D paas d koe-moonegã minim
1 Tõnd saasẽ ba wã sã n ne t’a Kaset rãmbã bɩta tẽebã wɛɛngẽ, a sũur nooma wʋsgo. Tõog n yɩ koe-moond sẽn tar minim naaga bɩʋʋngã pʋgẽ. A Poll sagla kãsem soab a Tɩmote t’a kell n wɩng tɩ ‘neba fãa yã t’a bɩtame.’ (1 Tɩm. 4:13-15) Tõnd fãa segd n modgame n paas d koe-moonegã minim, baa d sã n zoe n tara minim.
2 Yãk-y bũmb nins y sẽn na n maanã: Tẽebã pʋgẽ bɩʋʋng baoodame tɩ d yãk bũmb takɩ n maane. Bũmb kẽer d sẽn tõe n yãk n maan la bʋse? D tõe n bao n bãnga d sẽn na n tʋʋmd ne Biiblã to-to tɩ yɩ sõma n paase. (Ef. 6:17) Tõe tɩ d segd n paasa d moonegã minim d sã n wa moond soayã zutu, koosmã zĩisẽ, bɩ n tũnugd ne telefõn n moondẽ, tɩ sã n zemsa ne y moonegã zĩiga. D tõe n bao n manega d sẽn sõsd to-to ne neb nins d sẽn lebgd n tʋgd n kaagdẽ wã. Bũmb a to sẽn yaa sõma wʋsg me yaa d sẽn na n modg n maneg d sẽn maand to-to n sɩngd Biiblã zãmsg ne nebã, la d modgdẽ tɩ zãmsgã kell n kẽngd taoore.
3 Bũmb nins sẽn na n sõng-do: Tigissã n na n sõng-do. Sẽn yɩɩd fãa, b sigla Wẽnnaam tʋʋmdã lekoll la tʋʋmdã tigiss n na n sõng-d tɩ d koe-moonegã minim paase. D sã n modg n segend tigissã, n kẽnd-b la d tũud sagls nins b sẽn kõt-dã, d na n paama nafa wʋsgo.—2 Kor. 9:6.
4 D segd n sõnga d taabã me tɩ b paas b koe-moonegã minim. (Yel. 27:17) D sã n maagd d yĩng n kelgd saam-biis nins sẽn moond ne tõndã sẽn moond to-to wã sõma, na n sõng-d lame tɩ d koe-moonegã minim paase. Sẽn paase, d sebrã zãmsg sull yel-gɛt tõe n baoa koe-moond sẽn tar minim t’a sõng-do. Ad yaa bark tɛkẽ, d sã n paam tɩ so-pakd sẽn tar minim bɩ koe-moond a to sõng-d tɩ d paam minim la sũ-noog koe-moonegã pʋgẽ n paase! Ned bee yãmb sebrã zãmsg sull pʋgẽ n nan sɩngd koɛɛgã mooneg bɩ? Y tõe n bool-a lame t’a wa tɩ y tũ taab n moone.
5 Rũndã-rũndã, yaa koɛɛgã mooneg n tar yõod n yɩɩd bũmb fãa. D sẽn moond koɛɛgã ne d sũy fãa wã yaa sẽn na yɩl n pẽg a Zeova. (Heb. 13:15) D sã n modg n paas d koe-moonegã minim, d na n yɩɩ tʋm-tʋmdb ‘sẽn pa zoet yãnde, la sẽn togsd sɩd koɛɛgã tɩrg bala.’—2 Tɩm. 2:15.