D sũy nooma d sẽn kẽesd d mens zãng a Zeova tʋʋmdã pʋgẽ wã!
1 Tʋm-tʋmd a Poll sũur da nooma ne a sẽn kõ a mengã fãa sẽn na yɩl n moon koɛɛgã. (2 Kor. 12:15) Rũndã-rũndã me, kiris-neb wʋsg rɩka so-pakrã, n tʋmd ne b sũy fãa. Neb kẽer sẽn tar zɩɩb wʋsg b zagsã rãmb yell gesg wɛɛngẽ baoa sẽk sẽn na yɩl n tõog n moon koɛɛgã semen fãa. Baa ne sãnda me sẽn yaa bãad rãmb n pa tar pãng wʋsgã, b modgdame n teend koɛɛgã moonego. A Zeova nin-buiidã sẽn kẽesd b mens zãng-zãng a tʋʋmdã pʋgẽ baa ne kʋʋlmã la yɛl a taabã sɩd kengda raoodo!
2 D nong d taabã: D sã n maand d sẽn tõe fãa n tʋmd a Zeova tʋʋmdã, n nong-a la d nong neb a taabã, kɩtdame tɩ d sũur kasetã ra ning d taal ye. A Poll sẽn kẽes a meng zãng-zãng koe-noogã mooneg pʋgẽ wã yĩng kɩtame t’a ra tõe n yeel woto: ‘Mam togsda yãmb dũnda tɩ [ned baa a ye] zɩɩm ka be mam zug ye.’ (Tʋʋ. 20:24, 26; 1 Tes. 2:8) D sã n maand d sẽn tõe fãa n kẽesd d mens koe-noogã mooneg pʋgẽ, na n kɩtame tɩ d ra wa tall zɩɩm samd ye.—Eze. 3:18-21.
3 D paamda sũ-noogo, d sã n maand d sẽn tõe fãa n sõngd neb a taabã. (Tʋʋ. 20:35) Saam-biig a yembr yeela woto: “Yaa sɩd tɩ mam sã n wa tʋm a Zeova tʋʋmdã n sig zaabre, m mi n yɛɛme. La mam sũur yaa noogo, m pʋʋsda a Zeova bark a sẽn kɩt tɩ m paam sũ-noog wʋsg tɩ ned pa tõe n deegã.”
4 D nong Wẽnnaam: Bʋʋm kãseng ning sẽn kɩt tɩ d segd n kẽes d mens zãng-zãng a Zeova tʋʋmdã pʋgẽ wã yaa tɩ woto noogda a Zeova sũuri. D sã n nong Wẽnnaam, d na n saka a noyã. Koe-noogã mooneg la karen-biisã maaneg bee no-kãens sʋka. (1 Zã 5:3) Baa nebã sã n pa sakd n kelgdẽ bɩ n kɩɩsd tõndo, d kell n tʋmda ne sũ-noog a Zeova yĩnga.
5 D bee wakat ning pʋgẽ tõnd sẽn pa segd n maag ne koɛɛgã moonego. D vɩya kẽebg wakate. (Mat. 9:37) Ka-koaad rɩkda sẽk wʋsg n tʋmd kẽebg wakate, bala a miime t’a sã n pa kẽeb tao-tao, koodã na n sãamame. Wakat ning sẽn ket tɩ d na n moon koɛɛgã n baasã paoodame. D sẽn mi wakat ning pʋgẽ tõnd sẽn vɩyã sẽn yaa a soabã, bɩ d fãa kell n kẽes d mens zãng-zãng koe-noogã moonegẽ.—Luk 13:24; 1 Kor. 7:29-31.