Toeeng b sẽn maan Gũusg Gasgã yiisg wɛɛngẽ!

¹ Wa b sẽn da zoe n togs tigimsã fãa pʋsẽ wã, sẽn na n sɩng ne yʋʋmd 2008, yʋʋm-vẽkr kiuugã, b na n yiisda Gũusg Gasg a yiibã kiuug fãa tɩ b pa wõnd taab ye. A yembr na n yɩɩ saam-biisã rẽnda, t’a to wã yɩ neb nins sẽn pa a Zeova Kaset rãmbã rẽnda. Tõe tɩ y sokda y meng woto: ‘Seb-kãensã na n yɩɩ toor-toor wãn to? B sẽn na n yiisd-b toor-toorã na n waa ne nafa bʋse? Rẽ yĩnga sõs-paal n na n zĩnd seb-kãensã pʋsẽ bɩ?’

² Bũmb ning sẽn kɩt tɩ b yaa toor-toorã: Gũusg Gasg ning b sẽn na n yiisd kiuugã pipi raarã na n yɩɩ neb nins sẽn pa a Zeova Kaset rãmbã rẽnda. Seb-kãng pʋgẽ sõssã fãa na n yɩɩ nin-kãens yĩnga. La b sẽn na n yiisd a soab kiuugã rasem 15 wã na n yɩɩ saam-biisã rẽnda, la d pa na n kãab nebã seb-kãng d koɛɛgã moonegẽ ye. Seb-kãng na n talla sõss d sẽn na n zãms tigimsẽ wã kiuug a ye pʋgẽ, n paas sõss a taab sẽn na n tall yõod ne neb nins sẽn dɩk b mens n kõ a Zeova wã. Gũusg Gasg ning b sẽn na n yiisd kiuugã pipi raarã na n talla yamleoog ne tõnd a Zeova Kaset rãmbã, la sẽn tɩ yɩɩda ne neb nins sẽn tẽed Biiblã sẽn yet bũmb ninsã n yaool n pa a Zeova Kaset rãmbã. B na n ket n yiisda Réveillez-vous ! wã nebã fãa yĩnga, sẽn dat n yet t’a Zeova Kaset rãmbã, neb nins sẽn yet tɩ b yaa kiris-nebã, la neb nins sẽn maand sãmb-sãmb ne tũudmã.

³ B sẽn na n wa ne nafa ninsi: Kaset rãmbã Gũusg Gasgã pʋgẽ, b pa na n bao n na n wilgd gomd kẽer võore, wala makre ‘so-pakd’ sẽn dat n yɛɛlga, tɩ neb nins sẽn pa a Zeova Kaset rãmb tõog n wʋm ye. Sẽn paase, kibay sẽn na n naf a Zeova Kaset rãmbã la Biiblã karen-biis nins sẽn kẽngd taoor tẽebã wɛɛngẽ wã n tõe n zĩnd seb-kãng pʋgẽ me. La sã n yaa ne Gũusg Gasg a to wã, sõss nins sẽn na n zĩnd be wã, la b sẽn na n gʋls b to-to wã na n yɩɩ neb nins sẽn pa a Zeova Kaset rãmbã yĩngã. Woto yĩnga, a tõrã fãa kareng na n yɩɩ noog la nana ne nin-kãense. La yaa vẽeneg t’a Zeova Kaset soab sã n karemd a yiibã fãa na n naf-a-la wʋsgo. Kiuug fãa d sẽn na n kãabd nebã Gũusg Gasg a ye la Réveillez-vous ! a ye wã yĩnga, d na n paam n dɩkda kiuugã fãa n manegd d sẽn kãabd nebã sɛbã to-to wã tɩ yɩt sõma n paasdẽ.

⁴ Sõs-paalse: Sõs-paal sẽn tar yamleoog n na n zĩnd zãma wã Gũusg Gasg pʋgẽ. Sõsg a ye na n wɛgsda zãmsg kẽer sẽn be Biiblã pʋgẽ, tɩ b võor wʋmb yɩ nana-nana. Sõsg a to na n wilga Biiblã sẽn tõe n sõng zak rãmb to-to. Zĩig n na n zĩnd tɩ d tõe n tik be n zãms kambã Biiblã. Seb a yiibã fãa na n talla sõsg sẽn na n wɛgsd Biiblã zĩis kẽer sẽn wilgd tõnd a Zeova sẽn sɩd yaa a soaba.

⁵ D pʋʋsdame t’a Zeova ning toeeng ning sẽn na n zĩnd Gũusg Gasgã yiisg wɛɛngẽ wã barka. Bɩ d tũnug ne zʋrnall kãngã la ne Réveillez-vous ! wã n sõng neb nins fãa sẽn sɩd rat-bã tɩ b wʋm koe-noogã.—Mat. 10:11.