D sõng d Biibl karen-biisã tɩ b nong a Zeova zʋgdã sẽn yaa sõma wã
1 Koɛɛgã mooneg la karen-biisã maaneg tʋʋmd pʋgẽ, pa Biiblã bal la d zãmsd nebã ye. D sõngd-b lame me tɩ b bãngd a Zeova sẽn yaa a soaba, n kɩtdẽ tɩ b nong a zʋgã sẽn yaa sõma wã. Sũ-tɩrs rãmbã sã n wa bãng Wẽnnaam sẽn sɩd yaa a soabã sõma, kɩtdame tɩ b mao ne b sũy fãa n toeem b vɩɩmã, tɩ b “kẽnda zems Zusoaba waoogre la a ta bãmb yam ne bũmb fãa.”—Kol. 1:9, 10; 3:9, 10.
2 Biiblã zãmsg seb-paallã: Biiblã yetame sebrã sɩngrẽ bala, b wilgda a Zeova zʋgdã sẽn yaa sõma wã. Pipi sakã pʋgẽ menga, b leokda sogs-kãensã sẽn yaa kãsemsã: Yãmb yell sɩd paka Wẽnnaam bɩ?, Wẽnnaam yaa wãn to?, la D tõe n pẽnega Wẽnnaam bɩ? Sag-kãng pʋgẽ me b wilgda vẽeneg t’a Zeova yaa sõngo (sull 10), t’a yaa tɩrga, t’a sẽn get nebã sẽn namsdã a sũur sãamdame (sull 11). B leb n wilgda a nonglmã (sull 13), a pãngã (sull 16), b wilgdame t’a yaa nimbãan-zoɛt la bark kõta, t’a kõta sugri, t’a yaa sũ-mar soaba, la sɩd soaba (sull 19). Sull 20 wã kʋmsda sõsgã n yet woto: “Y sã n bãngd a Zeova n paasdẽ, a na n yɩɩ vẽeneg ne-y n paase, la y na n nong-a lame la y pẽneg-a n paase.”
3 Wãn-wãn la d tõe n tall Biiblã yetame sebrã n sõng nebã tɩ b pẽneg a Zeova? Y sã n wa sõsd sull sẽn gomd a Zeova sẽn yaa a soabã zugu, y tõe n soka karen-biigã woto: “Bõe la woto zãmsd yãmb a Zeova zugu?” Pa rẽ bɩ y sok-a woto: “Wãn-wãn la woto wilgd tɩ yãmb mengã yell paka Wẽnnaam?” D sã n mi n sogsd sogsg a woto buud zãmsgã sasa, d wilgda d karen-biisã tɩ b segd n bʋgsda b sẽn zãmsd bũmb ninsã zugu. Woto na n kɩtame me tɩ b nong a Zeova zʋgdã sẽn yaa sõma wã n paasdẽ.
4 Tik-y zãmsgã baasgẽ zĩ-gũbrã n maan sogsgo: Sak fãa baasgẽ, zĩ-gũbr n be t’a gom-zugã yaa: “Biiblã sẽn yet bũmb ninga.” Zãmsg fãa baasgẽ, bɩ y sok karen-biigã a tagsg sẽn yaa a soab ne goam nins sẽn be zĩ-gũbrã pʋgẽ wã. Sõng-y-yã-a t’a tags verse rãmbã zugu. Sẽn na yɩl n bãng bũmb ning sẽn be karen-biigã sũurẽ, y tõe n mi n sok-a-la woto: “Yãmb tagsg yaa bõe ne Biiblã sẽn yet bũmb ning yel-kãngã wɛɛngẽ wã?” Y sã n maand woto, karen-biigã na n bãnga zãmsgã tags-kãsems vẽenega, la y na n bãnga a tagsg sẽn sɩd yaa a soaba. Woto na n kɩtame tɩ karen-biigã sɩng zood baoob ne a Zeova.