D bels neb nins sũy sẽn sãam b ned kaalem yĩngã
1. Bõe yĩng tɩ d segd n bels neb nins sũy sẽn sãam b ned kaalem yĩngã?
1 Tõnd ned sã n maan kaalem, zabd-d-la wʋsgo, la zabda sẽn ka mi-b tɩ sẽn ki-bã na n vʋʋgame wã n yɩɩda. (1 Tes. 4:13) Neb wʋsg nong n sokda b mens woto: ‘Bõe yĩng tɩ nebã kiidẽ? Bõe n maand-b b kũumã poore? Rẽ yĩnga daar n wat tɩ b na n vʋʋg bɩ?’ Sagls nins sẽn pʋgdã na n sõnga tõnd tɩ d tõog n bels neb nins sũy sẽn sãam b roagd bɩ b zoa kaalem yĩngã.—Ezai 61:2.
2. Ned sã n yeel tõnd t’a ned n maan kaalem, bõe la d segd n maane?
2 Zak-zakã mooneg sasa: D tõe n tɩ mika ned t’a yeel tõnd tɩ yẽ zakã ned n maan kaalem sẽn pa kaoose. Sã n mikame t’a soabã sũ-sãams ket n yaa wʋsgo, pa rẽ bɩ nebã sã n pida zakã sũ-sãangã yĩnga, d pa segd n bao n sõs n kaoos ye. (Koɛ. 3:1, 7) D tõe n pʋʋs-a-la a zaamẽ toogo, la d bao sebr bɩ seb-vãoog sẽn tõe n bels-a n kõ-a la d looge. Rẽ poore, d tõe n baoa raar a to n lebg n wa karem Biiblã n bels-a n paase.
3. Sã n mik tɩ zemsame tɩ d yals n sõs ne ned sẽn be sũ-sãams pʋgẽ, Biiblã verse bʋs la d tõe n karem n wilg-a?
3 Sasa ninga, tõe n yaa sõma tɩ d yals n sõs ne neb sẽn be sũ-sãams pʋsẽ. La pa wakat kãng la d na n bao n kɩɩs b tags-kɛgã ye. D tõe n karma Biiblã zĩis nins sẽn wilgd tɩ sẽn ki-bã na n vʋʋgame wã n wilg-ba. (Zã 5:28, 29) D leb n tõe n karma Biiblã verse rãmb n wilg-b sẽn ki-bã sẽn lebg bũmb ninga. (Koɛ. 9:5, 10) D sã n karem kibay sẽn gomd neb b sẽn vʋʋg yell me, toe n bels-b lame. (Zã 11:39-44) Woto fãa toor sẽn ka be, d tõe n karma wẽn-sakd a Zoob goam nins sẽn wilgd t’a tara saagr t’a Zeova na n wa vʋʋg-a lame wã n wilg-ba. (Zoob 14:14, 15) Nand tɩ d looge, d tõe n kõ-b-la sɛb nins gom-zut sẽn yaa: Tõnd sã n ki bõe n paamd-do? Kũum Sã n Dɩk Ned Y Sẽn Nonge, pa rẽ bɩ sebr wall seb-vãoog a to sẽn gomd rẽ yelle. D leb n tõe n kõ-b-la Biiblã yetame sebrã, la d wilg-b kibay nins sẽn be sak a 6 zĩigẽ wã, n kɩt tɩ b bao raar tɩ d lebg n wa sõs ne-b a zug n paase.
4. Sasa bʋs me la d tõe n bels sẽn be-b sũ-sãams pʋgẽ wã?
4 Sasa a taaba: B sã n wa maand diskuur rĩungã roogẽ tigingã ned kaalem sasa, d tõe n baoa sɛb sẽn belsd n pʋɩ neb nins sẽn pa d tẽed-n-taasã. Sasa ninga, sãnda mi n tũnugda ne b sẽn togsd neb kẽer kʋʋr zʋrno rãmbã pʋsẽ wã n gʋlsd lɛt-koees n toond kiidã neba. Daar a yembre, rao a yembr pag sẽn maan kaalem n bas yẽ ne a bi-pugl paama lɛtr sẽn naag ne seb-vãad a taaba. Rẽ poore, b kẽnga sẽn gʋls-b lɛtrã nengẽ n tɩ sok-b woto: “Yaa yãmb n tool tõnd lɛt-kãngã bɩ? D rat n bãnga Biiblã n paase.” Raoã ne a bi-puglã sakame n na n zãms Biiblã hal n sɩng tigissã kẽnde.
5. Bõe yĩng tɩ d segd n gũusd n get wakat bɩ sasa d sẽn tõe n bels neb nins sẽn be sũ-sãams pʋgẽ wã?
5 Koɛɛg soab 7:2 yeta woto: “Sũ-sãoong roogẽ kõom n são kibs roogẽ kõom.” Sẽn be-b sũ-sãams pʋgẽ wã tʋll n kelga Biiblã sẽn yet bũmb ninsã n yɩɩd sẽn kɩdemd-b sũ-noogã. D fãa segd n gũusdame n get wakat bɩ sasa d sẽn tõe n bels neb nins sẽn be sũ-sãams pʋsẽ b neb kaalem yĩnga.