Filiyallã Lɛtre
Rĩungã koe-moondba,
“Zẽk-y y nens n ges pʋtã, tɩ bõe, bãmb pelgame n ta tigsgu.” (Zã 4:35) Yaa ne sũ-noog la a Zezi yeel woto n na n wilg a karen-biisã tɩ b tigis neb nins sẽn yaa sakdb wa piisã sẽn na yɩl tɩ b wa paam vɩɩm sẽn kõn sa wã. D sẽn ne a Zeova Kaset rãmbã sẽn be zĩig fãa n baood pʋ-peelem dãmbã n sõngd-b tɩ b wat n kẽed “rotẽ wã” n paamd bãan Wẽnnaam siglgã pʋgẽ wã sɩd kõta sũ-noog wʋsgo!—Ezai 26:20.
Wala makre Kamerun yãka sigr kiuugã n tãag sɩpaolg kiuugã, tɩ yʋʋmd fãa, koe-moondbã kẽngd zĩis nins b sẽn pa wae n moondẽ wã n kõt kasetã. Rɩẽ kiis a yoob kãensã pʋsẽ, koe-moondb 757, sẽn yaa sul 124 la b tʋm tɩ b tɩ moon zĩis 87 pʋsẽ. B pʋɩya sɛb 81 652 la seb-biy 106 008. Rõndã sigr kiuugã, b tʋma koe-moondb 1 267 tɩ b tɩ moon zĩis 95 pʋsẽ b sẽn nan pa kõ tigingã. Filiyallã toola seb-biy 300 000 la sɛb 46 000 koe-moondb kãensã sẽn yaa sul 141 wã. Yɩɩ zags gilli, neb sẽn pa kẽ kãadem, kom-bɩɩse, kãsemb la nin-kẽemba, n tɩ moon koe-noogã zĩ-kãense.
Togo me, koe-moondb 600 n tɩ moon zĩis woto pʋsẽ. Kiis a tãab pʋgẽ, b pʋɩya sɛb 5 830, seb-biy 27 220 la zʋrno rãmb 18 799. Zĩis toɛy-toɛy pʋsẽ, saam-biisã maana diskuur dãmb tɩ neb 2 830 wa kelge. B sẽn wa n na n lebg n kulã, tẽn-kãens nebã sãnda yeela woto: “Ra yĩm-y d yell ye. Lebg-y n wa-yã!” Ad woto sɩd kõta sũ-noogo!
Burkĩna Faso me b maanda woto. B tʋma saam-biis a yiib zĩig a ye b sẽn pa wae n moondẽ tɩ b tɩ moon kiis a tãabo. B pʋɩya sɛb 249, seb-biy 597, la zʋrno rãmb 1 432. Kiuug a tãab-n-soabã pʋgẽ, b zãmsa neb 37 Biiblã, tɩ rẽ pak sor tɩ b tʋm so-pakdb be tɩ b kell n kẽng taoor ne a Zeova bõn-neebã tigisgu. (Azze 2:7) Vẽenega, ‘pʋtã sɩd pelgame.’ Wala makre, Mali, neb nins sẽn deeg lisgã sʋka, koabg zugu, neb 43 n paase, tɩ Gine Bisao paam neb 50 koabg zug n paase.
Rẽ yĩnga woto fãa pa kɩt tɩ y rat n segl y mens sẽn na yɩl n kẽes y mens tigsgã pʋgẽ rõndã sɩda? Vẽenega, “tigisgã yaa wʋsgo la tigisdbã yaa bilfu.” (Mat. 9:38) Saam-biis la saam-bi-pogse, d sɩd pẽgd-y-la wʋsgo! Bɩ a Zeova ning d fãa sẽn na n maan modgr ning rõndã wã barka, d sẽn na n dɩk sẽk la pãng wʋsg n moon koɛɛgã, bala pʋtã sɩd “pelgame n ta tigsgu.”
Yãmb saam-biisã,
Filiyallã biru