Tõnd tõogdame tɩ nebã basd ziri wã n sakd sɩdã

¹ Sẽn na maan yʋʋm wʋsgo, a Sʋɩtãan tũnugda ne ziri zãmsg la belgr n tudgd neb wʋsgo. Ziri zãmsgã kẽer a sẽn kɩt tɩ be zĩig fãa yaa tãablmã, sɩɩg pa kiidã, la bugum yirã. A kɩtame tɩ nebã sãmbd naandã sã n sɩd beeme bɩ a ka be, la Biiblã sã n yaa Wẽnnaam n sɩd kɩt tɩ b gʋlse. Bu-welsgã la tẽng-n-biilmã me kɩtame tɩ nebã pa sakd sɩdã ye. (2 Kor. 4:4) Bõe la d tõe n maan n tõog tɩ nebã bas ziri wã n sak sɩdã?—2 Kor. 10:4, 5.

² B zãms-b-la ziri wã hal b yãadmẽ: Bũmb ning b sẽn zãms nebã tɩ b tagsd tɩ yaa sɩdã kẽe b sũyã wʋsgo. Neb wʋsg zãmsa rẽ hal b yãadmẽ. Sẽn na yɩl n sõng nin-kãense, d segd n modgame n da paoog-ba, baa ne bũmb nins sẽn b sẽn tẽedã sẽn pa sɩdã.—1 Pɩɛ. 3:15.

³ D sã n basd nebã tɩ b wilgd b sẽn tẽed bũmb ninsã, la bũmb ning sẽn kɩt tɩ b tẽed rẽ wã, d waoogd-b lame. (Zak 1:19) Tõe tɩ yaa b sẽn dat ne b sũy fãa n yã b ned sẽn maan kaalmã yĩng n kɩt tɩ b tẽed tɩ ninsaal sɩɩg pa kiidã. Bɩ tõe tɩ b sẽn nong kibs rãmb maanegã yaa sẽn kɩtd tɩ b paamd n yãt b zakã rãmbã fãa sasa kãensa wã yĩnga. D sã n kelgd nebã sõma, na n kɩtame tɩ d bãng b tagsgo, n tõog n leok-b sõma.—Yel. 16:23.

⁴ D rɩk a Zezi togs-n-taare: Rao sẽn da mi Tõogã sõma waa n soka a Zezi sogsgo. A Zezi sẽn leok-a to-to wã yaa mak-sõng n kõ tõndo. A Zezi pa wilg-a a sẽn segd n maan bũmb ning ye. Bala a ra tõe n zãgsame, a sẽn da tẽed bũmb ning a sẽn zãmsã ne a sũur fãa wã yĩnga. A Zezi wilg-a-la Gʋlsg Sõamyã sẽn yet bũmb ninga, n kõ-a sor t’a wilg a tagsgo, la a rɩk makr n sõng-a t’a tags n bãng a sẽn segd n maanega.—Luk 10:25-37.

⁵ Wẽnnaam Gomdã tõe n kɩtame tɩ nebã bas ziri wã tẽebo. (Heb. 4:12) D sã n maag d yĩng n wilg nebã sɩdã tɩ kẽ b sũyã, d na n tõog n sõng-b lame tɩ b bas ziri wã n sak sɩdã sẽn tõe n kɩt tɩ b paam b mensã.—Zã 8:32.