D wilg tɩ nebã yell pak-d lame, n yaa wʋmdb la d waoogd-ba
1 ‘A Zeova yaa sũ-bʋgsem soaba.’ (Yɩɩl 145:8) Baa ne a sẽn yaa ãndũniyã fãa naabã, a nanda ninsaalbã sẽn yaa pãn-komsem dãmbã, n waoogd-b la a wilgdẽ t’a yaa wʋmda. (Sɩng. 13:14; 19:18-21, 29) D sã n dɩk d Wẽnnaamã sẽn yaa sũ-bʋgsem soabã togs-n-taare, na n paasa d koe-moonegã sõmblem. (Kol. 4:6) Sẽn na yɩl n maan boto, pa ne d no-goamã bal la d segd n waoogd nebã ye. D tog n maaname tɩ yɩɩg rẽ.
2 D sã n wa moond zak-zaka: D sã n kẽ ned zakẽ n mik t’a soabã tʋmdame n pa tar sẽk baa bilf n na n kelg-do, d segd n maana wãna? Yɩta sõma tɩ d sõs koɛɛg-koɛɛg wall d wilg tɩ d na n lebg n waa nindaare. D sã n kãab ned d sɛbã t’a tõdge, d pa na n modg-a ye. D sã n nand nebã, na n kɩtame me tɩ d waoogd-ba, n lebsd n pagd b zagsã noyã, la d zãms d kambã me tɩ b maand boto. D sã n pa mik ned a yir n yãk sebr bɩ seb-vãoog n na n base, d pa na n ning-a zĩig ning so-loaadbã sẽn na yã ye. Sãmbg sẽn ka be, d sẽn waoogd nebã na n kɩtame tɩ d maand-b wa d sẽn dat tɩ bãmb me maand tõnd to-to wã.—Luk 6:31.
3 Soayã noy moonegã sasa: D sã n wa moond soayã noyã, d tõe n wilgame tɩ d nanda nebã, n da yãmbd zĩigã tɩ naoã rãmb pa tõe n looge, la d ra gũmd koosmã taoor ye. D na n bãngda neb nins sẽn tar sẽk bilfã la sẽn pa tar-b sẽk lae-laeyã n welge. D sã n ne vẽeneg tɩ ned yãgdame, d pa na n bao n na n sõs ne-a ye. Wakat ninga, bʋrgã yĩnga, d segd n zẽka d koɛɛgã sẽn na yɩl tɩ kɛlgdã wʋm-do, la d n maana zem-zem tɩ nebã ra wa ges-d ye.—Mat. 12:19.
4 D sã n kõt kasetã ne telefõnne: D sẽn waoogd nebã yĩnga, d sã n wa na n kõ ned kasetã ne telefõnne, d na n baoa zĩig bʋrg sẽn kaẽ. D na n yɩɩ tao-tao n deng n togs d yʋʋr la d sondre, la d wilg tɩ d yaa a Zeova Kaset soaba, tɩ rẽ poor bɩ d wilg d boollã võore. D sã n gomd tɩ kẽed telefõnnã pʋgẽ la d manegd d koɛɛgã tɩ be yamleoogo, d na n paam n sõsa ne nebã Biiblã zug sõma. (1 Kor. 14:8, 9) D sã n wilgdẽ tɩ d yaa wʋmdb la d waoogd nebã, d rɩkda d Wẽnnaam a Zeova sẽn yaa sũ-bʋgsem soabã togs-n-taare.