõe yĩng tɩ yãmb tagsd woto?” Saam-biig a ye me sã n wa n kõt kasetã zãmã zĩisẽ, a sokda sẽn tar-b kambã woto: “Bõe n noom yãmb n tɩ yɩɩd y sẽn yaa roagdã yĩnga?” Dẽ poore a sokda woto: “La bõe n pak yãmb n tɩ yɩɩda?” Sogs-kãensã buudã kɩtdame tɩ ned togs a sẽn tagsd n pa zoe rabeem bɩ yãnd ye. Yɛlã sẽn pa a ye zĩig zãnga yĩnga, d tõe n toeema sõsgã la d sogsgã sẽn na yɩl tɩ zems ne d moonegã zĩig nebã.
3 D kɩt tɩ nebã sõs ne-do: Nebã sã n dat n togs b sẽn tagsde, d segd n maaga d yĩng n kelg-b n da kʋʋg b goamã zaalem ye. (Zak 1:19) D reeg b goamã noog-noogo. (Kol. 4:6) D tõe n yeela woto bala: “Yaa sõma wʋsgo. Bark y sẽn sak n wilg-m woto wã.” Sã n segd bɩ y pẽg-ba. Sok-y-b sogsg a taab ne bʋgsem n bãng b tagsg n paase, la bũmb ning sẽn kɩt tɩ b yet rẽ wã. D bao bũmb ning bãmb mensã sẽn sak n deeg tɩ yaa sɩdã, n sõs rẽ zugu. D sã n dat n wilg-b verse, d tõe n yeela woto: “Yãmb da zoe n tagsame tɩ woto yaa bũmb sẽn tõe bɩ?” D ra bao n modg-b tɩ b tẽ d sẽn yetã tɩlae bɩ n wẽ no-koɛɛm neb ye.—2 Tɩm. 2:24, 25.
4 Nebã sẽn leokd tõnd sogsgã ne manesem ningã bee ne tõnd sẽn kelgd-b to-to wã n yɩɩda. Nebã tõe n bãnga tõnd sã n sɩd kelgd-b-la ne d sũur fãa. Kaagr yel-gɛt a ye yeela woto: “Y sã n maag y yĩng n kelg nebã, tõe n kɩtame tɩ b sak sɩdã la b bãng tɩ b yell sɩd pak-y lame.” D sã n kelgd nebã, d waoogd-b lame, la rẽ tõe n kɩtame tɩ b kelg koe-noogã d sẽn dat n taas-bã.—Rom 12:10.