La Révélation : le grand dénouement est proche !
1 “Bark be ned ninga sẽn karemd bãngr-gom-kãngã la neb nins sẽn kelgd-a la sẽn deegd bũmb nins sẽn gʋls yẽ pʋgẽ wã zutu. Tɩ bõe, wakat kolgame.” (Wil. 1:3) Gom-kãensã wilgda Wilgr sebrã yõodo. Sẽn yɩɩd fãa, d nee a yõodã d sẽn mi tɩ d vɩya wakat ning a bãngr-goam wʋsg sẽn segd n pidsã pʋgẽ wã. Dẽnd d sẽn na n zãms La Révélation : le grand dénouement ! sebrã d sulẽ wã zemsame. Yaa yʋʋmd 2007 wã yʋʋm-vẽkr kiuug rasem a 8 semennã la d na n sɩng-a.
2 D sẽn zãms seb-kãngã pĩndã tɛk n tãag masã, dũniyã toeema wʋsgo. (1 Kor. 7:31, Sebr Sõngo) Sẽn paase, neb wʋsgo n lebg Rĩungã koe-moondba, la b zɩ n zãms Wilgr sebrã zãng ye. A zãmsgã segd n kenga d fãa tẽebã tɩ d kell n gũ bũmb nins sẽn watã.—Wil. 16:15.
3 Modg-y n da tol n vaal zãmsgã semen baa a yembr ye. Zãms-kãngã na n sõng-d lame tɩ d ket n gũusdẽ, la sẽn paase, koees nins a Zezi sẽn taas tigims a yopoeyã na n sõng-d lame tɩ d gil yɛl sẽn tõe n koms d tẽebã la boog d koe-moonegã.—Wil. 1:11, 19.
4 Segend-y sebrã sõma: Nand tɩ y sɩng zãmsg fãa, y segd n deng n karma Wilgr sebrã verse nins b sẽn na n wɛgsã. Ges-y b sẽn wɛgs verse wã to-to sebrã pʋgẽ wã neere. Modg-y n wʋm-y-yã a võorã sõma sẽn na yɩl t’a kẽ y sũurã. (Neh. 8:8, 12) Rɩkd-y sẽk n bʋgsd-y sõssã zutu, la y sokd y meng woto: ‘Bõe la woto wilgd-m a Zeova zugu, la a raabã pidsg zugu? Wãn to la m tõe n tʋm tɩ zems ne a raabã la m sõng neb a taabã?’
5 ‘Zusoaba raar’ sẽn sɩng yʋʋmd 1914 tɛkã n tãag rũndã-rũndã wã yʋʋm pis-wae la yiib la woto. (Wil. 1:10) Yel-kãsems nins b sẽn deng n togs Wilgr sebrã pʋgẽ wã kolga pidsgu. Révélation : dénouement sebrã zãmsg na n kenga d tẽebã la tẽeg-d tɩ ‘Wẽnnaam Sẽn-tõe-fãa da-kãsenga zabr’ la dũni paalgã kolgame.—Wil. 16:14; 21:4, 5.