Y sẽn tõe n pids bũmb nins y sẽn dat n maan tẽebã pʋgẽ wã to-to
1. Tʋʋm-bʋs la kom-bɩɩs wʋsg sẽn yaa kiris-neb rat n wa tʋme?
1 Yãmb sã n yaa kiris-ned n yaa bi-bɩɩga, yaa vẽeneg tɩ nonglem ning y sẽn tar ne a Zeova wã, la a Zezi sẽn sagl kiris-nebã tɩ b “reng n bao Wẽnnaam soolmã” kɩtame tɩ y rat n maan bũmb tẽebã tʋʋm pʋgẽ. (Mat. 6:33) Sẽn na yɩl n yalg y koe-moonegã, y tõe n dat n yɩɩ so-pakd n tɩ sõng n moon zĩis nins b sẽn dat koe-moondb wʋsgã. Kom-bɩɩs kẽer tõe n dat n wa tɩ tʋma ne sull ning sẽn met Rĩungã Rotã, pa rẽ bɩ n wa tɩ tʋm Betɛllẽ, tɩ sãnda magd n na n wa yɩ zall so-pakdb wall misioneer dãmba. Tʋʋm kãensã fãa sɩd yaa tʋʋm sẽn zems pẽgr la sẽn kõt sũ-noogo!
2. Bõe n tõe n sõng-y tɩ y wa tõog n tʋm tʋʋm nins y sẽn dat n tʋm tẽebã pʋgẽ wã?
2 Bũmb sẽn tõe n sõng-y tɩ y wa tõog n pids tʋʋmd ning y sẽn dat n wa tʋma, yaa y sẽn na n gʋls-a n bĩngi. Yʋʋmd 2004 sẽoog kiuug rasem 15 Gũusg Gasgã yeela woto: “F sã n wa tõog n yã gom-biis n na n togs bũmb f sẽn tags f yamẽ wã, a lebgda vẽenega. Woto, f tõogd n gʋlsa bũmb ning f sẽn datã la f sẽn na n maan to-to n tõog n maan-a wã sebr zug n bĩngi.” Sẽn paase, y sã n sɩng yɛl kẽer maaneg bilf-bilfu, na n sõng-y lame tɩ y bãng y sã n na n wa tõog n pidsa bũmb ning y sẽn dat n wa tʋm kaoosg zugẽ wã.
3. Sõdg-y yɛl kẽer ned sẽn tõe n yãk yam n deng n maan tɩ wa sõng-a t’a pids yɛl nins b sẽn baood tɩ d pids n tõog n deeg lisgã.
3 Bũmb nins y sẽn tõe n deng n maandẽ: Y sã n nan pa reeg lisg bɩ y bao n bãng bũmb ning y sẽn segd n maan n tõog n deeg lisgã. Tõe tɩ y segd n deng n bao n wʋma Biiblã zãms-yẽgã võor sõma. Sã n yaa woto bɩ y yãk yam n karem Biiblã yetame sebrã ne a verse rãmbã fãa fasɩ. (1 Tɩm. 4:15) Yãk-y yam me n karem Biiblã gilli, Sɩngr sebrã n tɩ tãag Wilgr sebrã, wa b sẽn baood tɩ Betɛllã neb la Gileaad karen-biisã maan to-to wã. Rẽ poor bɩ y kell n yãk wakat daar fãa pʋgẽ n karemd Biiblã. (Yɩɩl 1:2, 3) Ad rẽ maaneg sɩd na n sõng-y lame tɩ y bɩ tẽebã wɛɛngẽ! Sɩngd-y Biiblã zãmsg ne pʋʋsgo, la y baasd y zãmsgã me ne pʋʋsgo, la y modg n tũ bũmb nins y sẽn zãmsdã wakat fãa.—Zak 1:25.
4. Bõe la kiris-ned sẽn dat n wa tɩ tʋm Betɛllẽ bɩ n yɩ misioneer tõe n yãk yam n deng n maandẽ?
4 Y sã n zoe n deega lisgu, bõe me la y tõe n maan n paase? Y tõe n paasa y koe-moonegã minim. Wala makre, y tõe n yãka yam n bao n bãng y sẽn tõe n tall Wẽnnaam Gomdã n tʋm sõma to-to n paas koe-moonegã pʋgẽ. (2 Tɩm. 2:15) Wãn to la y tõe n paas y koe-moonegã? Yãk-y bũmb nins y sẽn na n deng n maand bilf-bilfã tɩ zems ne y yʋʋmã la y yɛlã sẽn yaa to-to wã, tɩ wa sõng-y tɩ y tõog n maan bũmb ning y sẽn dat n maan kaoosg zugẽ wã.
5. Wãn-wãn la saam-biig a ye sẽn da rat n wa tɩ tʋm Betɛllẽ seglg a meng n wa tõog n kẽng be?
5 Bi-bɩɩg a ye sẽn tõog kibare: A Tony sẽn wa n tar yʋʋm 19, a tɩ gesa a Zeova Kaset rãmbã tʋʋmd willi, tɩ kɩt t’a tʋlg n wa tʋm Betɛllẽ. La a Tony vɩɩm manesmã ra pa sõma ye. Sẽn paase, a ra nan pa rɩk a meng n kõ Wẽnnaam ye. Woto kɩtame t’a yãk yam n na n maaneg a vɩɩmã tɩ zems ne a Zeova noyã, la a bao n pids yɛl nins b sẽn baood tɩ b pids n tõog n deeg lisgã. A sẽn tõog n maan dẽ wã poore, a yãka yam n na n wa yɩ sõngr so-pakda tɩ rẽ poor bɩ a yɩ wakat fãa so-pakda, n gʋls wakat nins a sẽn na n sɩngã n bĩngi. Tags-y n ges-y sũ-noog ning a sẽn paame, a sẽn wa n lebg so-pakdã poor tɩ b bool-a t’a wa tʋm Betɛllẽ wã!
6. Bõe n tõe n sõng-y tɩ y tõog n pids tʋʋm nins y sẽn dat n wa tʋm tẽebã pʋgẽ wã?
6 Yãmb me sã n lʋɩɩsda Wẽnnaam Rĩungã tʋʋmd taoore, y na n tõog n pidsa tʋʋm nins y sẽn dat n tʋm tẽebã pʋgẽ wã. Rɩk-y y “yɛla fãa” n bas ne a Zeova y pʋʋsg pʋgẽ, la y modg ne y sũur fãa n pidsd-ba.—Yel. 16:3; 21:5.