Ra maan-y y menga, n tagsdẽ tɩ y sẽkã paoodame ye
1. Bõe yĩng tɩ kẽer sãmbd tɩ b pa tõe n zãms nebã Biiblã?
1 Neb kẽer sãmbdame tɩ b pa tõe n zãms nebã Biiblã, b sẽkã sẽn paoodã yĩnga. Sɩd me, tõog n sõng Biibl karen-biig baooda sẽk wʋsgo. Bala rẽnda d reng n segl zãmsg fãa, tɩ zãmsgã me baood sẽka. Yɩl n sõng karen-biigã a zu-loɛɛg ning pʋgẽ me rɩkda sẽka. Tʋm-tʋmd a Poll ra yeelame tɩ yẽ kõo a meng n na n sõng Tesalonik rãmbã tɩ b bãng a Zeova. (1 Tes. 2:7, 8) Baa d sẽkã sã n paoodẽ, bõe la d tõe n maan tɩ Biibl karen-biig zãmsg ra vaale?
2. D sẽn nong a Zeova wã tog n kɩtame tɩ d yãt sẽk n maand bõe?
2 A Zeova tũubã baooda sẽka: A Zeova tũubã meng n pʋd n baood sẽka. Wala makre, tigissã kẽnde, koɛɛgã moonego, Biiblã kareng la pʋʋsgã fãa baooda sẽka. Baa pag ne a sɩd sẽk sẽn paood to-to, b maanda b sẽn tõe fãa n sõsd ne taaba. Tõnd me sẽn nong a Zeova wã yĩnga, zemsame tɩ d ‘maand d sẽn tõe tɛk wakat fãa,’ n yãt sẽk n maand bõn-kãensã sẽn tar yõod wʋsgã. (Ef. 5:15-17; 1 Zã 5:3) Sã n yaa ne a Zezi, sõng nebã tɩ b lebg karen-biisã tara yõod wʋsgo, leb n naaga bũmb nins d sẽn maand n waoogd Wẽnnaamã. (Mat. 28:19, 20) D sã n tagsd rẽ yelle, na n sõng-d lame tɩ d ra maan sãmb-sãmbe, n pa tʋm tʋʋm-kãngã Wẽnnaam sẽn bobl-dã ye.
3. Wãn to la d tõe n maane, bũmb sã n wa kɩt tɩ d sẽn da sigl d sẽkã to-to wã toeeme?
3 D nug-tʋʋmdã, bãag wall tigingã tʋʋm sã n wa rat n tiis-do, d maanda wãna? Koe-moondb kẽer sẽn mi n tog sor tũnugda ne telefõnnã bɩ ordinatɛɛrã, n zãmsd Biiblã ne b Biibl karen-biisã. Neb nins sẽn ka laafɩ wã kota b karen-biisã tɩ b wat b nengẽ n zãmsd Biiblã. Neb kẽer zemsa ne koe-moondb b sẽn kɩs sɩda, tɩ b sã n wa pa tõe bɩ bãmb kẽng n tɩ zãms karen-biigã Biiblã.
4. D sã n sõngd nebã tɩ b zãmsd Biiblã, bark bʋs la d na n paame?
4 A Poll sẽn tʋm ne a pãngã fãa, n kẽes a sẽkã n sõng nebã tɩ b bãng sɩdã kõ-a-la sũ-noog wʋsgo. (Tʋʋ. 20:35) A sẽn wa n tags a tʋʋmdã sẽn wom biis to-to Tesalonikã, a pʋʋsa a Zeova barka. (1 Tes. 1:2) Tõnd me sã n pa bas tɩ d sẽkã sẽn paoodã kɩt tɩ d pa sõng nebã tɩ b zãms Biiblã, d sũ-noogã na n paasame.