Yãk-y bõn-datɩ tẽebã wɛɛngẽ
1 Ad na yɩ waoogr meng n kõ-do, tɩ d tõog n pẽg a Zeova wakat sẽn-kõn-sa! Bũmb ning sẽn na n sõng-d tɩ d pids bõn-datl kãng yaa d sẽn na n yãk bõn-datɩ tẽebã wɛɛngẽ masã n modg n pids-ba. Woto na n sõnga tõnd tɩ d rɩk d pãngã n tʋm ne yam. (1 Kor. 9:26) Bõn-datɩ bʋs n zems y nug tɩ y tõe n pidsi?
2 Biiblã zãmsgo: Yãmb segenda tigingã tigiss fãa bɩ? Sã n yaa woto, rẽ yĩnga yãmb dɩkda sẽk n maand vaeesg la y bʋgsd y zãmsgã wakat bɩ? Wala makre, semen fãa yãmb sã n wa segend Gũusg Gasgã bɩ sebrã zãmsgo, yaa leoorã bal la yãmb rẽesd bɩ, bɩ y leb n gẽesda verse rãmbã la y bʋgsd yɛlã võor b sẽn wilgã zugu? Y tõe n yãka bõn-datl semen fãa sẽn yaa maan vaeesg tagsa kẽer sẽn yit Biiblã kareng b sẽn yeel tɩ maand Wẽnnaam Tʋʋmdã lekoll yĩngã pʋgẽ. Vaeesg a woto tẽebã yɛl wɛɛngẽ baoodame tɩ d rɩk sẽk la d maan modgre, la a wata ne bark wʋsg tẽebã wɛɛngẽ.—Yel. 2:4, 5.
3 Tigingã Tigissi: Bõn-datl a to d sẽn tõe n yãk yaa kẽngd tigingã tigiss a nu wã fãa n ka vaandẽ ye. D sã n tat Rĩungã Roogẽ pĩnd n sõsd ne d tẽed-n-taasã la d naagd-b n yɩɩnd sɩngr yɩɩllã la d kelgd pʋʋsgã, kengda tigingã neb pels la paasd b sũ-noogo. D leb n tõeeme n mao n kõo leoor tigisg fãa la d modg tɩ d leoorã yɩt sõma n paasdẽ. Y tõeeme n wilg verse sẽn be sullã pʋgẽ sẽn zems ne bũmb ning zug b sẽn sõsda to-to, bɩ y wilg sõasgã tagsa sẽn tɩ loe ne daar fãa vɩɩmã to-to.—Heb. 10:24, 25.
4 Koe-moonegã: D moonegã lebgda sõma wʋsg n paas me, d sã n yãk bõn-datɩ. Rẽ yĩnga yãmb yãka bõn-datl sã n yaa ne lɛɛr dãmb sõor y sẽn na n moon kiuug fãa bɩ? Neb kẽer yãame tɩ woto sɩd sõng-b lame. Bɩ y tõeeme n maan tɩ yɩ sõma n paas koe-moonegã nens kẽer pʋsẽ, wala karem Biibl verse rãmb zak-zak moonegã wakate, lebg-n-tɩ-ges rãmb sẽn yaa sõma n yɩɩd maanego, modg n sɩng Biibl zãmsg ne nebã, bɩ n zãmsd nebã sõma n yɩɩda, d sã n wa zãmsd-b Biiblã bɩ?
5 Roagdba, yãmb sagenda y kambã tɩ b yãk bõn-datɩ a Zeova balengã pʋgẽ bɩ? Sõng-y-b tɩ b bãng tɩ b sã n yɩ so-pakdb bɩ Betɛllã neba, b tõe n wilgame tɩ b tara mi-beoog wʋsg ne a Zeova.—Koɛ. 12:1.
6 D sã n vaeesd d tʋʋma, n yãkd bõn-datɩ tẽebã wɛɛngẽ la d modgd n pidsd-ba, d na n paama sũ-noog n paas d Wẽnd balengã pʋgẽ, la d keng neb a taaba raoodo.—Rom 1:12.