D ra bas n pa zãms nebã Biiblã ye!
1. Bõe la d tõe n maan n sõng nebã?
1 Tõnd sã n moond Wẽnnaam Rĩungã koe-noogã, wilgdame tɩ d ‘pa zãgsd’ neb nins sẽn be d moonegã zĩigẽ wã sõngr ye. (Yel. 3:27) Koɛɛg ka be n yaa noog tõnd sẽn na n togs nebã n yɩɩd d sẽn na n wilg-b bũmb nins Wẽnnaam Rĩungã sẽn na n wa maan n kõ ãdem-biisã ye. Baa ne d sẽn moond nebã wakat sẽn pa yãk la d kõt-b sɛb n wilgd-b bũmb nins Wẽnnaam Rĩungã sẽn na n wa maanã, d tõeeme me n bao n zãms Biiblã ne-ba, sã n mikame tɩ d nan pa maand woto.
2. Bõe n tõe n wa kɩt tɩ d pa rat n zãms nebã Biiblã?
2 Sasa ninga, yaa tõnd sẽn tagsd to-to wã n mi n kɩt tɩ d pa rat n zãms nebã Biiblã. Neb kẽer mi n tagsdame tɩ b sẽn pa tar minim bɩ sẽkã yĩnga, b pa tõe n zãms nebã Biiblã ye. Sagls nins sẽn pʋgdã tõe n sõnga tõnd tɩ d tõog n zãms nebã Biiblã.—Mat. 28:19; Tʋʋ. 20:20.
3. Bõe n kɩt tɩ d tõe n zãms nebã Biiblã?
3 D sã n tagsdẽ tɩ d pa tõe: Tõe tɩ yaa tõnd sẽn pa karem n zãagã bɩ bũmb a taab n mi n kɩt tɩ d tagsd tɩ d pa tõe n zãms ned Biiblã. La pipi kiris-nebã ra zãmsda nebã sõma baa ne b sẽn da yaa nin-zaals la neb “sẽn ka paam zãmsgã.” Bõe n sõng-b tɩ b tõog n zãms nebã sɩdã? Yaa b sẽn da “be ne a Zezi” wã yĩnga. (Tʋʋ. 4:13) B paama zãmsg Karen-saam Kãseng a Zezi nengẽ. La bũmb nins a sẽn zãms-bã, n paas a sẽn zãms b to-to wã fãa bee Biiblã pʋgẽ tõnd yĩnga. Baa tɩ d pa karem n zãage, d paamda zãmsg sẽn yit Wẽnnaam nengẽ sẽn yaa sõma n yɩɩd zãmsg buud fãa.—Ezai 50:4; 2 Kor. 3:5.
4. A Amos mak-sõngã zãmsda tõnd bõe?
4 Wakat ninga, a Zeova tʋma no-rɛɛsdb tɩ b tɩ wilg nanambs la nin-bɛd tɩ b kongame. No-rɛɛsdbã wʋsg wa a Amos ra pa nin-kãsems ye. A meng yeela woto: “Mam ka bãngd ye, la m ka bãngd biig me ye. Mam yaa pe-kɩɩma la m senda kankamse.” (Amos 7:14) Baa ne rẽ, a Amos sak n tɩ togsa maan-kʋʋd a Amazia sẽn da pʋʋsd nag-bilã a Zeova bʋ-kaoorã koeese. (Amos 7:16, 17) D segd n tẽegda wakat fãa tɩ yaa a Zeova tʋʋmd la d sẽn tʋmdã, la t’a na n sõng-d lame tɩ d tõog n tʋm sõma.—2 Tɩm. 3:17.
5. Baa ne d sẽkã sẽn pa waoogã, bõe yĩng tɩ d segd n modg n zãms nebã Biiblã?
5 D sã n tagsdẽ tɩ d pa tar sẽka: Baa ne d sẽkã sẽn pa waoogã, d zoe n yãka wakat n na n moond koɛɛgã n pa vaandẽ ye. La bũmb a ye sẽn tõe n kõ-d sũ-noog koe-moonegã pʋgẽ n yɩɩd yaa d sẽn na n zãmsd ned Biiblã. D sã n zãmsd ned Biiblã t’a tũud bũmb nins a Zeova Gomdã sẽn yetã, d tara zu-noogo. (Heb. 4:12) D sã n modg n sõng ned ‘t’a bãng sɩdã,’ noogda a Zeova sũur wʋsgo. (1 Tɩm. 2:4) Malɛgsã meng kɩdemda ne sũ-noogo, yel-wẽn-maand sã n tek yam n kos sugr la a bɩt tẽebã wɛɛngẽ.—Luk 15:10.
6. Wẽnnaam daabã pidsg pʋgẽ, zu-no-bʋg la tõnd tara?
6 Wẽnnaam ‘datame tɩ nebã buud fãa paam fãagr la b bãng sɩdã.’ (1 Tɩm. 2:4) D sã n sak n zãmsd nebã Biiblã, d pidsda Wẽnnaam daabã. La rẽ yaa zu-noog tɛkẽ!