D sõng nebã tɩ b wa nong a Zeova
1. Bõe n sõng neb kẽer tɩ b paam zood ne a Zeova?
1 Yãmb ket n tẽra b sẽn gom a Zeova yell pipi tɩ yãmb wʋm bɩ? Bõe n sõng-y tɩ y wa paam zood ne-a? Y sã n sok pʋ-peelem dãmbã, wʋsg na n yeel-y lame tɩ yaa b sẽn bãng a Zeova sẽn yaa a soabã, sẽn yɩɩd fãa a nimbãan-zoeerã la a nonglmã n sõng-b tɩ b paam zood ne-a.—1 Zã 4:8.
2, 3. Wãn to la d tõe n tũnug ne Biiblã yetame sebrã n sõng Biibl karen-biig t’a wa nong a Zeova sõma?
2 “Yaa tõnd Wẽnnaam”: Biiblã yetame sebrã gomda a Zeova nonglmã yell wʋsgo, la a wilgd bũmb ning sẽn kɩt tɩ ned kam fãa segd n tall zood ne-a wã. Wãn to la d tõe n tũnug ne seb-kãng n sõng nebã tɩ b wa nong Wẽnnaam sõma? D sã n wa gomd bõn-sãang yell ne neda, d tõe n sok-a-la sokr sẽn tõe n kɩt t’a tags sõma. Wala makre: “Bõe la woto zãmsd yãmb a Zeova zugu?” “Wãn to la bõn-kãng wilgd t’a Zeova yaa ba sẽn ka to, tɩ ned fãa rat t’a yɩ a ba?” D sã n zãmsd karen-biigã woto, na n sõng-a lame t’a tõog n tall zood ne a Zeova wakat fãa.
3 Tõnd sã n sõng Biibl karen-biig t’a bãng t’a sẽn paam n bãngd sɩd Wẽnnaamã sẽn yaa a soabã yaa zu-noog tɛkẽ, a wat n yeela wa a Ezai sẽn yeel bũmb ningã: “Yaa tõnd Wẽnnaam.” (Ezai 25:9) D sã n wa zãmsd ned Biiblã, d segd n wilg-a-la a Zeova sẽn na n tũnug ne a Zezi Rĩungã n ning ãdem-biisã bark to-to n pids a raabã.—Ezai 9:5, 6.
4, 5. Nong a Zeova rat n yeelame tɩ bõe?
4 Kaset sẽn wilgd tɩ d nonga a Zeova: D miime tɩ nong a Zeova ne d sũurã fãa, d sɩɩgã fãa, la d yamã fãa yɩɩda d sẽn na n tagsd a yell bal la d yetẽ tɩ d nong-a lame. D segd n modg n geta yɛlã wa a Zeova sẽn get-b to-to wã. (Yɩɩl 97:10) Yaa d sẽn na n tũud Wẽnnaam noyã sõma-sõma la d kell n tall manesem sẽn yaa sõma la d tʋmd wẽn-zoeer tʋʋm baa zu-loees la namsg taoore, n wilgd tɩ d nonga Wẽnnaam.—2 Pɩɛ. 3:11; 2 Zã 6.
5 D sã n maand a Zeova raabã d sẽn nong-a wã yĩnga, kõt-d-la sũ-noogo. (Yɩɩl 40:9) Biibl karen-biig segd n bãngame tɩ Wẽnnaam noyã fãa yaa a tẽedbã wakat fãa neer yĩnga. (Tõo. 10:12, 13) Ned sã n tũud Wẽnnaam sor-wilgrã, a wilgdame t’a nanda bõn-sõma wã Wẽnnaam sẽn naan-a. Sõng-y karen-biigã t’a bãng t’a sã n tũud a Zeova noyã sẽn yaa tɩrsã, kogend-a-la ne yɛl sẽn tõe n wa ne sũ-sãamse.
6. Bark bʋs la neb nins sẽn nong a Zeova wã paamda?
6 Neb nins sẽn nong Wẽnnaamã paamda barka: Wẽnnaam a Zeova geta neb nins sẽn nong yẽ la b yaa sik-m-mens rãmbã yell wʋsgo, la a vẽnegd-b a “yel-zulumsã.” (1 Kor. 2:9, 10, NW ) Rẽ sẽn kɩt tɩ b paam n bãng a Zeova raabã, b mii beoog daar sẽn na n yɩ to-to, la b tara saagr hakɩka. (Zer. 29:11) Neb nins sẽn nong a Zeova wã paamda a barkã. (Yik. 20:6) B saagdame n na n wa vɩɩmd wakat sẽn kõn sa, Wẽnnaam sẽn nong-b wʋsgã.—Zã 3:16.
7. Yãmba sã n sõng ned t’a wa nong a Zeova kõta yãmb bõe?
7 D sã n bãngd d Ba sẽn be saasẽ wã n paasdẽ, kɩtdame tɩ d rat n gom a yell ne nebã wakat fãa. (Mat. 13:52) D sã n zãms neb tɩ b wa nong a Zeova, sẽn yɩɩd fãa d kambã, sɩd yaa sũ-noog tɛkẽ! (Tõo. 6:5-7) Bɩ tõnd ne d karen-biisã kell n pẽg a Zeova a sõmblmã yĩnga.—Yɩɩl 145:7.