Zãms-y y kambã tɩ b pẽg a Zeova
1. Rẽ yĩnga kambã tõe n pẽga a Zeova bɩ?
1 Yɩɩl Sõamyã 148:12, 13 pʋgẽ, b sagenda kom-dibli wã ne kom-pugli wã tɩ b ‘pẽg a Zeova yʋʋrã.’ Biiblã gomda kamb wʋsg sẽn pẽg a Zeova yelle. Wala makre, a Sãmwɛll ra tʋmda a Zeova tʋʋmã, a sẽn da yaa biigã. (1 Sãm. 2:18) Yɩɩ bi-pugl kɩdg n togs a Naama pagã t’a Zeova no-rɛɛs a ye n be Israɛll n tõe n sãoog a sɩdã wãoodã. (2 Rĩm 5:1-3) A Zezi sẽn wa n kẽ wẽnd-doogã pʋgẽ n maan yel-soalmã, yɩɩ “kamb” n da kaasd n yetẽ tɩ: “Hosanna! a Davɩɩd Biiga.” (Mat. 21:15) Wãn to la roagdbã tõe n zãms b kambã tɩ b pẽg a Zeova?
2. Bõe yĩng tɩ roagdbã segd n kõ b kambã mak-sõngo?
2 Kõ-y y kambã mak-sõngo: Nand tɩ Israɛll nebã zãms b kambã tɩ b bãng sɩdã, b ra reng n zãmsa ba-rãmbã tɩ b nonga a Zeova la b sak a noyã ne b sũy fãa. (Tõo. 6:5-9) Yãmb sã n nong n gomd koɛɛgã mooneg sẽn wat ne nafa ninsã yelle, la y moond koɛɛgã semen fãa, na n kɩtame tɩ y kambã bãng tɩ koe-noogã mooneg tara yõodo, la kõt sũ-noogo.
3. Wãn to la saam-bi-poak a ye roagdb mak-sõng naf-a?
3 Saam-bi-poak a ye yeela woto: “Mam sẽn wa n yaa biiga, tõnd zakã rãmb ra nong n moonda koɛɛgã semen fãa. Mam bãngame tɩ mam roagdbã ra nonga koɛɛgã moonego. Tõnd sẽn wa n lebg kãsembã, d gesa koɛɛgã mooneg wa bũmb sẽn kõt sũ-noog wʋsgo.” Saam-bi-poakã wa n lebga koe-moond sẽn pa reeg lisgu, a sẽn wa n tar yʋʋm a yopoe. La yʋʋm 33 la woto, a sẽn dɩk so-pakrã.
4. Zãms kambã tɩ b kẽngd taoor bilf-bilf rat n yeelame tɩ bõe?
4 Zãmsd-y y kambã tɩ b kẽngd taoor bilf-bilfu: Kɩt-y tɩ y kambã naag-y n moone. B tõe n kogsda zagsã noyã, n kõt kɛlgdbã seb-vãado, pa rẽ bɩ n karem verse. Woto na n paasa b sũ-noogã, la sõng-y-b tɩ b bãng tɩ bãmb me tõe n moona Rĩungã koɛɛgã. B sã n wa lebgd kãsemba, b segd n kẽesda b mens koe-moonegã pʋgẽ n paasdẽ. Rẽ n so tɩ y segd n sõng-b tɩ b kẽng taoore, la b tags n bãng bũmb ning b sẽn na n wa maan Wẽnnaam tʋʋmdã pʋgẽ.
5. Bõe ne bõe n yaa tɩlae, sẽn na yɩl tɩ biig lebg koe-moond sẽn pa reeg lisgu?
5 Y sã n wa bãng tɩ y kambã baood n na n lebga koe-moondba, la yãmb mengã sã n mi tɩ b sɩd tõe n maana rẽ, bɩ y togs kãsem dãmbã. B sã n wa lebg koe-moondba, na n kɩtame tɩ b bãng vẽeneg tɩ bãmb me segd n pẽga a Zeova. Tẽeg-y tɩ pa tɩlae tɩ biig bãngr ta kãsem sẽn deeg lisgu, n yaool n tõog n sɩng koɛɛgã mooneg ye. Rẽ yĩnga yãmb biigã wʋmda Biiblã zãms yẽgã võor bɩ? A manesmã wilgdame t’a tũuda Biiblã noyã bɩ? A ratame n kẽes a toog koe-noogã mooneg pʋgẽ, la a kɩt tɩ nebã bãng t’a yaa a Zeova Kaset soab bɩ? Sã n yaa woto, kãsem dãmbã tõe n gesa b sã n tõe n sakame t’a lebg koe-moond sẽn pa reeg lisgu.—Ges-y Organisés pour faire la volonté de Jéhovah sebrã neng 79-82.
6. Bõe yĩng tɩ roagdbã segd n zãms b kambã?
6 Yɩl n tõog n zãms kambã tɩ b pẽg a Zeova ne b sũy fãa, baooda modgre. La bũmb baa a ye pa kõt roagdbã sũ-noog n yɩɩd b sẽn na n neẽ tɩ b kambã kẽngda taoor tẽebã wɛɛngẽ ye. Sẽn yɩɩd fãa, a Zeova sũur yɩta noogo, kambã sã n gomd a tʋʋm kãsemsã yelle.